Џа ко тексто

Џа ки содрежина

 95 ЛЕКЦИЈА

Ништо нашти сине те чхинавел лен

Ништо нашти сине те чхинавел лен

Јекх мануш со нашти сине те пхирел, секова диве мангела песке сине англи порта е храмескири. Јекх диве палоручко, ов дикхља е Петаре хем е Јоване сар кхувена ко храми. Ов вакерѓа ленге: „Молинава тумен ден ман нешто паре“. О Петар одговоринѓа: „Паре нане ман, ама иси ман те дав тут нешто пошукар. Ко анав е Исусескоро, ушти хем пхир!“ О Петар поможинѓа леске те уштел, хем о мануш почминѓа те пхирел. О мануша со дикхле акава чудо сине воодушевиме хем бут џене уле ученикија.

Ама о свештеникија хем о садукеија бут хољанѓе. Ола астарѓе е апостолен, ингарѓе лен англо Судско совет, хем пучле лен: „Кој денѓа тумен сила те сасљарен акале мануше?“ О Петар одговоринѓа: „И сила добинѓем таро Исус Христос, коле со мударѓен ле“. О верска водачија почминѓе те викинен: „Ма керен више лафи башо Исус!“ Ама, о апостолија вакерѓе: „Амен мора те кера лафи баши лесте. Нане те откажина амен“.

Кеда о Петар хем о Јован сине ослободиме, геле ко јавера ученикија те вакерен ленге со уло. Ола заедно молинѓе пе: „Јехова, молинаја тут де амен храброст те шај те кера и задача со денѓан амен“. О Јехова денѓа лен свети дух хем ола понадари да проповединена сине хем сасљарена сине. Са повише хем повише мануша овена сине ученикија. О садукеија сине добором љубоморна со астарѓе е апостолен хем пханле лен. Ама, раќате о Јехова бичхалѓа јекхе ангеле кова со пхравѓа о удар таро затвор хем вакерѓа е апостоленге: „Џан палем ко храми хем сикавен е манушен!“

Рано сабајле, о стражарија але ко Судско совет хем вакерѓе ленге: „О затвор тано пханло, ама о мануша со сине пханле нане адатхе! Ола тане ко храми хем сикавена е манушен!“ Тегани палем астарѓе лен хем ингарѓе лен англо судо.  О првосвештенико вакерѓа ленге: „Нели вакерѓем туменге те на керен лафи башо Исус?“ Ама, о Петар одговоринѓа: „Мора те шуна е Девле амаре владетеле, а на е манушен“.

О верска водачија сине бут хољаме хем мангена сине те мударен е апостолен. Ама, јекх фарисеи, о Гамалиел, уштило хем вакерѓа: „Ма сиѓарен! Шај о Девел тано акале манушенцар. Мангена ли те боринен тумен против о Девел?“ Ола шунѓе ле. Англедер те мукхен лен, марѓе лен каштенцар хем палем вакерѓе ленге те на проповединен. Ама, акава на чхинавѓа е апостолен те проповединен. Ола понадари да храбро вакерена сине е јаверенге башо шукар хабери — хем ко храми хем таро кхер ко кхер.

„Мора повише те шуна е Девле, него е манушен“ (Дела 5:29)