Alé voir le kontenu

Alé voir le sou-menu

Alé voir le somèr

Bann Témoin Jéova

Kréol Rénioné

Kosa la Bib i ansègn a nou ?

 CHAPIT 7

Nora in rézuréksion !

Nora in rézuréksion !

1-3. a) Nout tout lé kondané par kosa ? b) Koman Jéova va libèr a nou de la mor ?

IMAJINN : Ou lé kondané pou in krim ke ou la pa komèt. I anvoiy a ou an prizon pou tout out vi. Ou na okin moiyin pou èt libéré. Out lavnir lé noir, é ou gingn pa fé rien. Tou kont fé, ou la pu okin léspoir. Mé in jour, ou aprann ke kèlkin i pe libèr a ou é ke li la promèt èd a ou ! Kosa ou resan ?

2 Nout tout nou lé kondané par la mor. Nou pe pa fé rien pou libèr a nou d’sa. Mé Jéova i pe sov a nou de la mor. É li la promèt ke la mor, nout « dèrnié lènmi », « i sra détrui » (1 Korintien 15:26).

3 Majinn le jour ousa ou nora pu peur la mor. Kèl soulajman ! Mé Jéova i sar pa fé disparèt rienk la mor. Li va osi fé reviv bann mor. Pans in kou, kosa i ve dir pou ou sa. Jéova i promèt ke « sak lé san fors dan la mor » i sar reviv (Izai 26:19). Sé sa ke la Bib i apèl « la rézuréksion ».

KAN KÈLKIN KE NOU IÈM I MOR

4. a) Kan inn dan nout fami oubien in kamarad i mor, kosa i pe konsol a nou ? b) Donn le non detroi kamarad Jézu.

4 Kan inn dan nout fami oubien in kamarad i mor, souvan sa i fé vréman souf a nou é nou lé  tré dékourajé. Nou gingn pa fé rien pou fé reviv a zot. Mé la Bib i aport a nou in vré rékonfor (lir 2 Korintien 1:3, 4). Alon voir in légzanp ki mont ke Jéova é Jézu i ve vréman fé reviv bann domoun ke nou ièm. Souvan, Jézu la rann vizit Lazar é son bann seur, Mart é Mari. Zot troi lété bann kamarad Jézu. La Bib i di : « Jézu té ièm Mart é son seur é Lazar. » Mé in jour, Lazar lé mor (Jan 11:3-5).

5, 6. a) Kan Jézu la vu ke bann seur é bann kamarad Lazar té i souf, kosa li la fé ? b) Lé ankourajan de savoir ke Jézu té resan la soufrans kan Lazar lé mor. Akoz ?

5 Jézu lé parti konsol Mart é Mari. Kan Mart la aprann ke Jézu té ariv, èl la sort dan le vilaj pou ni voir a li. Èl lété kontan voir Jézu, mé èl la di a li : « Si ou lavé été la, mon frèr i sré pa mor. » Pou èl, Jézu lété arivé tro tar. Aprésa, Jézu la vu Mari antrèn pleuré. Kan li la vu ke bann domoun lété tris, sa la fé mal son keur é li la pleuré osi (Jan 11:21, 33, 35). Li la resanti le gran soufrans ke nou néna kan in moun ke nou ièm i mor.

6 Dan in sans, lé ankourajan de savoir ke Jézu té resan la soufrans. Sa i mont ke li détès la mor. É kom li resanm bokou Jéova, sa i mont ke Jéova osi i détès la mor (Jan 14:9). Jéova i pe fèr disparèt la mor pou toultan, é i tard pa, li va fèr sa mèm.

« LAZAR, VIEN DEOR ! »

7, 8. a) Mart té i ve pa ke i anlèv le gro galé ke té bouch lantré la tonm Lazar. Akoz ? b) Kosa Jézu la fé pou Lazar ?

7 La tonm Lazar lété fèrmé avèk in gro galé. Kan  Jézu lé arivé devan la tonm, li la di : « Anlèv le gro galé. » Mé Mart té ve pa ke i tir le gro galé parske le kor Lazar lété dan la tonm depui déja kat jour (Jan 11:39). Èl té koné pa sak Jézu té sar fé pou son frèr.

Imajinn la joi ke la fami é bann zami Lazar lavé kan li la été résusité (Jan 11:38-44).

8 La anlèv le gro galé, aprésa Jézu la di avèk Lazar : « Vien deor ! » Mart é Mari la vu alor in nafèr inkroiyab : Lazar lé sorti dan la tonm (Jan 11:43, 44). Jézu lavé résusit Lazar ! Lazar lété de nouvo vivan, avèk son fami é son bann kamarad. Banna la gingn sèr a li dan zot bra, touch a li é koz avèk li. Sa lé in mirak vréman inkroiyab !

« JEUN FIY, MI DI A OU : LÈV A OU ! »

9, 10. a) Kisa la donn Jézu le pouvoir pou résusit bann mor ? b) Pou kosa sak nou lir su bann rézuréksion néna in bonpe la valeur pou nou ?

9 Èske sé avèk son prop fors ke Jézu la gingn résusit bann mor ? Non. Avan résusit Lazar, li la priyé Jéova. É Jéova la donn a li le pouvoir pou résusit Lazar (lir Jan 11:41, 42). Lé pa rienk Lazar ke la été résusité *. La Bib i parl osi in jeun fiy 12 zan ke lété tré malad. Son papa, Jairus, té koné pu koi fèr pou soign a èl. Li la supli Jézu pou géri son fiy. Lété le seul zanfan ke li lavé. Pandan ke li té i koz avèk Jézu, bann zom lé vnu di a li : « Out fiy lé mor !  Pou kosa déranj ankor lansénian ? » Mé Jézu la di avèk Jairus : « Pa bezoin ou la peur, mont out foi seulman, é èl i sra sové. » Aprésa, Jézu la akonpagn Jairus son kaz. Kan zot la ariv a koté la kaz, Jézu la vu é antandu bann domoun pleuré. Jézu la di a zot : « Arèt pleuré, parske èl lé pa mor, mé èl i dor. » Lé paran la jeun fiy la surman demann a zot kosa Jézu té ve dir par la. Jézu la demann ke bann domoun lé dan la kaz i sort deor. Li la amèn Jairus é son madam dan la chanm ousa la jeun fiy té alonjé. É dousman, li la pran son min é li la di avèk èl : « Jeun fiy, mi di a ou : Lèv a ou ! » Toutsuit, èl la levé é èl la marché. Son bann paran lété tré kontan : Jézu lavé résusit zot fiy ! (Mark 5:22-24, 35-42 ; Luk 8:49-56). A partir se jour la, chak foi ke zot té regard zot fiy, banna té majinn sak Jéova lavé fé pou zot par le moiyin Jézu.

10 Bann domoun ke Jézu la résusité la fini par konèt ankor la mor. Mé sak nou lir su bann rézuréksion la, néna in bonpe la valeur pou nou, parske sa i donn a nou in vré léspoir : Jéova i ve résusit bann mor, é sé sa mèm ke li va fèr.

KOSA SAK NOU LIR SU BANN RÉZURÉKSION I APRANN A NOU ?

Lapot Pièr la résusit in madam ke lété krétien ke té apèl Dorkas (Akt 9:36-42).

Éliya la résusit le garson in veuv (1 Roi 17:17-24).

11. Sak nou lir su la rézuréksion Lazar i mont ke sak i di dann Éklézias 9:5 lé vré. Akoz ?

11 La Bib i di ke bann mor « i koné pu rien » (Éklézias 9:5). Sak nou lir su la rézuréksion Lazar i  mont ke sa lé vré. Kan li té dan la tonm, Lazar « té koné pu rien ». Kom Jézu lavé di, lété komsi li té dor (Jan 11:11).

12. Pou kosa nou pe èt sur ke Lazar la été résusité ?

12 In bonpe domoun la vu kan Jézu la résusit Lazar. Mèm bann zènmi Jézu té koné ke li la fé se mirak la. Lazar lété vivan, é sa té i prouv ke li la été résusité (Jan 11:47). In bonpe domoun lé vnu voir Lazar. Kan banna la vu a li, zot la konpri ke Jézu té anvoiyé par Bondieu. Mé bann zènmi Jézu lété pa kontan dutou. Alor, zot la désid tué Jézu é Lazar (Jan 11:53 ; 12:9-11).

13. Pou kosa nou pe èt sur ke Jéova va résusit bann mor ?

13 Jézu la di ke « tout sèk lé dan bann tonm souvnir » i sra résusité (Jan 5:28). Sa i ve dir ke tout bann domoun ke lé dan la mémoir Jéova va reviv. Mé pou ke Jéova i résusit kèlkin, i fo ke li souvien a li tout zafèr su se moun la. Èske sa lé posib ? Oui. Néna dé miliar d’zétoil. Pourtan, la Bib i di ke Jéova i koné le non tout bann zétoil (lir Izai 40:26). Si li oubli pa le non tout bann zétoil, li va rapèl a li san problèm é an détay bann domoun ke li va résusité. An plus, kom li la kréé tout zafèr, sa i prouv ke li na le pouvoir fé reviv bann mor.

14, 15. Kosa sak Job la di su la rézuréksion i ansègn a nou ?

14 Job lété in om fidèl anvèr Jéova. Li la demandé : « Si in om [...] i mor, èske li pe reviv ? » Aprésa, li la di avèk Jéova : « Ou va aplé, é moin ma  réponn a ou. Ou va atann avèk inpasians sak ou la kréé. » Job té kroi an la rézuréksion. Li té koné ke Jéova i atann avèk inpasians le moman ousa li va résusit bann mor (Job 14:13-15).

15 Kosa ou resan kan ou pans la rézuréksion ? Konèt ke Jéova i ve vréman fé reviv bann mor, i fé a nou du bien. Mé ou demann a ou petèt : « Èske domoun dan mon fami é mon bann zami i sra osi résusité ? » Kisa i sra résusité ? É ousa bann domoun ke Bondieu va résusité i sar viv ? Alon voir sak la Bib i di.

ZOT « VA ANTANN SON VOI É ZOT VA SORTIR »

16. Koman sra la vi pou bann résusité su la tèr ?

16 Dann tan avan, bann résusité la retrouv zot fami é zot zami su la tèr mèm. Sé osi sak va arivé dan lavnir, mé i sra plu gayar. Pou kosa ? Parske bann zumin ki sra résusité su la tèr poura viv pou toultan. É zot va viv dan in monn vréman diféran le monn koméla. Nora pu bann gèr, ni bann krim, ni bann maladi.

17. Kisa i sra résusité ?

17 Kisa i sra résusité ? Jézu la di ke « tout sak lé dan bann tonm souvnir va antann son voi é va sortir » (Jan 5:28, 29). É Révélasion 20:13 i di : « La mèr la rann bann mor ke lété dedan, é la mor é la tonm la rann bann mor ke lété dedan. » Bann domoun par miliar va donk reviv. Lapot Pol la di osi  ke nora « in rézuréksion otan pou bann jus ke pou bann zinjus » (lir Akt 24:15). Kosa sa i ve dir ?

Dan le Paradi, bann mor i sra résusité é zot va retrouv bann pèrsonn ke zot té ièm.

18. Kisa i lé bann « jus » ki sra résusité ?

18 Parmi bann « jus », néna bann sèrviteur Jéova ke la viv avan ke Jézu i vien su la tèr. Par égzanp, Noé, Abraam, Sara, Moiz, Rut é Éstèr i sra résusité  su la tèr. Ébreu chapit 11 i parl su bann zom é bann fam la. Èske bann sèrviteur Jéova ke i mor nout lépok i sra résusité ? Oui, parske zot lé konsidéré kom bann « jus ».

19. a) Kisa i lé bann « zinjus » ? b) Kosa Jéova va donn bann « zinjus » la posibilité d’fèr ?

19 Parmi bann « zinjus », néna bann domoun par miliar ke lé mor é zot la pa gingn lokazion konèt Jéova. Jéova i oubli pa zot. Li va résusit a zot é li va donn a zot la posibilité pou konèt é ador a li.

20. Kisa i sra pa résusité ?

20 Èske sa i ve dir ke tout bann mor i sra résusité ? Non. Jézu la di ke désèrtin i sra pa résusité (Luk 12:5). Kisa va désidé si in moun i sra résusité ou non ? Jéova lé le Juj ke na le plu gran lotorité. Mé li la osi donn Jézu lotorité pou èt le « juj bann vivan é bann mor » (Akt 10:42). Kisa i sra pa résusité ? Sak lé jujé kom méchan é ki ve pa chanjé (regard la not n19).

LA RÉZURÉKSION DANN SIÈL

21, 22. a) Kèl kor sak i résusit dann sièl i gingn ? b) Kisa lété le premié pou èt résusité pou viv dann sièl ?

21 La Bib i di osi ke désèrtin va viv dann sièl. Kan in moun lé résusité dann sièl, li reviv pa avèk in kor umin. Li gingn in kor spirituèl, sétadir in kor kom sak bann zanj.

22 Jézu té le premié pou èt résusité pou viv dann sièl (Jan 3:13). Li lété résusité par Jéova troi jour apré ke li la été tué (Psom 16:10 ; Akt 13:34, 35).  Jézu la pa été résusité avèk in kor umin. Lapot Pièr i ésplik ke la « mèt a li a mor dan la chèr, mé li la reviv dan léspri » (1 Pièr 3:18). Alor Jézu lé redevnu in lanj puisan ! (1 Korintien 15:3-6). Mé la Bib i di ke dot pèrsonn lé résusité dann sièl.

23, 24. a) Jézu la montré ke néna inn « ti troupo ». Kisa lé dedan ? b) Konbien de krétien i fé parti le « ti troupo » ?

23 Avan son mor, Jézu la di avèk son bann disip : « Mi sa va pou prépar a zot in plas » (Jan 14:2). Sa té i ve dir ke sèrtin son bann disip sra résusité pou viv dann sièl avèk li. Konbien zot i sra ? Jézu la di ke zot i sra inn « ti troupo ». Donk zot i sra pa bokou (Luk 12:32). Lapot Jan la donn la kantité égzak : li la vu Jézu ke « lété debout su le mon Sion [o sièl], é avèk li 144 000 » (Révélasion 14:1).

24 Kansa lé 144 000 krétien té sar èt résusité ? Dapré la Bib, zot rézuréksion va komansé apré ke Jézu sré devnu roi dann sièl (1 Korintien 15:23). Nou viv dan lépok la, é prèske tout lé 144 000 krétien, lé déja résusité dann sièl. Kan sak lé ankor su la tèr i mor, banna lé toutsuit résusité dann sièl. Parkont, in bonpe bann domoun i sra résusité plutar su la tèr, dan le Paradi.

25. Kosa nou sar aprann dan le chapit i vien apré ?

25 I tard pa, Jéova va libèr bann zumin de la mor. La mor va disparèt ! (Lir Izai 25:8). Mé kosa lé 144 000 i sar fé dann sièl ? La Bib i di ke zot i sra roi dan in roiyom avèk Jézu. Le chapit i vien apré va aprann a nou ankor plus su se roiyom la.

^ § 9 La Bib i di ke dot moun la été résusité (bann jeun, bann pèrsonn ajé, bann zom, bann madam, bann Zisraélit é non Zisraélit). Regard 1 Roi 17:17-24, 2 Roi 4:32-37, 2 Roi 13:20, 21, Matieu 28:5-7, Luk 7:11-17, Luk 8:40-56, Akt 9:36-42 é Akt 20:7-12.