Skutki – oda, so kerenas o apoštola 1:1-26
1 Lačho Teofil, andre peršo kňižka pisinďom pal savoreste so o Ježiš kerelas a so sikhľarelas,
2 dži oda ďives sar sas ilo andro ňebos. Anglal oda prekal o svato duchos phenďa le apoštolenge, saven peske kidňa avri, so majinen te kerel.
3 Pal oda sar peske o Ježiš cerpinďa avri e dukh, pes lenge 40 ďives sikavelas a vakerelas pal o Devleskero kraľišagos. A kavka šaj džanle, hoj čačes dživel.
4 Jekhvar, sar sas jekhetane, lenge o Ježiš phenďa: „Ma džan het andal o Jeruzalem, aľe užaren pre koda, sar miro Dad doľikerela peskero lav a pal soste tumenge vakeravas.
5 O Jan bolkerelas le paňeha, aľe tumen maj avena bolde le svatone duchoha.“
6 Sar pes zgele, phučle le Ježišostar: „Rajeja, kereha imar akana le Devleskeri vlada, kaj te vladňinel upral o Izrael?“
7 O Ježiš lenge phenďa: „Ča le Dades andro ňebos hin pre kada zor te phenel so a kana pes ačhela. A tumen olestar na mušinen te džanel.
8 A sar chudena o svato duchos, chudena the zor a vakerena pal mande andro Jeruzalem, andre caľi Judeja the Samarija dži pal caľi phuv.“
9 Sar ada dophenďa, o apoštola dikhle sar džalas andro ňebos. Zagaruďa les e chmara a paľis les imar na dičholas.
10 Medik* dikhenas pro ňebos sar džal het, ňisostar ňič pes paš lende sikade duj murša andro parno uraviben.
11 Kala murša phende: „Muršale andal e Galileja, so terďon a dikhen pro ňebos? O Ježiš, savo sas tumendar ilo andro ňebos, avela pale avka istones sar les dikhľan te džal andro ňebos.“
12 Paľis avle tele pal o Olivovo vrchos. Avle pale andro Jeruzalem, savo odarig na sas dur, asi ča jekh kilometros.*
13 Sar avle andro Jeruzalem, gele upre andro kher, kaj akor bešenas. Sas odoj o Peter, o Jan, o Jakub, o Andrej, o Filip, o Tomaš, o Bartolomej, o Matuš, le Alfeoskero čhavo o Jakub, o Šimon Horlivcos* the le Jakuboskero čhavo o Judaš.
14 Jekhetane pes zdžanas a na preačhenas pes te modľinel. Sas maškar lende the varesave romňija, le Ježišoskeri daj e Marija the le Ježišoskere phrala.
15 Jekh ďives pes avka zgele asi 120 phrala the pheňa. Akor ušťiľa o Peter a le phralenge phenďa:
16 „Phralale, kada, so sas pisimen andro Devleskero lav pal o Judaš, savo anďa olen, so phandle le Ježiš, pes mušinďa te ačhel. Bo pal kada anglal vakerelas o David, saves ľidžalas le Devleskero svato duchos.
17 O Judaš sas jekh amendar a služinelas avka sar the amen.
18 (Ov vaš kala love, savenca zraďinďa le Ježiš, cinďa e maľa. A sar peľa tele le šereha, čhinďiľa pro jepaš a avle andal leste avri savore goja.
19 Pal kada pes dodžanle savore manuša andro Jeruzalem. Vaš oda pes andre lengeri čhib kodi maľa vičinel Akeldama, abo e maľa cimen vaš o rat.)
20 Bo andro Žalmi hin pisimen: ‚Mi el zamukhlo leskero kher, kaj andre ňiko te na bešel,‘ a pre aver than hin pisimen: ‚Kodi buťi,* so kerelas, mi kerel vareko aver.‘
21 Vaš oda kampel pro Judašiskero than te kidel avri jekhes le muršendar, save amenca phirenas, sar mek sas o Raj o Ježiš amenca.
22 (Ole ďivesestar, sar les o Jan bolďa, dži oda ďives, sar sas amendar ilo andro ňebos.) A savo tiš amenca jekhetanes dikhľa pre peskere jakha sar sas o Ježiš uštado andal o meriben.“
23 Avka phende dujen: Le Jozef, saves vičinenas Barsabaš abo Justus, the le Maťej.
24 Paľis pes modľinenas: „Jehova,* tu džanes, so hin dojekhe manušeske andro jilo. Sikav amenge, kas kale duje muršendar tuke kidňal avri,
25 kaj te ačhel apoštolos. A kaj te kerel kodi buťi, savi o Judaš mukhľa, bo geľa peskere dromeha.“
26 Avka čhide o losos. Ov sikaďa pro Maťej. A akorestar imar sas maškar o 11 apoštola.
