Dža ko teksto

Dža ki sodržina

Panda akana šaj te spremine tut te živine ko jekh pošukar sveto so ka avel panda hari

Paše tano o raj ki Phuv!

Paše tano o raj ki Phuv!

O Devel stvoringja i Phuv te šaj o pravedna manuša te živinen ki late zasekogaš (Psalm 37:29). Ov čhivgja e prvo manušen, e Adame hem e Eva, te živinen ki jekh but šuži gradina koja so vikinela pe sine Eden. Isto agjaar, dengja len zadača hem lengere čhaven te keren celo Phuv raj hem te grižinen pe lake (1. Mojseeva 1:28; 2:15).

Avdive i Phuv nane raj sar so manglja te ovel o Devel. Ama, o Devel na promeningja pli namera. Sar o Devel ka kerel i Phuv raj? Sar so dikhlem ko anglune statie, o Devel nane te uništinel i Phuv, nego ka mukhel o pravedna manuša te živinen ki late. Keda ka ispolninel o Devel ple vetuvanja, hem sar tegani ka ovel o životo ki Phuv?

Ki celo Phuv ka ovel samo jekh vlada

Panda hari, keda e Devleskiri nebesno vlada ka vladinel upro sa o manuša, i Phuv ka ovel jekh šužo than kote so sarine ka oven bahtale, ka živinen ko jekhipe hem ka keren buti koja so ka kerel len bahtale. O Devel čhivgja e Isuse te vladinel upri celo phuv. Avdive but vladetelija na grižinena pe čače e manušenge. Ama, o Isus nane asavko, ov sekogaš ka kerel adava soj tano najšukar e manušenge. Ov ka vladinel mangipaja, ka ovel ljubezno, milostivo hem pravedno Cari (Isaija 11:4).

Sa o manuša ka oven ko jekhipe

Ko nevo sveto o manuša nane te oven odvojme sprema nacionalnost ili poteklo, nego ka oven ko jekhipe (Otkrovenie 7:9, 10). Sa o manuša so ka živinen ki Phuv ka mangen e Devle hem ple pašutnen, hem ola zaedno ko mir ka keren buti te šaj te ispolninel pe e Devleskiri namera e Phuvjaja so sine ko početok (Psalm 115:16).

Ki Phuv nane te oven prirodna katastrofe

Keda ka vladinel e Devleskoro Carstvo, amaro Stvoriteli ka grižinel pe te ovel amen stabilno klima hem te na oven više prirodna katastrofe (Psalm 24:1, 2). Keda o Isus sine ki Phuv, smiringja jekh bari bura hem agjaar sikavgja kobor bari mokj dengja le o Devel (Marko 4:39, 41). Keda ka vladinel o Isus nane te dara kaj ka oven prirodna katastrofe. Ko e Devleskoro Carstvo ka ova ko mir e životnencar hem nikoj nane te uništinel više amari Phuv (Osija 2:18).

 Sovršeno sastipe hem but hajbaske

Sarinen ka ovel sovršeno sastipe. Nikoj nane te nasvaljovel, te phujrol ili te merel (Isaija 35:5, 6). O manuša ka živinen ki čisto hem šuži Phuv sar ki Edensko gradina, kote so živingje o Adam hem i Eva. Ko nevo sveto, isto sar ko Eden, i Phuv ka bijanel but hajbaske hem sa e manušen ka ovel len dovolno hajbaske (1. Mojseeva 2:9). Isto sar o Izraelcija ko purano vreme, kola so sine e Devleskoro narodo, agjaar sarine ko raj ka han „maro džikote na čaljovena“ (3. Mojseeva 26:4, 5).

Čačutno mir hem sigurnost

Ko e Devleskoro Carstvo o manuša ka uživinen ko mir, ka oven česna hem ljubezna maškar peste. Nane te oven više vojne, nikoj nane te zloupotrebinel pli mokj hem nikoj nane te mučinel pe te šaj te oven le o bukja so valjani leske. I Biblija vetinela: „Sekova jekh ka bešel teli pli drakh hem teli pli smokva hem nijekh nane te daravel len“ (Mihej 4:3, 4).

Sarinen ka oven len pumare khera hem buti koja so ka kerel len bahtale

Sekole familija ka ovel la plo kher hem nane te daral kaj ka našavel le. Isto agjaar, sekoja buti so ka keren o manuša ka anel lenge bahtalipe. I Biblija vakerela kaj sa okola so ka živinen ko e Devleskoro nevo sveto „nane te keren buti džabe“ (Isaija 65:21-23).

Najšukar obrazovanie

I Biblija vetinela: „I phuv ka ovel pherdi pendžaribaja bašo Jehova“ (Isaija 11:9). O manuša so ka živinen ko nevo sveto ka sikljoven tari bari mudrost pumare Stvoriteleskiri, e Jehovaskiri, hem ka sikljoven bašo sa o šuže bukja so stvoringja len. Ola nane te koristinen plo znaenje te keren oružje ili te povredinen e javere manušen (Isaija 2:4). Namesto adava, ola ka sikljoven sar te živinen ko mir e javere manušencar hem sar te grižinen pe baši Phuv (Psalm 37:11).

Večno životo

O Devel mangipaja kergja i Phuv te šaj amen te uživina ki late sekova dive. Leskiri namera sine o manuša te živinen ki Phuv zasekogaš (Psalm 37:29; Isaija 45:18).Te šaj te ispolninel pli namera, o Devel, „ka uništinel o meribe zasekogaš“ (Isaija 25:8). I Biblija vakerela: „Meribe nane te ovel više, ni žalibe, ni rojbe, ni dukha“ (Otkrovenie 21:4). O Devel sa e manušenge — okolenge so ka preživinen o krajo akale lošno svetoskoro hem okolenge so ka voskresninen ko nevo sveto — ka del prilika te živinen večno (Jovan 5:28, 29; Dela 24:15).

 Milionja manuša panda akana spreminena pe te živinen ko e Devleskoro nevo sveto kova soj tano but paše. Iako tane nesovršena, ola panda akana trudinena pe te oven manuša sar so mangela o Devel te živinen ko raj. Sar kerena adava? Agjaar so sikljovena bašo Jehova o Devel hem bašo leskoro čhavo, o Isus Hristos (Jovan 17:3).

Doznajn poviše sar šaj te preživine o krajo taro akava sveto hem te živine ko jekh pošukar sveto so ka avel panda hari. Ako mangea šaj besplatno te proučine i Biblija e Jehovaskere svedokoncar ili te posetine i internet-stranica jw.org hem te rode nekoj te posetinel tut.