Џа ко тексто

Џа ки содрежина

 54 ЛЕКЦИЈА

О Јехова сине стрпливо е Јонаја

О Јехова сине стрпливо е Јонаја

О мануша тари асирско диз Ниневија сине бут лошна. О Јехова вакерѓа пле пророкоске е Јонаске те џал ки Ниневија хем те вакерел ленге те на керен више лошна буќа. Ама, о Јона нашља хем гело ко јавер друмо. Уклило ко јекх броди кова со џала сине ко Тарсис хем нашља.

Џикоте о броди сине ко море, таро јекх пути почминѓа баро невреме, хем о морнарија бут дарандиле. Ола молинена пе сине пумаре девленге хем пучена пе сине: „Соске овела аменге акава?“ Ко крајо, о Јона вакерѓа ленге: „Ме сиум криво. Ме нашава таро адава со вакерѓа манге о Јехова те керав. Фрден ман ко море, хем и бура ка ачхол“. О морнарија на мангле те фрден е Јона ко море, ама ов сине упорно ко адава. Кеда фрдинѓе ле ко море, и бура ачхили.

О Јона мислинѓа кај ка мерел. Џикоте батинела сине са похор хем похор, ов молинела пе сине е Јеховаске. Тегани, о Јехова бичхалѓа јекхе баре мачхе. Глтинѓа е Јона, ама на мударѓа ле. Таро е мачхескоро воги о Јона молинѓа пе: „Ветинава кај ка керав са со ка вакере манге“. О Јехова керѓа о Јона те ачхол џивдо трин диве ко воги е мачхескоро, хем пало адава керѓа о мачхо те фрдел ле ки пхув.

Дали адава со о Јехова спасинѓа е Јона значинѓа кај ов на ваљани сине палем те џал ки Ниневија? На. О Јехова палем  пхенѓа е Јонаске те џал адари. Акава пути, о Јона шунѓа ле. Ов гело ки Ниневија хем е лошно манушенге вакерѓа: „Башо 40 диве, и Ниневија ка овел уништими“. Ама, тегани уло нешто со о Јона ни на мислинѓа кај ка овел, о мануша тари Ниневија шунѓе ле хем менинѓе пе. О цари тари Ниневија пхенѓа пле народоске: „Роден е Девле, хем кајнен тумен. Шај аѓаар нане те уништинел амен“. Кеда о Јехова дикхља кај о мануша кајнѓе пе, ов на уништинѓа и Ниневија.

О Јона бут хољанѓа со на уништинѓа о Јехова и диз. Замислин туке, о Јехова сине стрпливо хем милостиво спрема о Јона, а ов на сине милостиво спрема о мануша со живинена сине ки Ниневија. Наместо адава, гело аври тари диз хем хољамо бешља тели јекх сенка таро јекх дудум. Ама, о дудум шукило, хем о Јона бут хољанѓа. Адалеске о Јехова вакерѓа леске: „Туке тано повише жал башо јекх дудум, него башо мануша тари Ниневија. Ме простинѓум ленге, хем адалеске ола панда тане џивде“. Со мангља о Јехова акалеа те сикавел е Јона? Кај о мануша тари Ниневија врединена сине повише таро јекх дудум.

„О Јехова... тано стрпливо туменцар соске на мангела никој те овел уништимо, него мангела сарине те кајнен пе“ (2. Петрово 3:9)