Kada pisinďa o Lukaš 23:1-56
23 Paľis savore manuša, so odoj sas, ušťile a ľigende le Ježiš ko Pilat.
2 Odoj chudne pro Ježiš te kerel upre: „Avľam pre kada, hoj ada murš kerel bare problemi maškar amare manuša. Le manušenge phenel, kaj te na poťinen le cisariske o daňi. A pal peste vakerel, hoj hino Kristus the kraľis.“
3 O Pilat lestar phučľa: „Sal kraľis le Židengero?“ O Ježiš leske phenďa: „Korkoro oda phenes.“
4 Paľis o Pilat phenďa le bare rašajenge the le manušenge: „Na dikhav, hoj bi kada manuš kerelas vareso nalačho.“
5 Aľe on leske na denas smirom a vakerenas: „Oleha, so sikhľarel pal caľi Judeja, so chudňa te sikhľarel andre Galileja a so sikhľarel adaj, kerel, hoj o manuša na šunen le bare šeren.“
6 Sar ada o Pilat šunďa, phučľa či kada manuš hino andal e Galileja.
7 Sar avľa pre kada, hoj o Ježiš hino odarig, kaj vladňinel o Herodes, bičhaďa les ke leste. Bo andre ola ďivesa sas o Herodes* andro Jeruzalem.
8 Sar o Herodes dikhľa le Ježiš, sas igen rado. Imar čirla les kamelas te sprindžarel, bo but pal leste šunďa. A pre peskere jakha kamľa te dikhel varesavo Ježišoskero zazrakos.
9 O Herodes le Ježišostar but phučkerelas, aľe ov leske na phenelas ňič.
10 Andro bare rašaja the andre ola, so sikhľarenas andal o zakonos, igen taďolas a vakerenas pre leste oda, so na sas čačipen.
11 O Herodes peskere slugadženca paľis le Ježišoha kerenas sar rukoneha, asanas lestar, diňa pre leste te urel rajikano uraviben a bičhaďa les pale ko Pilat.
12 Angle* kada, so pes ačhiľa, o Herodes the o Pilat ačhile oda ďives peha lačhe. Aľe varekana džanas igen proťi peste.
13 O Pilat peske vičinďa bare rašajen, bare šeren the le manušen.
14 Phenďa lenge: „Anďan ke mande kale manušes, bo phenen, hoj maškar o manuša kerel bare problemi. Me les šunďom avri, the tumen oda šunďan, aľe na dikhav, hoj oda, so tumen pre leste phenen, hino čačipen.
15 A the o Herodes les amenge bičhaďa pale. Oda sikavel, hoj kada murš na kerďa ňič nalačho. Ňič kajso, vaš soske bi majinelas te merel.
16 Vaš oda les dava varesavo trestos a premukhava les.“
17 * ——
18 Aľe savore manuša kerenas igen bari vika: „Imar mi merel! Amen kamas le Barabaš!“
19 (Ov bešelas harešta,* bo andro foros kerďa vzbura a paš oda varekas murdarďa.)
20 O Pilat pale chudňa le manušenge te vakerel, bo kamľa te premukhel le Ježiš.
21 Aľe on chudne zorales te vičinel: „Pro drukos leha! Pro drukos leha!“
22 O Pilat ke lende prevakerďa imar tritovar: „Soske? So nalačho kerďa? Na kerďa ňič, vaš soske bi majinelas te merel. Dava les trestos a premukhava les.“
23 Aľe on leske kaleha na dine smirom. Andre bari vika vičinenas, kaj les te del te primarel pro drukos. Vaš oda, hoj sas sar ruva,*
24 o Pilat peske phenďa, hoj kerela oda, so lestar kamen.
25 Premukhľa lenge oles, saves on kamenas. Oles, savo bešelas harešta vaš oda, hoj kerďa vzbura a varekas murdarďa. Aľe le Ježiš diňa te murdarel, avka sar on kamle.
26 Sar le Ježiš ľidžanas het, ile jekhe muršes le Šimon andal e Kirena, savo avelas pal o gav. Phende leske, kaj te džal pal o Ježiš a kaj te ľidžal o drukos,* pre savo majinďa o Ježiš te merel.
27 Pal o Ježiš džanas igen but manuša. Sas maškar lende the o džuvľija, save pes andre bari žaľa marenas andro koľin a igen pal leste rovenas.
28 O Ježiš pes ke lende visarďa a phenďa lenge: „Čhajale andal o Jeruzalem, ma roven pal mande! Aľe sigeder roven pal tumende the pal tumare čhave.
29 Bo aven o ďivesa, sar o manuša phenena: ‚Ola romňa hine bachtale, save našťi ačhile khabne! Ola, save mek na džanen, so oda hin te pašľol tele* a te del te pijel!‘
30 Akor phenena le vrchenge: ‚Peren pre amende!‘ a le brehenge: ‚Garuven amen!‘
31 Te kada keren, medik* pro stromos hin šukar prajta, so pes ačhela, sar o stromos šuťola avri?“
32 Le Ježišoha ľidžanas pro meriben mek duje aver hareštancen.
33 Sar avle pre oda than, savo pes vičinel Lebka, le Ježiš primarde pro drukos maškar ala duj hareštanci. Jekh sas pal leskeri pravo sera a aver pal leskeri ľavo sera.
34 O Ježiš phenďa: „Dado, odmukh lenge, bo na džanen, so keren.“ Paľis čhide losos, ko so peske lela leskere uravibnastar.
35 O manuša odoj terďonas a dikhenas, so pes kerel. Aľe o bare šere lestar asanas a vakerenas: „Te avren džanelas te zachraňinel, ta so pes akana korkoro na zachraňinel? Te hino ov koda Kristus, saves bičhaďa o Del a saves peske kidňa avri.“*
36 Asanas lestar the o slugadža. Avenas ke leste, denas les te pijel šutľi mol*
37 a vakerenas: „Ta so tut na zachraňines, te sal koda kraľis le Židengero?“
38 Upral leskero šero pisinde: „Kada hino o kraľis le Židengero.“
39 Jekh olendar, savo sas primardo pro drukos paš leste, leske rakinelas: „Tu sal koda Kristus, na? Ta zachraňin tut the amen!“
40 Aľe oda aver leske dophenďa: „Oda čačes na daras le Devlestar? Sem the tut užarel oda, so les!
41 Amen, te cerpinas, ta hin vaš soske, bo kerahas nalačho. Aľe ov na kerďa ňič nalačho.“
42 Paľis phenďa: „Ježiš, leper tuke pre mande, sar aveha andre tiro kraľišagos.“
43 O Ježiš leske phenďa: „Adaďives tuke dav miro lav, aveha manca andro rajos.“
44 Pro dilos* avľa pre caľi phuv baro kaľipen a ľikerelas dži trine orendar palodilos,*
45 bo na dičholas o kham. A o zavesis andro chramos čhinďiľa pro duj kotora.
46 O Ježiš zorales zvičinďa: „Dado, miro dživipen dav andre tire vasta.“ Pal ala lava muľa.
47 O dvostojňikos, savo dikhľa, so pes ačhiľa, chudňa te ašarel le Devles. Phenďa: „Kada manuš čačes na kerďa ňič nalačho.“
48 Sar ola manuša, save avle te dikhel pre oda sar len murdarena, dikhle, so pes kerel, marenas pes andro koľin a paľis džanas khere.
49 Savore, so pes prindžarenas le Ježišoha, terďonas dureder. Sas maškar lende the ola romňija, save leha phirenas andre služba, sar geľa het andal e Galileja. Terďonas odoj a dikhenas.
50 Sas odoj jekh murš, savo pes vičinelas Jozef. Sas les baro lav pro židoviko nekbareder sudos. Sas lačho manuš a kerelas oda, so sas lačho andre Devleskere jakha.*
51 Sas andal o judsko foros Arimatija a užarelas le Devleskero kraľišagos. (Ov na hazdľa upre o vast a na kamelas, kaj te murdaren le Ježiš.)
52 Geľa pal o Pilat a pomangľa les, kaj leske te del le Ježišoskero ťelos.
53 Iľa leskero ťelos tele pal o drukos. Zapaťarďa les andro lačho pochtan* a thoďa les andre hrobka, savi sas kerďi andre skala. Andre kadi hrobka na sas mek ňiko parumen.
54 Sas ďives, sar pes pripravinelas o sabat.
55 Pal o Jozef gele o romňija, save avle andal e Galileja le Ježišoha. Gele te dikhel pre hrobka a tiš pre oda sar thode leskero ťelos.
56 Paľis gele pale, kaj te keren o pachňaca oľejčeki. Aľe andro sabat na kerenas ňič, avka sar sas phendo.
