Џа ко тексто

Џа ки содрежина

 98 ЛЕКЦИЈА

Мануша таро бут нацие уле христијања

Мануша таро бут нацие уле христијања

О апостолија шунѓе и заповед е Исусескири те проповединен о шукар хабери ки цели Пхув. Ко 47 берш а.е., о пхраља бичхалѓе е Павле хем е Варнава ко проповедничко патување. Ола сине бут ревна хем џана сине те проповединен ки цело Мала Азија сар сој ки Дерва, ки Листра хем ки Иконија.

О Павле хем о Варнава проповединена сине са е манушенге — е чороленге хем е барваленге, е терненге хем е пхуренге. Бут џене прифатинѓе о чачипе башо Христос. Кеда о Павле хем о Варнава проповединѓе е управителеске таро Кипар, о Сергиј Павле, јекх магионичари мангља те чхинавел лен. Ама, о Павле вакерѓа леске: „О Јехова ка казнинел тут“. Ко адава моменти, о магионичари королило. Кеда дикхља адава о управители, уло следбенико е Исусескоро.

О Павле хем о Варнава проповединѓе сегде — таро кхер ко кхер, ко пазарија, ко друмија хем ко синагоге. Кеда сасљарѓе ки Листра јекхе мануше со сине сакати, о мануша со дикхле адава чудо мислинѓе кај ола тане девела, хем мангле те обожавинен лен. Ама, о Павле хем о Варнава на мукхле лен те керен адава хем вакерѓе ленге: „Ваљани те служинен само е Девлеске! Амен сием само мануша“. Тегани але несаве Евреија хем керѓе о народо те овел против о Павле. О мануша фрдинѓе леске баренцар, влечинѓе ле аври тари диз хем мукхле ле мислиндор кај тано муло. Ама, ов сине џивдо! О пхраља одма але те поможинен леске хем ингарѓе ле ки диз. Покасно, о Павле иранѓа пе ки Антиохија.

Ко 49 берш а.е., о Павле гело ко панда јекх патување. Откеда иранѓа пе ки Мала Азија те дикхел е пхрален, проповединѓа башо шукар хабери панда подур, ки Европа. Ов гело ки Атина, ко Ефес, ко Филипи, ко Солун хем ко јавера тхана. Ко акава патување, е Павлеа гело о Сила, о Лука  хем јекх терно чхаво, о Тимотеј. Ола керѓе неве собранија хем поможинѓе е пхраленге те ачховен зорале. О Павле ачхило ко Коринт јекх текваш берш хем охрабринела сине е пхрален. Ов проповединѓа, сикавѓа хем пишинѓа писмија џи ко несаве собранија. Ко исто време, керела сине бути да, керела сине шаторија. Покасно о Павле иранѓа пе ки Антиохија.

Ко 52 берш а.е., о Павле гело ко трито патување. Почминѓа тари Мала Азија, хем патујнела сине ко север са џи ко Филипи, хем пало адава хулило теле ко Коринт. О Павле ачхило некобор берш ко Ефес, хем адатхе сикавела сине, сасљарела сине хем поможинела сине е пхраленге. Исто аѓаар, секова диве икерела сине говорија ки јекх школа. Бут мануша шунена ле сине хем менинѓе пе. Ко крајо, откеда проповединѓа о шукар хабери ко бут пхувја, о Павле иранѓа пе ко Ерусалим.

„Адалеске џан хем керен ученикија таро мануша таро са о народија“ (Матеј 28:19)