Џа ко тексто

Џа ки содрежина

 8 ЛЕКЦИЈА

Соске о Девел панда мукхела те овел о лошнипе хем о муке?

Соске о Девел панда мукхела те овел о лошнипе хем о муке?

1. Сар почминѓа о лошнипе ки Пхув?

О Девел мукхља е манушенге доволно време те владинен те шај те дикхел пе кај нашти те решинен е манушенгере проблемија

О лошнипе почминѓа ки Пхув кеда о Сатана вакерѓа о прво ховајбе. Ов сине кердо сар совршено ангели ама ‚на ачхило ко чачипе‘ (Јован 8:44). Ов мангља о мануша леске те служинен, ама адава право иси само е Девле. О Сатана ховавѓа е прво џувља, е Ева, хем вакерѓа лаке кај ка овел лаке пошукар ако шунела ле, а на е Девле. О Адам, исто сар и Ева, на шунѓа е Девле. Е Адамескири одлука сариненге анѓа муке хем мерибе. Читин 1. Мојсеева 3:1-6, 19.

Кеда о Сатана ховавѓа е Ева те на шунел е Девле, ов бунинѓа пе против е Девлескоро право те владинел, хем против адава кај о Девел тано о Најбаро. Побутер мануша одбинена е Девле сар ленгоро Владетели хем овена тари е Сатанаскири страна. Аѓаар о Сатана уло ‚о владетели е сумналескоро.‘ Читин Јован 14:30; 1. Јованово 5:19.

2. Дали о Девел керѓа грешка џикоте керѓа е ангелен хем е манушен?

Са со керѓа о Јехова тано совршено. О прва мануша хем о ангелија шај сине те овен леске послушна ко са (5. Мојсеева 32:4, 5). О Девел мукхела амен коркори те бирина дали ка кера шукарипе или лошнипе. Аѓаар шај те сикава кобор мангаја ле. Читин Јаков 1:13-15; 1. Јованово 5:3.

3. Соске о Девел панда мукхела те овел пхарипа?

О Јехова мукхља и побуна против лескоро право те владинел те трајнел несаво одредено време. Соске? Те шај о време те сикавел кај о мануша нашти коркори те владинен (Проповедник 7:29; 8:9). Накхле 6.000 берша сар со владинена о мануша  хем шај јасно те дикхел пе кај е манушенгере владе нашти цидена о војне, о криминал, о неправде или о насвалипе. Читин Еремија 10:23; Римјаните 9:17.

О Девел нане сар о мануша, Ов владинела башо шукарипе пле народоске (Исаија 48:17, 18). Панда хари, о Јехова ка чхивел крајо са е владенге. Само окола мануша со ка биринен е Девле сар ленгоро Владетели, ка ачховен те џивдинен ки Пхув (Исаија 11:9). Читин Даниел 2:44.

Дикх о видеоклипи Соске о Девел панда мукхела те овел о лошнипе хем о муке?

4. Сави прилика иси амен адалеске со о Јехова тано стрпливо?

О Сатана вакерела кај о мануша служинена е Јеховаске тари корист, а на со мангена ле. Ка манге ли те сикаве кај акава нане аѓаар? Те мангљан, ту шај те кере адава! Адалеске со о Девел тано стрпливо, иси амен прилика те сикава дали мангаја те владинел аменцар Ов или о мануш. Адалестар сар џивдинаја ка дикхјол со бирингем. Читин Јов 1:8-12; Изреки 27:11.

5. Сар ка сикава кај бирингем е Девле сар амаро Владетели?

Амаре одлуке ка сикавен дали мангаја о Девел те овел амаро Владетели

Ка сикава кај бирингем е Девле те владинел аменцар ако кераја адава со пишинела ко лескоро Лафи, ки Библија (Јован 4:23). Ка сикава кај на мангаја о Сатана те владинел адалеа со нане те мешина амен ки политика хем ко војне. Читин Јован 17:14.

О Сатана користинела пли моќ те ширинел о неморал хем о лошна буќа. Кеда на кераја асавке буќа, несаве тари амари фамилија или амала шај те асан или те противинен пе аменге (1. Петрово 4:3, 4). Адалеске, секој ваљани коркори те биринел. Ка дружина амен ли манушенцар со мангена е Девле? Ка џивдина ли според лескере мудра законија, денде башо амаро шукарипа? Ако кераја адава, ка сикава кај о Сатана ховавѓа кеда вакерѓа кај нијекх мануш нане те служинел е Девлеске кеда леске пхаро. Читин 1. Коринќаните 6:9, 10; 15:33.

Адава со о Девел мангела е манушен дела амен гаранција кај ка авел крајо е лошнипаске хем е мукенге. Адала со сикавена кај верујнена ко акава ка џивдинен вечно ки Пхув. Читин Јован 3:16.