Џа ко тексто

Џа ки содрежина

 2 ПУЧИБА

Ваљани ли те грижинав ман сар изглединава?

Ваљани ли те грижинав ман сар изглединава?

СОСКЕ ТАНО ВАЖНО

Несаве буќа тане поважна таро адава со дикхеа лен ки ајна.

СО БИ КЕРЕА ТУ?

Замислин туке и следно ситуација: И Сузана секогаш кеда дикхела пе ки ајна мислинела кај тани тхули. „Мора те слабонав“ размислинела ки песте иако лакере родителија хем о амала вакерена кај тани „шуки сар каш“.

Англедер несаво време и Сузана размислинела сине башо адава со ваљани те керел те шај хари те слабонел. Адалеске одлучинѓа некобор диве те на хал ништо.

Те ове сине ки лакири ситуација, со би кереа сине ту?

АЧХОВ ХЕМ РАЗМИСЛИН!

Адава сар дикхеа коркори туте, шај те овел сар кеда дикхеа тут ки банги ајна

Нане ништо погрешно те грижине тут башо тло изглед. И Библија да вакерела кај бут џувља хем мурша сој спомниме ки лате сар на пример и Сара и Рахела и Авигеја о Јосиф хем о Давид сине шуже хем шукар изглединена сине. И Библија пхенела кај и Ависага сине „посебно шужи“ чхај (1. Царевите 1:4).

Ама, бут терне тане опседниме одолеа сар изглединена. Адава шај те анел џи ко сериозна проблемија. Размислин башо акала буќа:

  • Ко јекх истражување сине пхендо кај 58 процентија таро чхаја пхенена кај тане тхуле, ама само 17 процентија олендар сине чаче тхуле.

  • Ко јекх јавер истражување, 45 процентија таро џувља кола сине бут слаба мислинена сине кај тане бут тхуле!

  • Тари дар те на тхуљон, бут терне чхаја иси лен анорексија. Ола икерена добором бут диете аѓаар со уништинена по састипе.

 Ако иси тут симптомија баши анорексија или јавер проблеми е хајбаја, роде помош. Вакер тле родителенге или некаске сој попухро тутар ки касте со иси тут доверба. И Библија вакерела: „О чачутно амал сикавела мангипе ко секова време хем пхрал овела ко пхаре диве“ (Изреки 17:17).

НАЈШУКАР ПРОМЕНА СО ШАЈ ТЕ КЕРЕ ЛА!

Дали некој тано привлечно или на, зависинела таро адава саво мануш тано андрал. Размислин башо Авесалом, е Давидескоро чхаво. Ки Библија пишинела:

„На сине јавер мануш коле со добором бут фалинена ле сине башо лескоро шужипе... Таро про џи ко шеро ништо на фалинела леске сине“ (2. Самоилова 14:25).

Акава терно мануш сине бут гордо, предавнико хем мангела сине те овел ле власт. Адалеске о Авесалом ки Библија нане познато сар шукар личност. Ов сине мануш бизи лаџ, мрзинела хем мударела сине е јаверен.

И Библија советинела амен:

„Уравен тумен и неви личност“ (Колошаните 3:10).

„Тумаро украс ма те овел авријалдан... него ов нека овел адава сој туменге андре ко вило, со на дикхјола“ (1. Петрово 3:3, 4).

Иако нане лошно те манге те изгледине шукар, ама бут поважно тано сави личност сиан. Нане те ове привлечно е јаверенге само адалеске со иси тут мускулија или згодно тело, него со иси тут шукар особине. Јекх чхај со викинела пе Филисија вакерела: „Кеда сиан шужо, о јавера сигате ка приметинен тут, ама најшукар ка памтинен тут таро адава саво мануш сиан, саве шуже особине сикавеа“.

СО МИСЛИНЕА БАШО ТЛО ИЗГЛЕД?

Дали бут пути сиан разочаримо таро адава сар изглединеа?

Дали некогаш размислинѓан те кере пластично операција или те икере несави строго диета те шај те изгледине пошукар?

Кеда би мангеа сине те сменине нешто ко тло изглед, со би сменинеа? (Бирин)

  • И ВИСИНА

  • И ТЕЖИНА

  • О БАЛА

  • О ТЕЛО

  • О МУЈ

  • О ТЕНИ

Ако ко прва дуј пучиба одговоринеа „оја“, а ко трито биринеа трин или побутер буќа, размислин башо акава: Шај о јавера на дикхена тут добором лошно сар ту со дикхеа тут. Локхесте шај те џа ки крајност хем претерано те ове загрижимо башо тло изглед (1. Самоилова 16:7).