„Na preačheha te vakerel pal adi kňižka le Zakonoskeri a geneha tuke la ciche hlasoha ďivese the raťi, kaj te doľikeres sa, so hin andre pisimen avka sar oda kampel. Paľis tuke andro dživipen džala mištes a kereha goďaverones.“

(Jozua 1:8)

„Genenas zorales andal e kňižka, andal o Zakonos le čačikane Devleskero. Višvetľinenas les avka, kaj oleske te achaľon a vakerenas, so znameňinen ola lava, so hine andre. Avka le manušenge pomožinenas, kaj te achaľon oleske, so pes genelas.“

(Nehemijaš 8:8)

„Bachtalo hino murš, savo na kerel pal oda, so leske phenel o nalačho manuš, ... aľe saveske hin andro jilo le Jehovaskero zakonos a genel peske les ciche hlasoha ďivese the raťi ... A darinel pes leske andre savoreste, so kerel.“

(Žalm 1:1–3)

„O Filip prastanďiľa ko verdan a šunďa sar peske o evnuchos zorales genelas koda, so pisinďa o prorokos Izajaš. Phučľa lestar: ‚Achaľos oleske, so genes?‘ Ov leske phenďa: ‚Sar šaj kaleske achaľuvav, te man ňiko na sikavel?‘“

(Skutki 8:30, 31)

„Le Devles našťi dikhas. Aľe imar akorestar sar sas kerdo o svetos, o manuša šaj sprindžarde leskeri zor, savi hiňi pro furt a hoj čačes hino Del, bo oda šaj dikhen olestar, so kerďa. Vaš oda našťi phenen, hoj pes na del te paťal andro Del.“

(Rimanenge 1:20)

„Rozmišľin pal ada savoro. Le tuke ada ko jilo, kaj sako te dikhel, hoj odi buťi, savi keres predal o Del, keres furt feder the feder.“

(1. Timotejoske 4:15)

„Rozmišľinen jekh pal aver, so predživen, kaj te presikavas buter kamiben a kaj te avas lačhe jekh ke avreste. A na mukhas avri amare zhromažďeňa.“

(Hebrejenge 10:24, 25)

„Te varekaske kampel, kaj te el goďaveder, mi mangel le Devles pal e goďi. Ov leske la dela, bo ov hino ke sakoneste šťiro a ňikaske oda na čhivkerel pro jakha.“

(Jakub 1:5)