Kada pisinďa o Lukaš 4:1-44

MUKH

O Beng pokušinel le Ježiš (1–13)
O Ježiš vakerel a lačhi sprava pal caľi Galileja (14, 15)
Andro Nazaret le Ježiš na prilen (16–30)
Andre sinagoga andro Kafarnaum (31–37)
Le Šimonoskeri sasuj the aver hine sasťarde (38–41)
But manuša džan pal o Ježiš (42–44)

4 Paľis o Ježiš geľa het khatar o paňi Jordan. O Del les diňa svato duchos. Oda duchos les ľidžalas pal e pušťa ² 40 ďives a odoj les pokušinelas o Beng. Sar pregele ola 40 ďives, bokhaľiľa avri, bo ňič na chaľa. ³ Akor leske o Beng phenďa: „Te sal le Devleskero čhavo, phen, kaj kale barestar te el o maro.“ ⁴ Aľe o Ježiš leske phenďa: „Hin pisimen: ‚O manuš na dživela ča le marestar.‘ “ ⁵ Paľis les iľa o Beng pro vrchos a sikaďa leske savore kraľišagi le svetoskere. ⁶ Phenďa leske: „Dava tuke savori zor the o barvaľipen, so hin kale kraľišagen. Bo mange kada sas dino a me len dav, kaske me kamav. ⁷ Te anglal ma banďoha a presikaveha mange e paťiv,* kada savoro ela tiro.“ ⁸ O Ježiš leske phenďa: „Hin pisimen: ‚Le Jehovaske,* tire Devleske, presikaveha e paťiv a ča leske služineha.‘ “ ⁹ Paľis les iľa andro Jeruzalem a thoďa les pro nekbareder muros le chramoske. Phenďa leske: „Te sal le Devleskero čhavo, chuťi tele. ¹⁰ Bo hin pisimen: ‚Phenela peskere aňjelenge, kaj tut te ochraňinen,‘ ¹¹ a ‚on tut lena pro vasta, kaj te na demes o pindro andro bar‘.“ ¹² O Ježiš leske phenďa: „Hin pisimen: ‚Na skušineha le Jehovas,* tire Devles.‘ “ ¹³ Akor leske o Beng diňa smirom. Geľa lestar het a užarelas pro lačho časos, kana šaj avel pale les te pokušinel. ¹⁴ O Ježiš avľa pale andre Galileja a sas les le Devleskero duchos. Pal caľi odi phuv pes pal leste vakerelas, so savoro lačho kerel. ¹⁵ Sikhľarelas andro sinagogi a savore leske presikavenas e paťiv. ¹⁶ Paľis avľa andro Nazaret, odoj, kaj bariľa avri. Kavka sar les sas andro zvikos, geľa andro sabat andre sinagoga. Sar ušťiľa, kaj te genel andal o Devleskero lav, ¹⁷ dine leske o zvitkos, savo pisinďa o prorokos Izajaš. Phundraďa* o zvitkos a arakhľa o lava, kaj sas pisimen: ¹⁸ „Le Jehovaskero* duchos hino pre mande, bo man kidňa avri,* kaj te vakerav e lačhi sprava le čorenge. Bičhaďa man, kaj te vakerav olenge, so hine phandle andre, hoj ena premukhle. Olenge, so hine kore, hoj pale dikhena a andal o pharipen lava avri olen, so zadživen trapišagos. ¹⁹ A te vakerav pal o časos, kana pale o Jehovas* požehňinela le manušen.“ ²⁰ Pal kada phandľa o zvitkos, diňa les le služobňikoske a bešľa peske. Savore andre sinagoga pre leste zadikhle a užarenas, so kerela. ²¹ O Ježiš phenďa: „Adaďives pes ačhile o lava, save akana šunďan andal o Devleskero lav.“ ²² Savore les chudne te ašarel. Sas hotova le lavendar, save vakerelas, bo lenge lačhes pele pro jilo. Phenenas: „Nane ov le Jozefoskero čhavo?“ ²³ Phenďa lenge: „Isto pre ma phenena o lava, save pes vakeren ‚dochtorina, sasťar* tut korkoro‘ a phenena: ‚Šunďam, so pes ačhiľa andro Kafarnaum. Ker ada the adaj khere, kaj bariľal avri.‘ “ ²⁴ Dureder phenďa: „Phenav tumenge, hoj ňisave prorokos na prilena odoj, kaj bariľa avri. ²⁵ Paťan mange, sar andre Elijašoskere ďivesa trin berš the 6 čhon na delas brišind a andre caľi phuv sas bari bokh, andro Izrael sas but vdovi. ²⁶ Aľe o Elijaš na sas bičhado ke ňisavi lendar, ča ke vdova andre Sarepta andro Sidon. ²⁷ A akor, sar dživelas o prorokos Elizeus, sas andro Izrael but malomocna. Aľe aňi jekh lendar na sas sasťardo. Ča o Sirčanos Naman.“ ²⁸ Sar kada savore, so sas andre sinagoga šunde, sas igen choľamen. ²⁹ Ušťile a tradenas le Ježiš avri andal o foros. A vaš oda, hoj o foros sas pro vrchos, ile les pro agor le vrchoske a kamle les odarig te čhivel tele. ³⁰ Aľe o Ježiš pregeľa maškar lende a geľa het. ³¹ Geľa andro galilejsko foros Kafarnaum a dojekh sabat len odoj sikhľarelas. ³² O manuša ča denas avri o jakha olestar sar sikhľarelas. Bo oda, so vakerelas, sas le Devlestar. ³³ Andre sinagoga sas jekh manuš, andre savo sas nalačho demonos. Zorales vičinelas: ³⁴ „So amendar kames Ježiš Nazaretsko? Avľal, kaj amen te zňičines? Džanav, hoj tu sal koda svato, kas bičhaďa o Del.“ ³⁵ Aľe o Ježiš ole demonoske zorales phenďa: „Av čit a av andal leste avri!“ O demonos angle lengere jakha čhiďa ole manušeha andre phuv, avľa andal leste avri a ňič leske na kerďa. ³⁶ Savore ča dine avri o jakha a jekh avreske vakerenas: „Dikhen, savi zor hin andre leskere lava! Mek až o nalačhe demona šunen, so lenge phenel a on aven avri andal o manuša!“ ³⁷ Pal ada, so kerďa, pes dodžanle savore andre kodi phuv. ³⁸ Sar o Ježiš geľa het andal e sinagoga, geľa andro kher ko Šimon. Le Šimoniskera sasa sas bari horučka a mangenas les, kaj la te sasťarel. ³⁹ Avľa ke late pašeder a sasťarďa la andal e horučka. E romňi takoj ušťiľa a chudňa khatar* lende te kerel. ⁴⁰ Sar zapeľa o kham, o manuša anenas ko Ježiš savore nasvalen andal peskere khera. Ov pre dojekh thovelas o vasta a savoren sasťarelas. ⁴¹ Andal o butdžene avenas avri o demona a vičinenas: „Tu sal le Devleskero Čhavo!“ Aľe ov lenge zorales dophenelas a na domukhľa lenge te vakerel, bo on lačhes džanenas, hoj ov hino o Kristus. ⁴² Sar avelas avri o kham, o Ježiš geľa pre kajso than, kaj te el korkoro. Aľe o manuša les rodenas. A sar les arakhle, na kamle les te mukhel, kaj te džal het. ⁴³ Aľe o Ježiš lenge phenďa: „Mušinav te vakerel e lačhi sprava pal o Devleskero kraľišagos the andre aver fora, bo angle* kada man o Del bičhaďa.“ ⁴⁴ Phirelas pal o judska sinagogi a vakerelas e lačhi sprava.