So pal ada phenel e Biblija

 O Del amenge diňa e slobodno voľa. Oda hin lestar šukar, bo šaj peske korkore kidas avri, so keraha. Nane dino avri anglal, so pes amenge ačhela. Aňi o Del na kidel avri, so amenca ela. Pregenen tumenge, so pal ada pisinel e Biblija.

•   O Del amen kerďa avka, hoj peske šaj kidas avri, so keraha a so na. Amen na sam sar o zvjerata. O zvjerata nane kerde avka, hoj peske korkore kiden avri, so kerena, aľe keren oda, so len hin andro inštinkt. Aľe amen sam kerde avka, hoj amen hin ajsi isto natura sar le Devles. (1. Mojžišovo 1:26) Vaš oda avka sar o Del, džanas te presikavel ajse vlastnosťi sar o kamiben abo spravodľivosť. A tiš amen diňa slobodno voľa.

•   But olestar, so peske amen korkore kidas avri abo so keras, ľidžal ke oda so amenca ela. O Del kamel, kaj peske te kidas avri mištes. E Biblija pisinel: „Vašoda tumenge kiden avri o dživipen... šunen leskro hangos.“ (5. Mojžišovo 30:19, 20, Sveto Biblija) O Del bi amenge ada na phendžahas, te bi amen na diňahas slobodno voľa. Oda bi lestar na uľahas šukar. O Del amen na ispidel andre ňisoste. Šukares amenge phenel: „Te ča tuke iľalas mire prikazaňja andro jilo, tiro smirom uľahas sar o paňi.“ (Izajaš 48:18, Sveto Biblija)

•   Oda, či vareso džala avri abo na, nane anglal dino. Te kamas, kaj amenge vareso te džal avri, ta pes mušinas te snažinel. E Biblija phenel: „Savoro, so šaj keres tire vasteha, ker caľa tira zoraha.“ (Kazaťeľ 9:10, Sveto Biblija) Tiš phenel: „Oles, ko hino bučakro, ela savoro pherdo.“ (Prislovja 21:5, Sveto Biblija)

 E slobodno voľa hiňi šukar daros. Avka šaj le Devleske sikavas, hoj les kamas bo korkore peske oda kidňam avri a ňiko amen andre oda na ispidel. (Matuš 22:37)

Na kerel savoro o Del?

 Na. Andre Biblija pes pisinel pal oda, hoj o Del hino nekzoraleder. Oda znameňinel, hoj ňiko leske na zabraňinela, te vareso kamela te kerel. (Job 37:23; Izajaš 40:26) Aľe the te les hin ajsi zor, hoj šaj kerel sa pal peskero, na kerel oda. Napriklad akor sar o Babilon džalas pre leskero ľudos, o Del pes zľikerelas a na kerďa lenge ňič. (Izajaš 42:14) Tiš adaďives o Del mukhel avka te o manuša keren namištes. Aľe na mukhela oda avka pro furt. (Žalm 37:10, 11)