So pal ada phenel e Biblija

 O Ježiš zachraňinďa le vernone manušen avka, hoj vaš lenge poťinďa peskere dživipnaha. (Matuš 20:28) Vaš oda e Biblija phenel hoj o Ježiš „zachraňinel o svetos.“ (1. Jan 4:14) Mek phenel: „Ňiko aver amen našťi zachraňinel, ča ov. Bo o Del imar ňisave aver manušeske pre phuv na diňa ajso menos, prekal savo amen šaj zachraňinel.“ (Skutki 4:12)

 O Ježiš ‚muľa vaš dojekh manuš‘ savo andre leste paťal. (Hebrejenge 2:9; Jan 3:16) Paľis le Ježiš o Del „uštaďa andal o meriben“ a ov geľa pale andro ňebos sar duchos. (Skutki 3:15) Vaš oda „šaj zachraňinel olen, save pes andre leskero menos modľinen ko Del, bo ov hino džido a mangel le Devles, kaj lenge te pomožinel.“ (Hebrejenge 7:25)

Soske kampel kaj o Ježiš te mangel vaš amenge?

 Amen savore keras bini. (Rimanenge 3:23) O binos kerel hoj o manuš nane lačho le Devleha, a vaš oda o manuš mušinel te merel. (Rimanenge 6:23) Aľe o Ježiš „amenge pomožinel“ kaj te avas lačhe le Devleha. Ča mušinas te sikavel, hoj paťas oleske hoj ov amen cinďa avri. (1. Jan 2:1) O Ježiš poťinďa vaš amare bini peskere dživipnaha. Vaš oda hino hodno te mangel le Devles, kaj te šunel amare modľitbi a kaj amenge te odmukhel amare bini. (Matuš 1:21; Rimanenge 8:34) O Del šunel avri le Ježiš te vaš amenge mangel, bo o Del amenge kamel te odmukhel. Ov korkoro bičhaďa le Ježiš pre phuv „kaj cez leste o svetos te zachraňinel.“ (Jan 3:17)

Stačinel te paťal andro Ježiš, kaj te avas zachraňimen?

 Na. Te kamas te el zachraňimen, kampel te paťal andro Ježiš, aľe nane oda savoro. (Skutki 16:30, 31) E Biblija phenel: „Avka sar o ťelos našťi dživel, te andre leste nane o dživipen avka the o paťaviben bijo skutki na mol ňič.“ (Jakub 2:26) So amenge kampel te kerel?

•   Te sikhľol pal o Ježiš the pal leskero Dad Jehovas. (Jan 17:3)

•   Te bararel amaro paťaviben andre lende. (Jan 12:44; 14:1)

•   Te sikavel hoj paťas, oleha hoj keras oda so o Del the o Ježiš kamen. (Lukaš 6:46; 1. Jan 2:17) O Ježiš phenďa, hoj te kamas te el zachraňimen ta na stačinel te phenel hoj ov hino amaro Raj. Phenďa, hoj kampel te „kerel oda, so kamel [leskero] Dad, savo hino andro ňebos.“ (Matuš 7:21)

•   Dureder avka te kerel, the te oda nane lokes. Pal ada o Ježiš phenďa: „Ko ľikerela avri dži andro agor, ela zachraňimen.“ (Matuš 24:13)