Џа ко тексто

Џа ки содрежина

 63 ЛЕКЦИЈА

Лафија пишиме ко ѕидо

Лафија пишиме ко ѕидо

Сар со накхела сине о време, о Валтазар уло цари ко Вавилон. Јекх рат, ов викинѓа ки јекх бари гозба е најважна манушен таро цело царство. Ов нарединѓа пле слугенге те анен о златна чаше со леља лен о Навуходоносор таро е Јеховаскоро храми. О Валтазар хем лескере гостија пиена сине таро адала чаше хем славинена сине пумаре девлен. Таро јекх пути, појавинѓа пе манушикано вас хем почминѓа те пишинел чудна лафија ко ѕидо.

О Валтазар бут дарандило. Ов викинѓа пе магионичарен хем ветинѓа ленге: „Ако некој тумендар вакерела манге со значинена акала лафија, ка керав ле те овел о трито најмоќно мануш ко Вавилон“. Ола трудинѓе пе те објаснинен о лафија, ама ни јекх лендар нашти сине те керел адава. Али и царица хем вакерѓа леске: „Иси јекх мануш со викинела пе Даниел, ов објаснинела сине о буќа е Навуходоносореске. Ов шај те објаснинел туке да со значинена акала лафија“.

О Даниел ало ко цари. О Валтазар вакерѓа леске: „Ако шај те читине хем те објаснине манге акала лафија, ка дав тут јекх златно ланцо хем ка керав тут те ове о трито најмоќно мануш ко Вавилон“. О Даниел пхенѓа леске: „На мангава те де ман ништо, ама ка вакерав туке со значинена акала лафија. Тло дад, о Навуходоносор, сине бут гордо, ама о Јехова керѓа ле те овел понизно. Ту џанеа са башо адава, а палем пиеа таро златна чаше таро е Девлескоро храми. Адалеске о Девел вакерела акала лафија: МЕНЕ, МЕНЕ, ТЕКЕЛ хем ФАРСИН. Акала лафија значинена кај о Медијција хем о Персијција ка освојнен о Вавилон, а ту нане те ове више цари“.

Ко адава време, о мануша мислинена сине кај о Вавилон нашти никој те освојнел ле. Акаја диз сине заштитими баре ѕидонцар хем околу лате сине хор река. Ама,  ки исто рат, о Медијција хем о Персијција нападинѓе о Вавилон. О Персиско цари, о Кир, керѓа и река те тхавдел ки јавер страна хем аѓаар о војникија шај сине те ресен џи ко е дизјакере порте. Кеда и војска ресља џи ко порте, ола сине пхравде! И војска кхувѓа ки диз, освојнѓа о Вавилон, хем мударѓе е царе. Тегани о Кир уло цари ко Вавилон.

Панда ко прво берш, о Кир објавинѓа: „О Јехова вакерѓа манге те обновинав лескоро храми ко Ерусалим. Сарине со служинена е Јеховаске, шај те џан адари хем те поможинен ако мангена“. Сар со ветинѓа о Јехова, бут Евреија иранѓе пе ко Ерусалим, пало 70 берш откеда сине уништими акаја диз. Дали дикхеа сар о Јехова користинѓа е Кире те шај те поможинел пле народо?

„Пело о Баро Вавилон, хем уло тхан коте со живинена о демонија“ (Откровение 18:2)