Ľikeras pes olestar, so pisinel e Biblija. O Del phenel, hoj o rom la romňaha pes na majinen te rozveďinel a majinen te dživel jekhetane. Andre Biblija pes tiš pisinel, hoj o rom la romňaha pes šaj rozveďinen ča akor, te jekh lendar kerďa lubipen. (Matuš 19:5, 6, 9)

Pomožinen le Jehovaskere svedki le romeske the la romňake, so nane peha lačhe?

 Ha, šaj pomožinen avka:

•   O publikaciji. Hin amen kňižki, časopisi, članki the videji, save šaj pomožinen le romeske the la romňake, a oda the ajsenge, save peske mišľinen, hoj lenge imar ňič na pomožinela. Šaj tumenge dikhen o članki „Čo pomôže zachovať vernosť manželskému sľubu“, „Viete odpúšťať?“ the „Ako obnoviť dôveru“.

•   O zhromažďeňa. Hin amen zborova zhromažďeňa the zjazdi. Odoj vakeras, sar majinen e romňi le romeha te dživel pal oda, sar pisinel e Biblija.

•   O phuredera. Zborova phuredera pomožinen la romňake the le romeske avka, hoj lenge leperen o verši, sar napriklad Efezanenge 5:22–25.

Te vareko kamel te del rozvod, mušinel te phučel le zborove phurederendar?

 Choč o rom la romňaha mangen rada le zborove phurederendar, o phuredera andro zboros lenge našťi phenen, so majinen te kerel. (Galaťanenge 6:5) A te pes o rom la romňaha rozveďinen, aľe ňiko lendar na kerďa lubipen, aňi jekh lendar pes našťi solacharel avreha. (1. Timotejoske 3:1, 5, 12)

Sar o svedki dikhen pre oda, te o rom la romňaha hine solacharde, aľe na dživen peha?

 E Biblija phenel, hoj feder te o rom la romňaha ačhen peha, choč oda nane lokes. (1. Korinťanenge 7:10–16) But problemi pes den te virješinel, te pes modľinen, keren avka, sar phenel e Biblija a sikaven kamiben jekh avreske. (1. Korinťanenge 13:4–8; Galaťanenge 5:22)

 The avka varesave kresťana džan pestar het a na dživen peha, choč hine solacharde. Kada keren, te pes ačhel vareso baro, napriklad:

•   Te pes jekh pal aver na starinel, choč len pre ada hin. (1. Timotejoske 5:8)

•   Te jekh avres igen marel. (Žalm 11:5)

•   Kerel vareso predal oda, kaj te na el o rom abo e romňi lačhi le Devleha. Napriklad o rom abo e romňi ispidel pro svedkos, kaj te na šunel le Devleskere zakoni. Akor o svedkos pes šaj rozhodňinel, hoj džala te bešel het le romestar abo la romňatar. Avka kerel pal oda, so pes pisinel andre Biblija, hoj „le Devles mušinas te šunel buter sar le manušen.“ (Skutki 5:29)