Џа ко тексто

Џа ки содрежина

 71 ЛЕКЦИЈА

О Јехова заштитинѓа е Исусе

О Јехова заштитинѓа е Исусе

Ки јекх пхув ко источно Израел живинена сине мануша кола со верујнена сине кај о ѕвезде шај те водинен лен. Јекх рат, некобор мануша таро Исток дикхле нешто со личинела сине сар сјајно ѕвезда со движинела пе ко небо хем почминѓе те џан пали лате. И „ѕвезда“ ингарѓа лен ко Ерусалим. Ола пучле е манушен: „Кај тано о чхаво со ка овел цари е Евреенге? Алем те поклонина амен леске“.

Кеда о Ирод, о цари со сине ко Ерусалим, шунѓа башо нево цари, бут сине секиримо. Ов пучља е главна свештеникон: „Коте ваљани те бијанѓовел акава цари?“ Ола вакерѓе леске: „О пророкија пишинѓе кај ка бијанѓовел ко Витлеем“. Тегани о Ирод викинѓа некобор манушен таро Исток хем вакерѓа ленге: „Џан ко Витлеем хем аракхен адале чхаве“. Иранен тумен хем вакерен манге кај тано. Мангава ме да те џав те поклонинав ман леске. Ама, адава сине ховајбе.

И „ѕвезда“ почминѓа те движинел пе. О мануша џана сине пали лате са џи ко Витлеем. И „ѕвезда“ ачхили упро јекх кхер хем о мануша кхувѓе андре ко кхер. Ола аракхле андре е Исусе пе даја, е Маријаја. Ола поклонинѓе пе е чхавеске хем денѓе ле поклонија таро злато, темјан хем смирна. Дали о Јехова бичхалѓа акале манушен те аракхен е Исусе? На.

Адаја рат, о Јехова вакерѓа е Јосифеске ко суно: „О Ирод мангела те мударел е Исусе. Ле те ромња хем те чхаве хем нашен ко Египет. Ачхов адари са џикоте на вакерава туке те иране тут. О Јосиф хем лескири фамилија одма геле ко Египет.

О Јехова вакерѓа е манушенге таро Исток те на иранен пе ко Ирод. Кеда о Ирод дикхља кај на иранѓе пе, бут хољанѓа. Адалеске со нашти сине те аракхел е Исусе, денѓа заповед са о мурша чхаве сој ко Витлеем хем тане врсникија е Исусеа, те овен мударде. Ама, о Исус сине спасимо, сине дур, ко Египет.

 Пало несаво време, о Ирод муло. О Јехова пхенѓа е Јосифеске: „Акана шај те иране тут“. О Јосиф, и Марија хем о Исус иранѓе пе ко Израел, хем живинена сине ки диз Назарет.

„Аѓаар мло лафи со икљола таро мло муј ка исполнинел пе... ка керел адава колеске со бичхалѓум ле“ (Исаија 55:11)