So pal ada phenel e Biblija

 Ha. Kala lava andal e Biblija tumenge šaj pomožinen, kaj te džanen te džal avri le lovenca the te varekaske mušinen te visarel pale love:

1.   Keren tumenge planos, so kerena le lovenca. „Te vareko tumendar kamela te kerel veža, či peske peršo na bešela a na zgenela, či les hin dos love pre kada, kaj la te dokerel?“ (Lukaš 14:28) Keren tumenge rozpočtos. Rachinen keci love tumen hin, so tumenge kampel te poťinel a keci tumenge ačhela pre oda so kamen. Na džan takoj vareso te cinel ča vaš oda, bo e cena geľa tele, te tumenge oda na kampel.

2.   Ma len kečeň, te na mušinen. „Te varekaske kames love, sal leskro otrokos.“ (Prislovja 22:7, Sveto Biblija) Te imar kamen varekaske o love a na san hodna te poťinel avka sar sanas dothode, skušinen tumen te dothovel varesar inakšeder, kaj tumenge oda te avel avri. E Biblija phenel: „Dža a igen tut leske mang... ma de te sovel tire jakhenge a ma dža te pašľol, medik leha na vakereha!“ (Prislovja 6:1–5, Sveto Biblija) Te peršovar oda na avela avri, buterval mangen ole manušes, kaj tumen te dothoven.

3.   Ma thoven o love pro peršo than. „O hamišno manuš denašel pal o barvaľipen, aňi na džanel, hoj pre leste avela o čoripen.“ (Prislovja 28:22, Sveto Biblija) Kana o manuš izdral pal o love abo zaviďinel avrenge o barvaľipen, akor šaj našavel mek buter love a tiš šaj thovel le Devles pre sera.

4.   Aven spokojna oleha, so tumen hin. „Vaš oda te amen hin so te chal a so te urel, avas oleha spokojna.“ (1. Timotejoske 6:8) O radišagos pes na del te cinel vaš o love. Aňi o barvaľipen na anel manušeske smirom. Andro svetos hin but manuša, saven nane but love, aľe the avka hine bachtale. Ala manuša hine bachtale, bo maškar lende hin kamiben, hin len lačhe kamarata a hine lačhe le Devleha. (Prislovja 15:17; 1. Peter 5:6, 7)