Џа ко тексто

Џа ки содрежина

 5 ЛЕКЦИЈА

Те ценина е Девлескере бут шукар особине

Те ценина е Девлескере бут шукар особине

Е ДЕВЛЕСКОРО Лафи сикавела кај е Девле иси ле бут шукар особине, хем аѓаар поможинела аменге те пенџара ле. На пример, вакерела аменге башо штар главна особине е Девлескере — сила, правда, мудрост, хем мангипе. Те дикха секоја јекх лендар.

Е Девле иси ле сила те керел са

Е Девле иси ле бари сила

О Јехова вакерѓа е Ибрахимеске (Авраамеске): „Ме сиум о Семоќно Девел“ (1. Мојсеева 17:1). Никас нане сар е Девлескири сила, ов шај те керел са хем лескере сила нане ла крајо. Пе силаја, о Девел керѓа цели вселена.

О Девел никогаш на користинела пи сила лошна букенге, ов секова пути користинела ла башо корисна буќа хем кобор со ваљани. Кеда користинела ла, ов ко исто време сикавела правда, мудрост хем мангипе.

О Јехова бут мангела пе силаја те поможинел пе верна слугенге. Е Девлескоро Лафи вакерела: „О Јехова пе јакхенцар родела ки цели пхув те сикавел пи сила ки корист околенге со служинена леске цело вилеа“ (2. Летописи 16:9). На мангаја ли те ова паше асавке Девлеа кова тано бут силно хем кова со мангела те поможинел амен?

О Девел тано праведно

„О Јехова мангела и правда“ (Псалм 37:28). Ов најшукар џанела со и праведно хем секогаш керела адава со и исправно.

О Девел на одвојнела е манушен

О Девел мрзинела и неправда. Ов „на одвојнела е манушен хем на приминела мито“ (5. Мојсеева 10:17). Ов тано против окола со анена пхарипе е јаверенге, а поможинела околенге со нане кој те бранинел лен, сар со и ‚о удовице или о чхаве бизо дад‘ (2. Мојсеева 22:22). Е Девлеске са о мануша тане иста. Ко лескоро Лафи вакерела: „О Девел на одвојнела е манушен, него тари секоја нација прифатинела околе со дарала лестар хем керела адава со и праведно“ (Дела 10:34, 35).

Е Јеховаскири правда тани совршено. Ов ни бут на премукхела, ни нане бут строго. Ов казнинела околен со на кајнена пе кеда грешинена, а сикавела милост околенге со кајнена пе. Ко е Девлескоро Лафи терѓола: „О Јехова тано сочувствително хем шукар, на хољанела сигате хем пхердо тано милост. Нане засекогаш те памтинел о грешке, ни нане те овел хољамо засекогаш. На постапинела аменцар според амаре гревија хем на иранела аменге адава со заслужинаја башо амаре грешке“ (Псалм 103:8-10). О Девел исто аѓаар, памтинела о шукар буќа со керена лескере верна слуге хем дела лен награда. На заслужинела ли асавко праведно Девел те веруња ки лесте?

 О Девел тано мудро

Е Девлескири мудрост со дикхаја ла таро буќа со керѓа лен, керела те поштуња ле

Е Јеховастар авела и мудрост. Ко лескоро Лафи бешела: „О кобор тане бут баре о берекетија со авена таро Девел хем бут тане хор лескири мудрост хем о џандипе!“ (Римјаните 11:33). Лескири мудрост тани најбари хем нане ла крајо.

Е Девлескири мудрост шај бут шукар те дикхел пе таро буќа со керѓа лен. Ко е Девлескоро Лафи пишинела: „Кобор бут тане о буќа со керѓан лен, Јехова! Са тане мудро керде тутар“ (Псалм 104:24).

Е Девлескоро Лафи исто аѓаар сикавела аменге лескири мудрост. О цари о Даути (Давид) пишинѓа: „Ки поука е Јеховаскири шај те веруњел пе, ој керела мудро околе со нане искусно“ (Псалм 19:7). Замислин — амен шај те сикљова тари е Девлескири бари мудрост! Ка кера ли адава?

„О Девел тано мангипе“

Е Јеховаскири главно особина тани о мангипе. „О Девел тано мангипе“, вакерела аменге лескоро Лафи (1. Јованово 4:8). Са со керела, керела таро мангипе.

О Девел сикавѓа аменге по мангипе ко бут начинија адалеа со денѓа амен бут шукар буќа.  Ко лескоро Лафи вакерела: „Керѓа шукарипе, денѓа тумен бршим таро небо хем времија кеда и пхув дела бут плодија, пхерѓа тумаре виле хајбаја хем бахталипаја“ (Дела 14:17). Чаче, „секова шукар дари хем совршено поклон авела упралдан, соске хулела таро Дад со керѓа о небесна светлија“ (Јаков 1:17). Јекх таро највредна поклонија тано е Девлескоро Лафи. Адатхе о Девел сикавела аменге саво тано Ов хем сикљоваја башо лескере законија хем начелија пхерде мангипаја. „То лафи тано чачипе“, вакерѓа о Иса ки молитва (Јован 17:17).

Е Девлескоро Лафи сикавела аменге лескири мудрост

О Девел, исто аѓаар поможинела кеда иси амен проблемија. „Фрде то пхарипе е Јеховаске, хем ов ка поможинел тут. Никогаш нане те мукхел о праведно мануш те сопкинел пе“ (Псалм 55:22). Ов простинела амаре гревија. Ко е Девлескоро Лафи пишинела: „Ту, Јехова, сиан шукар хем спремно сиан те простине, бари тани ти милост спрема са околенде со родена ту“ (Псалм 86:5). О Девел нудинела аменге вечно џивдипе. Ов ветинела кај „ка косел секоја асвин таро [е манушенгере] јакхја, хем мерибе нане те овел, ни жалибе, ни ројбе, ни дукха“ (Откровение 21:4). Дали ка ирана леске башо лескоро мангипа? Ка сикава ли кај амен да мангаја ле?

Те ова паше е Девлеа

Ка ова попаше е Девлеа ако молинаја амен хем размислинаја лескере особиненге

О Девел мангела шукар те пенџара ле. Лескоро Лафи охрабринела амен: „Овен паше е Девлеа, хем ов ка овел паше туменцар“ (Јаков 4:8). О Девел вакерѓа е верно пекамбереске, е Ибрахимеске, кај тано ‚лескоро амал‘ (Исаија 41:8). О Јехова мангела ту да те ове лескоро амал.

Кобор побутер сикљоваја башо Девел, добором попаше ка ова леа хем ка ова побахтале. Ко е Девлескоро Лафи пишинела: „Бахтало тано о мануш“ кова со „уживинела ко е Јеховаскоро закон, читинела хем размислинела лескере законеске диве хем рат“ (Псалм 1:1, 2). Адалеске, понадари да те сикљова таро е Девлескоро Лафи. Те размислина лескере особиненге хем башо буќа со керела лен. Те сикава кај мангаја е Девле аѓаар со ка кера адава со сикљоваја, соске лескоро Лафи вакерела: „Те мангел пе е Девле значинела те икерен пе лескере заповедија, а лескере заповедија нане пхаре“ (1. Јованово 5:3). Адалеске, шукар тано те молина амен аѓаар сар со пишинела ко е Девлескоро Лафи: „Јехова, де ман те пенџарав те друмија, сикав ман те друменге. Сикав ман те џав ко то чачипе“ (Псалм 25:4, 5). Тегани ка дикха кај о Девел „нане дур никастар амендар“ (Дела 17:27).