Џа ко тексто

Џа ки содрежина

 1 ПУЧИБА

Кој сиум ме?

Кој сиум ме?

СОСКЕ ТАНО ВАЖНО

Адава со пошукар ка џане сави личност сиан ту, ка поможинел тут те шај те ане мудра одлуке кеда ка аракхљове ки пхари ситуација.

СО БИ КЕРЕА ТУ?

Замислин туке акаја ситуација: И Сабина тани ки јекх забава, хем пало деш минутија шунела јекх познато гласо.

„Соске аљан акате, само те беше?“

И Сабина иранела пе хем дикхела пе амалинка е Мелиса, дује пивонцар ко вас. И Мелиса дела ла јекх пиво хем вакерела лаке: „Чхаје, на сиан тикни! Ле, пи хем уживин!“

И Сабина на мангела те лел о пиво. Ама и Мелиса тани лакири амалин, хем на мангела ој те мислинел песке кај и Сабина руминела о забаве. Освен адава, е Мелиса џанена ла сар шукар чхај. Хем ако ој пиела, тегани нане добором страшно. „Адава тано само јекх пиво, нане дрога“, мислинела песке и Сабина.

Те ове сине ко е Сабинакоро тхан, со би кереа сине ту?

АЧХОВ ХЕМ РАЗМИСЛИН!

Те шај те ане мудра одлуке ваљани те овел тут „свое ја“. Со значинела адава? Адава тано чувство со авела андрал хем пхенела туке саво сиан хем кола тане тле ставија. Кеда иси тут „свое ја“ тегани ту контролиринеа тут, а на некој јавер (1. Коринќаните 9:26, 27).

Сар шај те овел тут асавки доверба ки туте? Шукар ка овел те одговорине ко пучиба со авена.

 1. КОЛА ТАНЕ МЛЕ ЈАКА СТРАНЕ?

Ако џанеа башо со сиан способно хем кола тане тле шукар стране, тегани ка овел тут побари доверба ки туте.

ПРИМЕРИЈА ТАРИ БИБЛИЈА: О апостол Павле пишинѓа: „Шај на џанава шукар те керав лафи, ама шукар пенџарава о буќа“ (2. Коринќаните 11:6). Адалеске со џанела сине шукар е Девлескоро Лафи, о Павле шај сине те ачхол зорало ко пло стави кеда о јавера нападинена ле сине. Ов на мукхља о негативна лафија те влијајнен упри лесте (2. Коринќаните 10:10; 11:5).

ИСПИТИН ТУТ КОРКОРИ: Пишин јекх тло таленти или јекх бути со кереа ла шукар.

Акана пишин јекх тли јако особина. (На пример, дали грижинеа тут јаверенге? Дали деа таро вило? Дали икереа тут точно ко време? Дали сиан мануш со о јавера шај те верујнен ки туте?)

2. КОЛА ТАНЕ МЛЕ СЛАБА СТРАНЕ?

О тхав чхинѓола коте сој најсано. Нане те овел тут „свое ја“ ако ко живото мукхеа те водинен тут тле слаба стране.

ПРИМЕРИЈА ТАРИ БИБЛИЈА: О Павле сине свесно башо пле слаба стране. Ов пишинѓа: „Андре ко мло вило, ме чаче уживинава ко е Девлескоро закони, ама ко мло тело дикхава јавер да закони кова со боринела пе против о закони ко мле мисле, хем акава закони е гревоскоро икерела ман сар робо“ (Римјаните 7:22, 23).

ИСПИТИН ТУТ КОРКОРИ: Кола слаба стране ваљани те сикљове те контролирине лен?

 3. КОЛА ТАНЕ МЛЕ ЦЕЛИЈА?

Дали ка кхуве ко такси хем ка вакере: „Возин било кај, са џикоте на ачховеа бизо бензини“? Адава би овела глупаво хем бут скупо!

Со шај те сикљове? Кеда иси тут целија тегани ола водинена тут на сиан сар нашавдо. Џанеа со мангеа те кере хем иси тут плани сар те кере адава.

ПРИМЕРИЈА ТАРИ БИБЛИЈА: О Павле пишинѓа: „На прастава бизи цел“ (1. Коринќаните 9:26). Наместо те живинел сар со пхудела ле и балвал, е Павле сине ле целија кола со водинена ле сине ко живото (Филипјаните 3:12-14).

ИСПИТИН ТУТ КОРКОРИ: Пишин трин целија со ка манге те кере ки ленде бути цело берш.

4. КО СО СИУМ УБЕДИМО?

Кеда иси тут „свое ја“, ту сиан сар јекх зорало каш со иси ле баре коренија, кова шај те издржинел ко баро невреме

Ако на сиан убедимо ко нешто, тегани локхе шај те пере ко јаверенгоро влијание. Тегани овеа сар камелеони, ка менине ти боја те шај те ове јекх те амаленцар — знако со сикавела кај нане тут „свое ја“.

Тари јавер страна, кеда кереа о буќа сар со џанеа кај тане шукар, ка икере тут ко тло, бизи разлика со керена о јавера.

ПРИМЕРИЈА ТАРИ БИБЛИЈА: Кеда сине терно чхаво, о Даниел одлучинѓа те шунел е Девлескоро закони, иако сине дур пле родителендар (Даниел 1:8). Аѓаар, сикавѓа кај иси ле „свое ја“. О Даниел живинела сине спрема адава со џанела сине кај тано шукар.

ИСПИТИН ТУТ КОРКОРИ: Ко со сиан убедимо ту? На пример: Дали верујнеа ко Девел? Ако оја, соске? Кола доказија уверинена тут кај иси Девел?

Уверимо ли сиан кај е Девлескере советија тане башо тло шукарипе? Ако оја, соске?

Пало са акава, сар касте мангеа те ове — сар локхо листо со ингарела ле и балвал, или сар јекх баро каш со иси ле баре коренија хем шај те издржинел баро невреме? Ако иси тут „свое ја“ ка ове сар акава каш. Адава ка поможинел тут те аве џи ко одговор таро пучибе: Кој сиум ме?