Џа ко тексто

Џа ки содрежина

 ИСКУСТВО

Аракхлем јекх скапоцено бисери

Аракхлем јекх скапоцено бисери

О ВИНСТОН хем и Памела Пејн служинена ки подружница Австралазија. Сине лен бахтало живото, ама исто аѓаар сине лен пхарипа. На пример, мора сине те прилагодинен пе ко јавера културе. Освен адава, сине ленге бут пхаро кеда и Памела нашавѓа пле бебе со панда на бијандило. Ама, иако случинѓа пе са адава, ола понадари да мангена е Јехова хем лескере народо хем тане бахтале ки служба. Ко акава интервју ка вакерен аменге несаве таро ленгере искуствија.

Винстон, вакер аменге сар ту почминѓан те роде о чачипе башо Девел.

Бариљум ки јекх фарма ко Квинсленд (Австралија). Амари фамилија на сине религиозно. Адалеске со живинаја сине ко изолиримо тхан, на сине ман бут контакт јавере манушенцар. Кеда сине ман 12 берш, почминѓум те родав о чачипе башо Девел. Молинава ман сине те поможинел манге те џанав о чачипе баши лесте. Пало несаво време мукхљум и фарма хем аракхљум бути ко Аделејд (Јужно Австралија). Кеда сине ман 21 берш, џикоте сиум сине ко одмор ко Сиднеј запознајнѓум е Памела. Ој вакерела манге сине баши јекх Британско-израелско религиозно група кола со вакерена кај о Британција авена таро, сар со викинена лен ола, нашавде племија таро Израел. Спрема адаја група, акала племија тане о деш племија таро северно царство кола со сине ингарде ко ропство ко офтото веко англедер амари ера. Адалеске, кеда иранѓум ман ко Аделејд, керава сине лафи баши акаја тема јекхе колегаја кова со почминѓа те проучинел и Библија е Јеховаскере сведоконцар. Откеда керѓем лафи само некобор саатија — повише башо адава ко со верујнена о Сведокија — халиљум кај сине одговоримо ки мли молитва со молинѓум ман кеда сиум сине тикно. Аѓаар почминѓум те сикљовав о чачипе башо мло Створители хем башо лескоро Царство! Аракхљум о скапоцено бисери (Мат. 13:45, 46).

Памела, ту да почминѓан те роде адава бисери ко терне берша. Сар аракхљан ле?

Бариљум ки религиозно фамилија ки диз Кофс Харбор (Нево Јужно Велс). Мо дад, ми дај хем лакере родителија почминѓе те верујнен ко адава со сикавела и Британско-израелско група. Ме, мо потикно пхрал, ми побари пхен, хем бут таро мле братучетија, сием сине сикавде те верујна кај о  Девел посебно мангела е манушен со иси лен британско потекло. Ама, ме на сложинава ман сине адалеа, хем на осетинава ман сине паше е Девлеа. Кеда сине ман 14 берш, џава сине ко разна цркве, сар сој и Англиканско, и Баптистичко хем и Адвентистичко црква. Ама ола на поможинѓе манге те запознајнав е Девле.

Мли фамилија покасно селинѓа пе ко Сиднеј, коте со запознајнѓум е Винстоне, кова со адари сине ко одмор. Сар со вакерѓа ов, адава со кераја сине лафи баши религија керѓа те почминел те проучинел е Сведоконцар. Оттегани, о писмија со бичхалела лен сине манге сине пхерде библиска стихонцар! Мора те признајнав, ко почеток сиум сине секирими, чак хољанава леске сине. Ама, сар накхела сине о време халиљум кај адава тано о чачипе башо Девел.

Ко 1962 берш, селинѓум ман ки диз Аделејд те шај те овав попаше узо Винстон. Ов организиринѓа те бешав ко Томас хем ки Џенис Слоуман — јекх брачно пари Сведокија кола со служинѓе сар мисионерија ки Папуа Нова Гвинеја. Тегани сине ман само 18 берш. Ола бут грижинена пе сине манге хем бут поможинѓе манге те џанав повише башо Јехова. Пало несаво време ме да почминѓум те проучинав е Девлескоро Лафи хем башо кратко време уверинѓум ман кај аракхљум о чачипе. Откеда о Винстон хем ме венчинѓем амен, одма почминѓем полновремено службаја. Иако сине амен пхарипа, и служба е Јеховаске анѓа аменге бут берекетија хем поможинѓа аменге панда повише те ценина о скапоцено бисери со аракхлем ле.

Винстон, вакер аменге нешто повише башо прва берша тари тли служба башо Јехова.

А. Мапа ки која сој сикавдо амаро патујбе ки покраинско служба

Б. Поштенска марке таро несаве островија. О Кирибати хем о Тувалу англедер сине пенџарде сар Гилбертова хем Елисова Островија

В. О бут шужо корално остров Фунафути ко Тувалу. Јекх таро бут островија со посетинѓем лен англедер адари те овен бичхалде мисионерија

Кратко откеда лелем амен е Памелаја, о Јехова почминѓа те дел амен посебна задаче ки служба (1. Кор. 16:9). Јекх асавки задача сине и пионерско служба. О пхрал о Џек Портер, кова со сине покраинско надгледнико хем лескири ромни и Рослин, поттикнинѓе амен те почмина акале службаја. (О пхрал о Џек акана служинела сар члени ко Одбор е подружницакоро Австралазија.) Панџ берш служинѓем сар општа пионерија. Кеда сине ман 29 берш, сием сине замолиме те служина ки покраинско служба ко островија ко јужно дело таро Тихи океан, башо кола со тегани грижинела пе сине и подружница ко Фиџи. Адала островија тане: Американско Самоа, Самоа, Кирибати, Науру, Ниуе, Токелау, Тонга, Тувалу хем Вануату.

Ко адава време, о мануша со живинена сине ко несаве дур островија на сине лен доверба ко е Јеховаскере сведокија. Адалеске мора сине те пазина хем те ова прониклива (Мат. 10:16). О собранија сине тикне, а несаве лендар нашти сине те обезбединен аменге тхан сојбаске. Адалеске пучаја сине е манушен таро гава дали шај те сова ки ленде. Ола сине шукар спрема аменде хем мукхена амен сине те сова ки ленде.

Винстон, ту бут интересинеа тут башо преведибе. Сар почминѓан те интересине тут башо адава?

Ки Самоа, сар инструктори ки школа башо старешине

Ко адава време, о пхраља со живинена сине ки Тонга сине лен само некобор трактатија хем брошурке ки тонганско чхиб, јекх таро полинезиска чхибја. Ки служба користинена сине о лил Чачипе кова со ингарела ко вечно живото ки англиско чхиб те шај те проучинен е манушенцар. Адалеске, џикоте сине и школа башо старешине која со трајнела сине штар курке, трин локална старешине кола со иако на џанена сине шукар и англиско чхиб, сложинѓе пе те превединен акава лил ки тонганско чхиб. И Памела куцинѓа о тексти таро лил ки машина башо пишибе, хем бичхалѓем ле печатибаске ки подружница ко САД. Цело проекти трајнѓа околу офто курке. Иако о квалитети таро превод на сине најшукар, акаја публикација поможинѓа буте манушенге со керена лафи ки тонганско чхиб те дознајнен башо чачипе. Ме хем и Памела на сием преведувачија, ама акава искуство бајрарѓа ки аменде интерес баши акаја бути.

Памела, сар разликујнела пе сине о живото ко островија таро живото ки Австралија?

Кеда сием сине ки покраинско служба акава сине јекх таро тхана коте со соваја сине

Сине бут поразлично! Ко несаве тхана сине амен разна пхарипа: комарција, баро татипе хем влажност, стаорција, насвалипе, а понекогаш на сине амен доволно хајбаске. Тари јавер страна, ко крајо таро секова диве, уживинаја сине со шај сине те дикха о океани тари амари фале — самоанско анав башо типично полинезиско кхер  кова со сине ле крови тари пус хем на сине ле ѕидија. Понекогаш, раќате, и месечина добором бут светинела сине со шај сине те дикха о палме е кокосенцар хем шај сине е месечинакири светлина те дикхел пе ко океани. Асавке бут шуже моментија поттикнинѓе амен хор те размислина башо Јехова хем те молина амен леске. Адава поможинела аменге сине те на мислина ко негативна, него ко позитивна буќа.

Бут заманглем е чхавен, кола со сине бут интересна хем бут сине ленге чудно кеда ка дикхен сине парне манушен. Џикоте сием сине ки посета ко Ниуе, јекх чхаво галинѓа о балале васта е Винстонескере хем вакерѓа: „Бут свиџинена пе манге тле пердувија“. Дикхјола пе кај никогаш англедер на дикхља добором балале васта хем на џанела сине сар те опишинел лен!

Бут мануша адари живинена сине ко лошна условија, адалеске сине аменге жал башо адава. Сине лен бут шужи околина, ама на сине лен шукар здравствено грижа хем на сине лен доволно чисто пани пијбаске. Ама, амаре пхраља на секиринена пе сине бут башо адава. Ола сиклиле ко асавко живото. Сине бахтале со сине пле фамилијаја, со сине лен тхан коте со шај сине те обожавинен е Јехова хем те служинен леске. Лендар сиклилем те концентририна амен ко адава сој најважно хем те овел амен едноставно живото.

Памела, ту вакерѓан аменге кај понекогаш мора сине те ле пани таро бунари хем те спремине хајбаске ко неве условија. Сар успејнѓан ко адава?

Ки Тонга, и Памела тховела амаре шеја

Башо адава мора те благодаринав ме дадеске. Ов сикавѓа ман бут корисна буќа, на пример, сар те тхарав јаг хем те готвинав ки лате. Сикавѓа ман сар те икљовав ко крајо кеда иси ман хари материјална буќа. Џикоте сием сине ки посета ко Кирибати, бешаја сине ко јекх тикно кхер со сине ле крови тари пус, ѕидија таро бамбус хем поди таро коралија. Ки адаја прилика, те шај те керав јекх едноставно хајбе, ранљум јекх дупка јагаке хем тхарѓум јаг е лушпенцар таро кокос. Те шај те овел амен пани, аџикерава сине редо ко јекх бунари заедно јавере џувленцар таро адава тхан. Икалена сине пани јекхе каштеа кова со сине дугачко околу дуј метре колесте со сине пханло сано шело, слично сар јекх трска мачхенге. Ама, наместо те пханден јадица ко крајо таро шело, ола пхандена сине кофа. Јекх по јекх, секоја ромни фрдела сине о шело хем ко право моменти сигате влечинела ле сине. И кофа вртинела пе сине ки страна хем пхерѓола сине пани. Мислинѓум кај адава тано едноставно — са џикоте на ало мло редо. Мукхљум о шело некобор пути, и кофа перела сине ко пани ама на пхерѓола сине пани! Откеда сарине асандиле манге, јекх ромни нудинѓа пе те поможинел манге. О мануша таро адава тхан секогаш сине спремна те поможинен аменге.

О солдуј џене мангена сине и служба ко островија. Шај ли те вакерен аменге несаве шуже искуствија?

Винстон: Ваљани аменге сине време те шај те запознајна несаве обичаија. На пример, кеда викинена амен сине ко хајбе, о пхраља икалена сине са со сине лен. Ко почеток, на халилем кај ваљани те мукха ленге да нешто хајбаске. Адалеске хаја сине са о хајбе со сине англи аменде! Ама, кеда халилем саво тано ленгоро обичај, мукхаја сине хајбе ленге да. Иако кераја сине асавке грешке, о пхраља хаљовена амен сине. Исто аѓаар, сине бут бахтале кеда пало шов масек палем посетинаја лен сине. Освен о пхраља таро адава тхан, амен сием сине о единствена Сведокија таро јавер тхан кас со дикхле џи тегани.

Ко остров Ниуе, водинава група проповедибаске

Исто аѓаар, амаре посете дена сине шукар сведоштво е манушенге ки околина. Бут таро мануша со живинена сине адатхе, на верујнена сине е пхраленге таро адава тхан кај тане дело тари несави меѓународно организација. Адалеске, кеда ме хем и Памела џаја сине те посетина е пхрален, о мануша хаљовена сине кај чаче постојнела амари организација хем кај грижинела пе башо секова јекх сој дело латар. О мануша сине бут воодушевиме.

Памела: Јекх таро најшуже искуствија случинѓа пе манге ко Кирибати, коте со сине собрание таро само некобор пхраља хем пхења. Сине само јекх старешина, о Стинаки Матера, кова со денѓа пестар са те шај те грижинел пе аменге. Јекх диве ало ки аменде јекхе корпаја колате со сине  само јекх јаро. Ов вакерѓа: „Акава тано туменге!“ Ко адава време бут ретко шај сине те ха јаре тари кхани. Адава тикно, ама љубезно гести, бут погодинѓа амен.

Памела, некобор берш пало адава нашавѓан е бебе кова со панда на бијандило. Со поможинѓа туке те накхе адава пхаро периоди?

Ачхиљум кхамни ко 1973 берш. Ко адава време е Винстонеа сием сине ко островија ко јужно дело таро Тихи Океан. Одлучинѓем те ирана амен ки Австралија, коте со штар масек пало адава нашавѓум е бебе. Солдуј џене сием сине бут тажна. Сар со накхела сине о време, и дукх ко мло вило тикњола сине, ама на накхља целосно са џикоте на добинѓем и Стражарско кула таро 15 април 2009 берш. Ки рубрика „Пучиба таро читателија“ сине одговоримо ко пучибе: „Иси ли надеж те воскреснинел о бебе со муло ки матка е дајакири?“ И статија уверинѓа амен кај о Јехова ка одлучинел со ка керел башо адава хем кај ов секогаш керела адава сој исправно. О Јехова ка сасљарел са амаре ране со керѓа аменге акава свето кеда преку пло Чхаво ка „уништинел о буќа со керѓа лен о Бенг“ (1. Јов. 3:8). Исто аѓаар, акаја статија поможинѓа аменге панда повише те ценина о скапоцено „бисери“ со иси амен сар е Јеховаскере слуге! Кобор бут утешинѓа амен и надеж башо е Девлескоро Царство!

Откеда нашавѓем амаре бебе, палем почминѓем е полновремено службаја. Некобор масекија служинѓем ко Бетел ки Австралија хем пало адава продолжинѓем е покраинско службаја. Ко 1981 берш, откеда штар берш служинѓем ко Сиднеј хем ко гава ко Нево Јужно Велс, сием сине викиме те служина ки подружница, коте со панда служинаја.

Винстон, дали о искуство со добинѓан ле ко островија поможинѓа туке ки служба сар члени ко Одбор е подружницакоро Австралазија?

Оја, ко некобор начинија. Прво, и Австралија сине замолими те грижинел пе баши Американско Самоа хем Самоа. Пало адава, и подружница ко Нов Зеланд сине спојми е подружницаја ки Австралија. Акана, ко подрачје е подружницакоро Австралазија перена и Австралија, Американско Самоа хем Самоа, Источно Тимор, Куковите Острови, Ниуе, Нов Зеланд, Токелау хем Тонга — а бут лендар сине ман прилика те посетинав лен сар претставнико е подружницакоро. Адава со англедер соработинава сине е верна пхраленцар хем пхењенцар таро островија бут поможинела манге џикоте служинава ки подружница.

Ме хем и Памела ки подружница Австралазија

Ко крајо шај те вакерав кај ме хем и Памела одамна халилем, таро амаро искуство, кај е Девле на родена само о возрасна. О терне да родена адава скапоцено „бисери“ — чак кеда о јавера тари фамилија на интересинена пе (2. Цар. 5:2, 3; 2. Лет. 34:1-3). Шај те ова сигурна кај о Јехова тано Девел кова со грижинела пе хем мангела сарине, терне хем пхуре, те добинен вечно живото!

Англедер повише таро 50 берш, ме хем и Памела почминѓем те рода е Девле. Тегани, нашти сине те замислина аменге саво живото ка анел аменге адава! Чаче тано скапоцено бисери о чачипе башо е Девлескоро Царство! Одлучна сием са амаре силенцар те задржина акава скапоцено бисери!