Andre anglicko čhib sas Nevo svetoskero preklados Kresťanska grecka pisma dino avri andro berš 1950. Calo preklados Biblija – Nevo svetoskero preklados sas dino avri andro berš 1961. Akorestar sas dino avri kada preklados andal o purane čhiba andro buter sar 210 čhiba. Vaš oda, hoj pes lačhes genel a hino presno, ta igen but manušen hin kalestar chasna.

O phrala, save dodikhen pre oda sar pes prethovel o Nevo svetoskero preklados, achaľon, hoj kampel te prethovel avka, kaj oda le manušes te chudel le jilestar.

Savore verši andre kadi Biblija sas prethode avka, hoj pes paš ada but modľinelas, igen pes pal oda rozmišľinelas a presikaďa pes bari paťiv olenge, so dodikhenas pre buťi, sar kerenas o Nevo svetoskero preklados.

So mek hin andre kada preklados:

Andre kada preklados hin kajse poznamki tel e čjara:

• Abo Mišľinel pes odi isto mišľenka, savi sas andre hebrejsko, aramejsko abo grecko čhib. (Matuš 3:6)

• Doslovňe Preklados andal e hebrejsko, aramejsko abo grecko čhib. Abo tiš so oda znameňinelas andro purane čhiba. (Matuš 5:48)

• Buter informaciji So znameňinen varesave meni (Skutki 1:13), mjeri the vahi (Matuš 25:15). Abo tiš, kaj peske vareso te arakhen andro dodatki the andro Slovňikos. (Matuš 5:22)

Pro anglune strani andre kada preklados hin „So šaj arakhen andre Biblija“. Odoj arakhaha oda, so sikhľarel e Biblija. Pal oda hin „Tabuľka, kaj hine o kňižki andal e Biblija“ the o „Slovňikos“. O Slovňikos pomožinel oleske, ko genel e Biblija, kaj mek feder te achaľol varesave lavenge andal e Biblija. Andro dodatkos A hin kada: „Sar pes prethovel e Biblija“,  „So hin zaujimavo andre kada preklados“, „Sar oda, hoj the amen šaj adaďives genas e Biblija?“, „Le Devleskero menos andro Kresťanska grecka pisma“ the tabuľka: „So kerelas o Ježiš, sar dživelas pre phuv“. Andro dodatkos B hin mapi the aver pomocki, kaj pes mek feder te študinel e Biblija.

Angle dojekh kňižka andal e Biblija hin „pal soste oda hin“, kaj hine o kapitoli a andro zatvorki o verši. Kada pomožinela oleske, ko genel e Biblija, kaj feder te džanel pal soste hiňi caľi kňižka.