Kada pisinďa o Lukaš 18:1-43
18 Paľis lenge phenďa priklados, soske pes kampel furt te modľinel a te na vzdel pes andre kada.
2 Phenďa: „Andre jekh foros sas sudcas, savo na daralas le Devlestar a sas leske jekh, so o manuša predživen.
3 Dživelas odoj the jekh vdova, savi pal leste furt phirelas a vakerelas: ‚Av a sudzin oda, so hin maškar mande the maškar koda, so pre mande džal. A pomožin, kaj man te el čačipen.‘
4 Buter časos lake na kamľa te pomožinel, aľe paľis peske phenďa: ‚Le Devlestar na darav a hin mange jekh, so o manuša predživen.
5 Aľe te imar adi vdova ajci pal mande phirel, ta lake pomožinava, kaj la te el čačipen, kaj imar ajci pal ma te na phirel a kaj mange te del smirom.‘ “
6 Paľis o Raj phenďa: „Šunďan, so phenďa o sudcas, the te sas nalačho?*
7 Či na pomožinela o Del olenge, saven peske kidňa avri a save pes ke leste modľinen ďives the rat? Avka lenge sikavela, hoj pal lende užarel.*
8 Phenav tumenge, so neksigeder lenge pomožinela. Aľe sar avela o Čhavo le manušeskero,* ena pre phuv kajse manuša, saven ela ajso paťaviben?“
9 Olenge, save sas peske ista, hoj keren savoro lačhes a so pre avrende dikhenas upral, phenďa kada priklados:
10 „Duj manuša pes gele te modľinel andro chramos. Jekh sas farizejis a aver kidkerelas avri o daňi.
11 O farizejis terďolas a andre peste pes modľinelas: ‚Devla, paľikerav tuke, hoj na som sar ala aver manuša: so občorarkeren, so na keren oda, so hino lačho andre tire jakha, sar o lubara abo sar kada, so kidkerel avri o daňi.
12 Duvar kurkeste ľikerav postos a davkerav o ďesjatki savorestar, so dochudav.‘
13 Aľe koda, so kidkerelas avri o daňi, terďolas pre sera a ladžatar aňi na kamľa te hazdel o šero upre ko ňebos. Marelas pes andro koľin a vakerelas: ‚Devla, som binošno manuš, mi el tuke pre ma pharo.‘
14 Phenav tumenge, hoj sar kada murš geľa khere, o Del pre leste dikhelas feder sar pre kada farizejis. Bo sako, ko pes thovel upre,* ela mardo tel o pindre a o pokorno manuš ela barardo.“
15 O manuša anenas ko Ježiš cikne čhaven, kaj lenge te phenel lačho lav. Sar ada dikhle o učeňika, chudne pre lende te vičinel, kaj ada te na keren.
16 Aľe o Ježiš ke peste vičinďa le čhaven a phenďa: „Mukhen le čhaven avka, mi aven ke mande. Bo predal kajse hino le Devleskero kraľišagos.
17 Paťan mange, ko na prilel le Devleskero kraľišagos avka sar kada čhavoro, kajso dženo andre leste na džala.“
18 Jekh židoviko vodcas phučľa le Ježišostar: „Lačho učiťeľina, so mušinav te kerel, kaj te chudav o večno dživipen?“
19 O Ježiš leske phenďa: „Soske pre ma phenes, hoj som lačho? Ňiko nane lačho, ča jekh o Del.
20 Džanes o prikazaňa: ‚Ma dža avreha avraha, ma murdar, ma čorker, ma vaker pre avreste oda, so nane čačipen, presikav paťiv tire dadeske the tira dake.‘ “
21 Ov leske phenďa: „Kada savoro doľikerav terňipnastar.“
22 Sar ada o Ježiš šunďa, phenďa leske: „Mek ada tuke kampel te kerel: Biken savoro, so tut hin a o love rozde le čorenge. Avka tiro barvaľipen ela andro ňebos. A paľis av a ker oda so the me.“
23 Sar ada o murš šunďa, avľa leske pharo, bo sas igen barvalo.
24 O Ježiš pre leste dikhľa a phenďa: „Sar oda ela phares olenge, kas hin igen but love te džal andro Devleskero kraľišagos!
25 Lokeder hin la ťavake te predžal prekal o kan la suvake sar te džal le barvaleske andro Devleskero kraľišagos.“
26 Ola, so ada šunde, phučle: „Ta akor, ko šaj el zachraňimen?“
27 O Ježiš phenďa: „Te bi oda elas pro manuša, ta ňiko. Aľe o Del šaj kerel savoro.“
28 Akor o Peter phenďa: „Amen mukhľam savoro, so amen sas a keras oda so the tu.“
29 O Ježiš phenďa: „Phenav tumenge, hoj nane pre phuv manuš, savo bi omukhľahas peskero kher abo peskera romňa, abo peskere phralen, la da le dades, či peskere čhaven predal o Devleskero kraľišagos
30 a na chudľahas o keci buter andre kada časos a paľis o večno dživipen andro nevo svetos,* savo avela.“
31 Paľis o Ježiš iľa pre sera 12 apoštolen a phenďa lenge: „Džas andro Jeruzalem a ačhela pes savoro, so pisinde o proroka pal o Čhavo le manušeskero.
32 Dena les andro vasta le manušenge andal o aver narodi. Asana lestar, rakinena leske a čhungarkerena pre leste.
33 Marena les le bičoha a murdarena les. Aľe pro trito ďives ušťela andal o meriben.“
34 Aľe o apoštola na achaľile le lavenge, save o Ježiš phenďa, bo na džanenas, pal soste vakerel.
35 Sar o Ježiš avelas ko Jericho, paš o drom bešelas jekh koro murš a žobrinelas.
36 Šunďa, hoj khatar* leste predžan o manuša a phučľa lendar, so pes kerel.
37 Phende leske: „O Ježiš Nazaretsko džal adarig!“
38 Akor zvičinďa: „Ježiš, Čhavo le Davidoskero,* mi el tuke pre ma pharo!“
39 Ola, so sas anglal, pre leste chudne te vičinel, kaj te el čit. Aľe ov mek zoraleder chudňa te vičinel: „Čhavo le Davidoskero, mi el tuke pre ma pharo!“
40 O Ježiš zaterďiľa a phenďa, kaj les te anen ke leste. Sar avľa pašeder, o Ježiš lestar phučľa:
41 „So predal tute šaj kerav?“ Phenďa: „Rajeja, ker, kaj pale te dikhav.“
42 O Ježiš leske phenďa: „Dikh pale pro jakha. Tiro paťaviben tut sasťarďa.“*
43 Takoj chudňa te dikhel, džalas pal leste a ašarelas le Devles. Savore, so kada dikhle, tiš ašarenas le Devles.
