Џа ко тексто

Џа ки содрежина

 СТАТИЈА ПРОУЧИБАСКЕ 22

Ов пошукар ко проучибе!

Ов пошукар ко проучибе!

Проценинен сој тано најважно (ФИЛ. 1:10)

ГИЛИ 35 Те хаљова сој најважно

БАШО СО КА КЕРА ЛАФИ *

1. Соске несаве пхраленге хем пхењенге тано пхаро те проучинен?

АВДИВЕ бут мануша мора те керен бут бути те шај те издржинен пе. Бут пхраља керена бут саатија бути само те шај те грижинен пе башо пле фамилијакере основна потребе. А јавера трошинена бут време секова диве те шај те ресен ки бути хем те иранен пе кхере. Бут џене грижинена пе баши пли фамилија аѓаар со керена пхари физичко бути. Ама ко крајо таро диве, акала буќарне пхраља хем пхења тане бут уморна! Последно нешто со би мангена те керен тано те проучинен.

2. Кеда ту аракхеа време те проучине?

2 Ама, факти тано кај мора те аракха време те проучина е Девлескоро Лафи хем амаре публикацие. Бизо адава нашти те ова паше е Јеховаја хем те добина вечно живото! (1. Тим. 4:15, 16). Несаве уштена рано сабајле секова диве те шај те проучинен соске тегани тано најмирно ко ленгоро кхер хем ола тане свежа. Јавера одвојнена некобор минутија ко крајо таро диве те шај ко мир те проучинен нешто тари Библија хем таро амаре публикацие.

3-4. Саве промене сине керде ки количина е духовно хранакири со добинаја ла, хем соске?

3 Сигурно ка вакере кај тано важно те аракхе време проучибаске. Ама, со ваљани те проучина? Шај ка вакере: „Иси амен добором бут читибаске, со нашти те ресав са те читинав“. Несаве успејнена те читинен са о публикацие хем те дикхен са о видеоклипија со добинаја лен, ама буте пхраленге хем пхењенге тано пхаро те аракхен време те керен адава. О пхраља таро Водечко тело тане свесна башо акава. Тари адаја причина, англедер несаво време сине одлучимо те тикњарел пе  и количина тари духовно храна со добинаја ла ко печатимо хем ко електронско облик.

4 На пример, на печатинела пе више о Годишнико е Јеховаскере сведоконгоро соске бут охрабрувачка искуствија акана шај те аракхен пе ки амари интернет-страница jw.org® хем ко е масекоскере емисие ко JW Broadcasting®. Освен адава, о списанија Стражарско кула (издание баши јавност) хем Разбудете се! акана печатинена пе само трин пути ко берш. Акала промене на сине керде те шај те користина о време башо јавера активностија. И цел акале промененгири тани те овел амен повише време башо адава „сој тано најважно“ (Фил. 1:10). Акана ка дикха сар шај те проценина сој тано најважно хем сар шај те овел амен целосно корист таро проучибе е Библијакоро.

ЧХИВ О ПОВАЖНА БУЌА КО ПРВО ТХАН

5-6. Кола публикацие ваљани шукар те проучина лен?

5 Кеда одлучинаја со ка проучина, со ваљани те овел аменге ко прво тхан? Џанѓола пе, секова диве ваљани те одвојна време те проучина е Девлескоро Лафи. Ко распоред со иси амен читибаске и Библија секова курко акана тане денде похари поглавја те шај те овел амен повише време те размислина башо адава со читинаја хем додатно те истражина ко амаре публикацие. Амари цел на ваљани те овел само те читина о поглавја, него те мукха о хабери тари Библија те ресел џи ко амаре виле — а адава ка поможинел аменге те ова попаше е Јеховаја (Пс. 19:14).

6 Со јавер ваљани шукар те проучина? Џанѓола пе, мангаја те спремина амен башо Проучибе и Стражарско кула, башо Проучибе и Библија ки дворана хем башо јавер материјали таро состанок Амаро живото хем служба. Исто аѓаар, ваљани те читина секова број тари Стражарско кула хем Разбудете се!

7. Дали ваљани те обесхрабрина амен ако нашти те читина или те дикха са со икљола ки амари интернет-страница хем ко JW Broadcasting?

7 Шај ка вакере: „А со те кера са е статиенцар хем е видеоклипенцар со икљона ки интернет-страница jw.org, хем е материјалеа со икљола ко JW Broadcasting? Иси добором бут!“ Размислин баши акаја споредба: Ко несаве ресторантија спреминела пе шведско маса ки која со иси бут различна хем вкусна хајба. О гостија таро ресторани никогаш нашти те пробинен таро са. Адалеске пробинена само таро некобор хајба. Слично, ако нашти те ресе те читине са со икљола ко електронско облик, ма обесхрабрин тут. Читин статие хем дикх видеоклипија добором кобор со шај. Акана те дикха со значинела те проучина хем сар шај те овел амен најбари корист таро адава.

ВАЉАНИ ТРУДО ТЕ ШАЈ ТЕ ПРОУЧИНЕЛ ПЕ!

8. Кола буќа шај те кере кеда проучинеа и Стражарско кула, хем сар ка користинел туке ако спреминеа тут аѓаар?

8 Кеда проучинаја, концентриринаја амен ко адава со читинаја те шај те сикљова нешто важно. Нане проучибе ако само читинаја сигате о материјали хем ако обележинаја о одговорија. На пример, кеда спреминаја амен башо Проучибе и Стражарско кула, прво читинаја о дело „Башо со ка кера лафи“ кова со аракхљола ко почеток тари статија. Откеда ка кера адава, читинаја хем размислинаја башо наслов е статијакоро, башо поднасловија хем башо пучиба повторибаске. Пало адава, похари хем шукар читинаја и статија. Џикоте читинаја, ваљани те приметина и реченица која со вакерела аменге башо со керела лафи о пасус, а адаја тани обично и прво реченица. Џикоте читинаја и статија, ваљани те размислина башо адава сар секова пасус тано поврзимо е поднасловеа хем е главно темаја тари статија. Шукар  тано те бележина о лафија со на џанаја лен хем о буќа со мангаја повише те истражина лен.

9. а) Соске ваљани посебно те пазина ко библиска стихија кеда проучинаја и Стражарско кула, хем сар шај те кера адава? б) Сар со пишинела ко Исус Навин 1:8, со ваљани јавер те кера освен со ка читина о стихија?

9 Адава со проучинаја и Стражарско кула ко состанок, поможинела аменге те хаљова и Библија. Адалеске, шукар пазин ко библиска стихија, посебно ко адала со читинаја лен џикоте проучинаја и статија ко состанок. Приметин сар о главна лафија или изразија ко стихија тане поврзиме е главно мислаја ко пасус. Освен адава, џикоте читинеа, одвојн туке време те размислине башо стихија хем башо адава сар шај те применине лен ко тло живото. (Читин Исус Навин 1:8.)

О родителија ваљани те сикавен е чхавен сар те проучинен (Дикх о пасус 10) *

10. Спрема Евреите 5:14, соске ваљани о родителија ки Фамилијарно рат те сикавен пумаре чхавен сар те проучинен хем те истражинен?

10 Џанѓола пе, о родителија мангена ленгере чхаве те уживинен џикоте икерена и Фамилијарно рат е Јеховаске. Ама, иако е родителен секогаш ваљани те овел лен планиримо со ка проучинен ки Фамилијарно рат, ола на ваљани секова курко те организиринен несаве посебна проектија или активностија. Ки Фамилијарно рат шај заедно те дикхен е масекоскири емисија таро JW Broadcasting или понекогаш те керен бути ко несаво посебно проекти, на пример, те керен макета тари е Ноескири арка. Ама, исто аѓаар важно тано о родителија те сикавен пумаре чхавен сар те проучинен. На пример, ваљани те сикљовен сар те спреминен пе башо состанокија или сар те истражинен башо несаво пучибе со пучле лен ки школа. (Читин Евреите 5:14.) Ако одвојнена песке време те проучинен кхере, ка овел ленге полокхе те шунен и програма ко состанокија хем ко конгресија чак кеда нане видеоклипи. Џанѓола пе, кобор време ка проучинел о родители е чхавеа зависинела тари лескири возраст хем таро адава саво тано о чхаво.

11. Соске тано важно те сикава амаре интересентен хор те проучинен?

11 Амаре интересентија да ваљани те сикљовен сар те проучинен. Кеда ка почминен те проучинен и Библија, амен сием бахтале ако спреминена пе башо библиско курси или башо состанокија адалеа со ка обележинен о одговорија. Ама ваљани те сикава лен сар те истражинен хем сар хор те проучинен кеда тане коркори. Аѓаар, кеда ка овен лен проблемија, наместо одма те роден помош таро јавера ко собрание, ола ка џанен сар коркори те истражинен ко амаре публикацие  хем те аракхен практична советија баши ленгири ситуација.

НЕКА ОВЕЛ ТУТ ЦЕЛ КЕДА ПРОУЧИНЕА

12. Кола целија шај те овен амен кеда проучинаја?

12 Ако сиан мануш со на мангела те проучинел, шај мислинеа туке кај никогаш ка нашти те уживине ко адава. Ама ов сигурно кај шај! Почмин аѓаар со ко почеток кратко ка проучине хем пало адава хари по хари бајрар о време проучибаске. Размислин башо адава која тани тли цел кеда проучинеа. Јекх цел шај те овел те аракхе одговор ко пучибе со некој пучља тут или те истражине башо несаво проблеми со иси тут. Џанѓола пе, и најважно цел соске проучинаја ваљани те овел те ова панда попаше е Јеховаја.

13. а) Вакер со шај те керел некој те шај те објаснинел пле верувања е соучениконге. б) Сар шај те применине о совет таро Колошаните 4:6?

13 Дали сиан терно мануш со џала ки школа? Шај са тле соученикија славинена роденденија. Шај мангеа те објаснине ленге тари Библија соске ту на славинеа, ама шај мислинеа туке кај нашти те кере адава. Со ваљани те кере? Шај те истражине башо адава! Џикоте кереа адава, тли цел ваљани те овел: 1) ту те ове поуверимо кај о Јехова на мангела те славинен пе роденденија хем 2) те сикљове пошукар те објаснине соске верујнеа ко адава (Рим. 1:20; 1. Пет. 3:15). Прво шај те пуче тут: „Таро кола причине мле соученикија славинена роденденија?“ Пало адава, шукар истражин баши адаја тема ко амаре публикацие. Шај ка дикхе кај те објаснине ко со верујнеа нане добором пхаро сар со мислинѓан туке. Бут мануша славинена роденденија соске мислинена кај сарине керена адава. Ако аракхеа само јекх или дуј информацие баши акаја тема хем вакереа лен тле соучениконге, шај ка поможине некаске со искрено мангела те џанел о чачипе. (Читин Колошаните 4:6.)

БАЈРАР ТЛИ ЖЕЛБА ПРОУЧИБАСКЕ

14-16. а) Со шај те кере те шај те сикљове нешто повише башо несаво библиско лил колеске со на џанеа бут? б) Објаснин сар о стихија сој денде шај те поможинен туке пошукар те хаљове о лил Амос. (Дикх и рамка „ Пенџар пошукар е манушен тари Библија“.)

14 Замислин туке кај ко несаво состанок ваљани те керел пе лафи башо јекх таро тикне пророчка лила сој ки Библија, колеске со шај на џанеа бут. Прво бути со шај ка ваљани те кере тани те бајраре ки туте желба те џане нешто повише башо адава пророко. Сар шај те кере адава?

15 Најангле пуч тут: „Со џанава башо писатели таро акава лил? Кој сине ов, кај живинела сине, со бути керела сине?“ Кеда ка џане нешто повише башо писатели, ка шај пошукар те хаљове соске користинѓа несаве лафија или споредбе. Џикоте читинеа и Библија, приметин о лафија кола со ка поможинен туке те хаљове саво мануш сине о писатели.

16 Пало адава, шај те истражине кеда сине пишимо о лил. Адава шај локхе те проверине ко додаток „Табела на библиските книги“ кова со аракхљовела ко крајо таро Свето писмо — превод Нов свет. Исто аѓаар, ки брошурка Да ја истражуваме Божјата Реч, 14-17 страна, шај те дикхе и табела колате сој пишиме о пророкија хем о царија. О библиско лил со проучинеа ле тано пророчко, адалеске ка овел шукар те дознајне сар живинена сине о мануша ко време кеда сине пишимо адава лил. Кола лошна ставија или постапке е манушенгере ваљани сине те испрајнел адава пророко? Кој живинѓа ко исто време леа? Те шај те овел тут целосно слика, шај ка ваљани те истражине јавера да лила тари Библија. На пример, те шај пошукар те хаљове со случинѓа пе кеда живинела сине о пророко  о Амос, ка овел шукар те читине о стихија таро лила 2. Царевите хем 2. Летописи, кола сој чхивде ко маргине башо Амос 1:1. * Освен адава, шај те дикхе о библиско лил башо о пророко о Осија, кова со шај живинѓа ко исто време е Амосеа. Са акала информацие ка поможинен туке пошукар те хаљове саво сине о живото ко време кеда живинела сине о Амос (2. Цар. 14:25-28; 2. Лет. 26:1-15; Оси. 1:1-11; Амос 1:1).

ИСТРАЖИН О ДЕТАЛИЈА

17-18. Вакер несаво пример таро пасусија или несаво тло пример те шај те објаснине сар адава со ка истражина о деталија со на дикхјовена добором важна ка поможинел аменге повише те уживина џикоте проучинаја и Библија.

17 Кеда читинаја и Библија, шукар тано те овел амен силно желба те џана со шај повише. На пример, замислин кај читинеа о 12 поглавје таро лил Захарија, кова со пророкујнела о мерибе е Месијаскоро (Зах. 12:10). Кеда ка ресе џи ко 12 стихо, ка читине кај „и фамилија е Натанескере кхерескири“ ка ровел хем ка овел бут тажно кеда о Месија ка мерел. Наместо сигате те накхе преку акава детали, шај те ачхове хем те пуче тут: „Сар тане поврзиме о кхер е Натанескоро хем о Месија? Дали шај те аракхав повише информацие башо адава?“ Слично сар јекх детективи, шај те почмине похор те истражине. Ако дикхеа ко маргине, прво стихо тано 2. Самоилова 5:14, коте со шај те дикхе кај о Натан сине јекх таро е Давидескере чхаве. О дујто стихо ко маргине, Лука 3:31, откринела кај о Исус ало директно таро Натан, кастар со али и Марија. * Таро јекх пути, овела туке са поинтересно! Џанеа кај башо Исус сине пророкујмо кај ка авел таро Давид (Мат. 22:42). Ама е Давиде сине ле повише таро 20 чхаве. Чаче воодушевинела амен адава со о Захарија  откринела кај баш е Натанескоро кхер сине ле причина те жалинел башо е Исусескоро мерибе.

18 Те дикха панда јекх пример. Ко прво поглавје таро Лука, читинаја кај о ангели о Гавриел гело ки Марија хем вакерѓа лаке нешто бут важно поврзимо е чхавеа со ваљани сине те бијанел ле: „Ов ка овел баро хем ка викинен ле Чхаво е Најбарескоро. О Јехова о Девел ка дел ле о престол лескере дадескоро е Давидескоро, хем ов вечно ка владинел сар Цари ко кхер е Јаковескоро“ (Лука 1:32, 33). Шај бут пути концентриринеа тут само ки прво бути со вакерѓа ла о Гавриел — кај о Исус ка овел викимо „Чхаво е Најбарескоро“. Ама о Гавриел исто аѓаар пророкујнѓа кај о Исус ка овел Цари. Адалеске шај пучаја амен со мислинѓа песке и Марија кеда шунѓа акала лафија. Дали мислинѓа кај о Гавриел вакерѓа кај о Исус ка овел владетели ко Израел аѓаар со ка заменинел е царе е Ироде или некас таро лескере наследникија? Ако о Исус чаче овела сине цари, и Марија ка добинел сине посебно чест сар дај е царескири, а лакири фамилија ка живинел сине ки царско палата. Ама, нигде ки Библија на пишинела кај и Марија вакерѓа нешто асавко е Гавриелеске. На пишинела ни кај и Марија родинѓа несаво посебно тхан ко Царство, сар со керѓе дуј ученикија е Исусескере (Мат. 20:20-23). Акава детали панда повише уверинела амен кај и Марија сине бут понизно џувли!

19-20. Спрема Јаков 1:22-25 хем 4:8, кола тане амаре целија кеда проучинаја?

19 Секогаш ваљани те овел амен ки годи кај амари најважно цел џикоте проучинаја е Девлескоро Лафи хем амаре публикацие тани те ова попаше е Јеховаја. Исто аѓаар, мангаја пошукар те дикха саве мануша сием хем саве промене ваљани те кера те шај те кера е Девлескири волја. (Читин Јаков 1:22-25; 4:8.) Адалеске, секова пути кеда ка почмина те проучина ваљани те молина е Јехова те дел амен свети дух. Ваљани те молина ле те поможинел аменге те овел амен со побари корист таро материјали хем јасно те дикха саве промене ваљани те кера.

20 Те трудина амен сарине те ова сар о верно слуга е Девлескоро колеске со о псалмисти вакерѓа: „Уживинела ко закони е Јеховаскоро, читинела хем размислинела лескере законеске диве хем рат... ко са со керела, ка овел успешно“ (Пс. 1:2, 3).

ГИЛИ 127 Саво мануш ваљани те овав

^ пас. 5 О Јехова дарежливо дела амен бут духовно храна. Иси амен бут публикацие читибаске хем проучибаске ко печатимо или ко електронско облик, исто аѓаар иси амен бут видеоклипија. Акаја статија ка поможинел аменге те одлучина со те проучина хем ка дел амен практична предлогија кола со ка поможинен аменге те овел амен најбари корист таро амаро проучибе.

^ пас. 16 О маргине аракхљовена ки колона сој ко машкар ко странице таро Превод Нов свет. Ки адаја колона тане денде библиска стихија сој тане поврзиме е стихонцар со читинеа лен.

^ пас. 63 ОБЈАСНИМИ СЛИКА: О родителија сикавена пумаре чхавен сар те спреминен пе башо Проучибе и Стражарско кула.

^ пас. 65 ОБЈАСНИМИ СЛИКА: Јекх пхрал истражинела башо пророко о Амос. О слике палал сикавена кај о пхрал замислинела песке о буќа коленге со читинела ки Библија.