Џа ко тексто

Џа ки содрежина

 89 ЛЕКЦИЈА

О Петар вакерѓа кај на пенџарела е Исусе

О Петар вакерѓа кај на пенџарела е Исусе

Кеда о Исус сине пле апостоленцар ки упруни соба, ов вакерѓа ленге: „Сарине тумен ка мукхен ман ерат“. О Петар вакерѓа: „Ме нане те мукхав тут! Чак сарине те џан песке, ме никогаш нане те керав адава“. Ама о Исус вакерѓа леске: „Англедер о башно те гиљавел, ту трин пути ка вакере кај на пенџареа ман“.

Пало адава, кеда о војникија ингарѓе е Исусе ко е Кајафаскоро кхер, повише таро апостолија нашле. Ама, дуј џене лендар слединена ле сине заедно е јавере манушенцар тари група. Јекх лендар сине о Петар. Ов гело ко е Кајафаскоро кхер хем таќола сине узи јаг. Ама, јекх слугинка дикхља ле хем вакерѓа: „Џанава кој сиан ту! Ту сиан сине е Исусеа!“

О Петар одговоринѓа: „Нане аѓаар! На џанава башо со кереа лафи!“ Пало адава цидинѓа пе кај и порта. Ама, јекх јавер слугинка вакерѓа е манушенге: „Акава мануш сине е Исусеа!“ О Петар вакерѓа: „Ме ни на пенџарава е Исусе!“ Тегани јекх мануш вакерѓа: „Ту да сиан ленцар! Таро адава сар кереа лафи дикхјола пе кај сиан тари Галилеја, сар о Исус“. Ама, о Петар палем вакерѓа: „На, на пенџарава ле!“

Ко адава моменти гиљавѓа о башно. О Исус иранѓа пе хем дикхља е Петаре ко јакхја. Тегани о Петар сетинѓа пе ко лафија е Исусескере, иклило аври хем силно рунѓа.

Ко адава моменти, о членија таро Судско совет кхединѓе пе ко е Кајафаскоро кхер те судинен е Исусеске. Ола више сине решиме те мударен е Исусе, ама ваљани сине те аракхен нешто колеа ка керен ле криво. Адалеске со нашти сине те аракхен ништо против лесте, о Кајафа пучља ле: „Дали сиан е Девлескоро Чхаво?“ О Исус одговоринѓа леске: „Оја“. Тегани о Кајафа вакерѓа: „На ваљани аменге јавера доказија. Коркори шунѓен, наврединѓа е Девле!“ О членија таро судо согласинѓе пе: „Акава мануш мора  те мерел“. Ола почминѓе те кхувен ле шамаркенцар хем те чхунгарен ле. На само адава, пханле о јакхја лескере, кхувена ле сине хем пхенена сине: „Ако сиан пророко, вакер кој кхувѓа тут!“

Кеда пхравдило о диве, ингарѓе е Исусе ки сала ко Судско совет хем палем пучле ле: „Дали сиан е Девлескоро Чхаво?“ О Исус пхенѓа ленге: „Тумен коркори пхенена кај сиум“. Тегани вакерѓе кај тано криво соске наврединѓа е Девле хем ингарѓе ле ки палата е римско управителескири о Понтиј Пилат. Со уло пало адава? Ајде те дикха.

„О саати... више ало кеда ка џан туменге секој ко пло кхер, хем ка мукхен ман коркоро. Ама ме на сиум коркоро, соске о Дад тано манцар“ (Јован 16:32)