Џа ко тексто

Џа ки содрежина

 29 ЛЕКЦИЈА

О Јехова биринѓа е Исус Навине

О Јехова биринѓа е Исус Навине

О Мојсеј бершенцар водинѓа е Израелцон, ама акана пхурило хем ало џи ко крајо таро пло живото. О Јехова пхенѓа леске: „Ту нане те кхуве е Израелцонцар ки Ветими пхув. Ама, ка мукхав тут те дикхе ла“. Пало адава, о Мојсеј родинѓа таро Јехова те биринел нево водачи со ка водинел е народо. О Јехова вакерѓа леске: „Џа ко Исус Навин хем вакер леске кај ов ка овел о нево водачи“.

О Мојсеј вакерѓа е народоске кај панда хари ка мерел хем кај о Јехова биринѓа о Исус Навин те водинел лен џи ки Ветими пхув. Пало адава, о Мојсеј вакерѓа е Исус Навинеске: „Ма дара. О Јехова ка поможинел тут“. Пало несаво време, о Мојсеј уклило ки планина Нево, хем адатхар о Јехова сикавѓа леске и Ветими пхув со ветинѓа ла е Авраамеске, е Исакоске хем е Јаковеске. О Мојсеј сине ле 120 берш кеда муло.

О Јехова вакерѓа е Исус Навинеске: „Накхен и река Јордан, хем кхувен ки пхув Ханаан. Ка поможинав тут исто сар со поможинѓум е Мојсеје. Секова диве читин мло Закони. Ма дара хем ов храбро. Џа хем кер адава со заповединава туке“.

 О Исус Навин бичхалѓа дуј шпиоња ки диз Ерихон. Ки јавер лекција ка дикха нешто повише башо адава со уло адари. Кеда иранѓе пе о шпиоња, ола вакерѓе кај о народо шај те џал те освојнел и пхув Ханаан. Тајсутно диве, о Исус Навин вакерѓа е Израелцонге те кхеден пле шаторија хем те циден. Тегани ола мукхле прво е свештеникон со ингарена сине о ковчег башо сојуз те џан ки река Јордан. И река сине ла бут пани. Ама, само со чхивѓе по про о свештеникија ко пани, о пани шукило! Тегани о свештеникија геле ки средина тари река со шукили хем адари терѓовена сине са џикоте о Израелција на накхле ки јавер страна. Со мислинеа, дали акава чудо сетинкерѓа лен ко чудо со керѓа ле о Јехова ко Црвено Море?

Пало несаве берша, о Израелција конечно ресле ки Ветими пхув. Адатхе ваљани сине те керен песке кхера хем дизја. Шај сине те овел лен ниве, хем те садинен зеленчук хем овошје. Адаја пхув сине добором шукар со о мануша сине лен бут шуже буќа хајбаске хем пијбаске. Адалеске лаке вакерела пе кај тани пхув коте со тхавдела сине авгин хем тхуд.

„О Јехова секогаш ка водинел тут хем ка чаљарел ти душа чак ки шуки пхув“ (Исаија 58:11)