So phenel e Biblija

 O smirom pre phuv na dochudena o manuša, aľe o Del peskere kraľišagoha. Andre kada kraľišagos hin o Kraľis Ježiš Kristus. O dživipen tel kada kraľišagos ela igen šukar. Dikhen, so pes pal oda pisinel andre Biblija.

1.   O Del kerela avka, hoj preačhena o maribena pal caľi phuv. Avka pes ačhena leskere lava: „pre phuv mi el o smirom le manušen, pre save ov dikhel lačhes.“ (Žalm 46:9; Lukaš 2:14)

2.   Le Devleskero kraľišagos vladňinela andal o ňebos pre phuv. (Daňjel 7:14) Adaďives but narodi džan pre peste ča vašoda, bo peske mišľinen, hoj hine feder sar aver. Andro Devleskero kraľišagos dživaha savore jekhetane tel jekh vlada pre caľi phuv. Vašoda imar ňiko na dikhela pre peste, hoj hino vareso buter sar aver.

3.   Andre le Devleskero kraľišagos hino Kraľis o Ježiš. Pal leste hin phendo, hoj ela „o vladcas, savo anel o smirom“. Ov kerela savoro predal oda, kaj o smirom ňigda te na preačhel. (Izajaš 9:6, 7)

4.   O manuša, save kamena dureder te ľidžal o maribena, našťi dživena andro Devleskero kraľišagos. Bo o Del nanavidzinel ajsen, so rado džan pre avrende. (Žalm 11:5; Prislovja 2:22)

5.   O Del imar akana sikhľarel peskere manušen sar te dživel andro smirom. E Biblija phenel, ke soste oda ľidžal: „Prekerena peskere šabľi pro pluhi a peskere ošťepi pro vinarska čura. O ľudos na lela e šabľa pre aver ľudos a imar ňiko na sikhľola sar pes te marel.“ (Izajaš 2:3, 4)

 Imar akana milijoni Jehovaskere svedki pal calo svetos sikhľon le Devlestar sar te presikavel o smirom. (Matuš 5:9) Vašoda, choč dživas andro buter sar 230 phuva a sam všelijaka manuša, na kamas te džal jekh avres te murdarel.