Alé voir le kontenu

Alé voir le somèr

 CHAPIT 2

La Bib : in liv ke Bondieu la donn a nou

La Bib : in liv ke Bondieu la donn a nou

1, 2. Pou kosa la Bib lé in gayar kado ke Bondieu la donn a nou ?

IMAJINN : in kamarad i donn a ou in kado. Kosa ou resan ? Ou lé kontan parske li la pans a ou. Ou remèrsi a li. É ou lé présé rouv kado la.

2 La Bib sé in kado ke Bondieu la donn a nou. Dan la Bib, nou aprann bann zafèr ke nou pe pa aprann ayeur. Par égzanp, li ansègn a nou ke Bondieu la kréé le sièl, la tèr, le premié om é le premié fam. Li donn a nou bann konsèy ki èd a nou kan nou néna bann problèm. Li aprann a nou osi ke Bondieu néna lintansion transform la tèr an paradi. É li ésplik koman Bondieu va fé sa. La Bib lé vréman in gayar kado !

3. Kan ou étudi la Bib, kosa ou va aprann ?

3 Kan ou étudi la Bib, ou va aprann ke Bondieu i ve ke ou devien son kamarad. É plus ou va aprann konèt a li, plus out lamitié avèk li i sra plu for.

4. Kosa ou trouv de remarkab su la Bib ?

4 La Bib la été tradui an 2 800 lang é plus. La bib la déja été inprimé par miliar. Apepré tout domoun (9 moun sur 10) i pe lir a li dan son lang. Chak semèn, néna plus in milion de pèrsonn ke i ariv avoir in bib ! Vréman, la poin okin liv kom la Bib.

5. Pou kosa nou pe dir ke la Bib lé « inspiré par Bondieu » ?

 5 La Bib lé « inspiré par Bondieu » (lir 2 Timoté 3:16) (regard la not n2). Mé désèrtin i pouré dir a zot : « Sé bann zom ke la ékri la Bib. Alor pou kosa i di ke sé Bondieu la donn a nou se liv ? » La Bib i ésplik : « Bann zom la parlé de la par Bondieu, kom zot lété gidé par léspri sin » (2 Pièr 1:21). Lé kom kan in patron i demann son sekrétèr pou ékri in lèt. Sé la lèt de ki ? Sak le patron, mé pa sak la sekrétèr. Lé parèy, la Bib sé Bondieu ke la donn a nou. Mèm si Bondieu la utiliz bann zom pou ékri liv la, sa i vien pa de zot. Li la gid banna pou ke zot  i ékri son bann pansé. La Bib lé vréman « la parol Bondieu » (1 Tésalonisien 2:13).

Lé Sint Zékritur. Traduksion monn nouvo lé disponib dan in bonpe lang.

LA BIB LÉ ÉGZAK

6, 7. Pou kosa nou pe dir ke la poin kontradiksion dan la Bib ?

6 Pou ékri la Bib, la pran plus 1 600 zan. Bann zom ke la ékri la Bib, té viv pa mèm lépok. Désèrtin lavé in bonpe linstruksion é dot non. Parmi zot, inn lété dokteur. Dot té kultiv la tèr, detroi té pèch poison, sèrtin té gardien mouton, lavé osi bann profèt, bann juj oubien bann roi. Mèm si in bonpe zom la ékri la Bib, na poin kontradiksion dedan : li di pa in nafèr dan in chapit é le kontrèr dan in not chapit *.

7 Bann premié chapit la Bib i ésplik koman bann problèm dan le monn la komansé. Bann dèrnié chapit i aprann a nou koman Bondieu va règ bann problèm la, é koman li va transform la tèr an paradi. La Bib i rakont la vi bann zumin su dé milié d’zané. Li mont ke Bondieu i réaliz toujour sèk li la désidé d’fèr.

8. Èske la Bib i di la vérité kan li parl su bann sujé la sians ? Donn bann légzanp.

8 La Bib la pa été ékri pou ansègn la sians. Mé bann sujé su la sians ke nou trouv dan la Bib, lé toultan vré. É sa lé normal, parske sé in liv ki vien de Dieu. Par égzanp, dan le liv Lévitik, néna bann loi, ke lé Zisraélit té devé suiv, pou pa répann bann maladi partou. Pourtan, liv la lété ékri lontan  avan ke té dékouv ke bann mikrob é bann virus i amèn bann maladi. La Bib i ansègn osi la vérité kan li di ke la Tèr lé pandiyé dann vid (Job 26:7). Na lontan d’sa, bann domoun té kroi ke la Tèr lété plat. Mé la Bib té di déja ke li lété ron (Izai 40:22).

9. Èske bann zom ke la ékri la Bib lété onèt ? Kosa sa i prouv ?

9 Tout sak la Bib i rakont su Listoir lé égzak. In bonpe liv su listoir néna bann zéreur parske sak la ékri sa, i di pa toultan la vérité. Par égzanp, zot i rakont pa tout bann gèr ke zot péi la pèrd. Parkont, bann zom ke la ékri la Bib lété onèt. Kan le peup Israèl té pèrd in batay, banna té kachièt pa rien. Zot té rakont osi zot bann fot. Par égzanp, dann liv dé Nonm, Moiz la di ke Bondieu la puni a li pou in fot grav (Nonm 20:2-12). Bann zom ke la ékri la Bib lété onèt, é sa i prouv ke sé in liv ki vien de Dieu. Donk, nou pe kroir sak la Bib i di.

IN LIV RANPLI DE BON KONSÈY

10. Pou kosa bann konsèy ke néna dan la Bib lé util pou nou ?

10 Bann konsèy ke néna dan la Bib lé util pou nou. La Bib lé« inspiré par Bondieu é lé util pou ansénié, pou korijé, pou remèt bann zafèr an ord » (2 Timoté 3:16). Jéova i koné koman nou lé fé. Li konpran nout fason d’pansé é nout bann santiman. Li koné a nou mieu ke nou mèm é li ve ke nou lé ereu. Donk, li koné sak lé bon é sak lé mové pou nou.

11, 12. a) Dann Matieu chapit 5 juska 7, kèl bon konsèy Jézu la doné ? b) Kèl prinsip util nou trouv dan la Bib ?

11 Dann Matieu chapit 5 juska 7, Jézu i donn a nou bann tré bon konsèy. Li ésplik a nou koman èt  ereu, koman avoir in bon lantant ansanm inn é lot, koman priyé é koman konsidèr larjan. Na 2 000 an ke li la donn bann konsèy la, mé zot lé toujour osi inportan é util ojourdui.

12 Dan la Bib, Jéova i donn a nou osi bann prinsip (regard la not n3). Bann prinsip la i èd a nou avoir in vi d’fami plu ereu, èt travayeur é viv an pé avèk lé zot. Bann konsèy la, lé toujour util pou nou, kik nou lé, partou ousa nou viv é ninport kèl problèm ke nou néna (lir Izai 48:17).

OU PE KROIR BANN PROFÉSI LA BIB

Izai, in om parmi dot ke la ékri la Bib, la anonsé ke Babilonn sra ranvèrsé.

13. Dapré Izai, kosa té sar ariv Babilonn ?

13 In bonpe profési la Bib la finn déja réalizé (regard la not n4). Par égzanp, Izai la anonsé ke la vil Babilonn noré pèrd son pouvoir (Izai 13:19). É li la éspliké koman. La vil lété protéjé par bann gran port é par in gran rivièr. Mé le bann port va rès rouvèr é le gran rivièr sré prèske sèk. Larmé noré rant dan la vil san batay. Izai la mèm anonsé ke sé in mesieu ki apèl Sirus ke noré ranvèrs Babilonn (lir Izai 44:27–45:2).

14, 15. Koman la profési Izai la réalizé ?

14 Deu san zan apré ke profési la lété ékri, in larmé lé arivé pou atak Babilonn. Kisa té komann larmé la ? Sirus, le roi la Pèrs. La profési lété donk égzak. Mé èske larmé Sirus i pouré rant dann Babilonn, kom la profési lavé anonsé ?

15 Dan la nuit ousa Babilonn lété ataké, bann zabitan lété an fèt. Zot té kroi a zot an sékurité parske  zot vil lété protéjé par bann gran mur é par in gran rivièr. Mé an deor la vil, Sirus é son larmé lavé kreuz in kanal pou fé bès le nivo d’lo. Alor, bann solda la gingn travèrs le gran rivièr a pié. Mé kom la vil lété antouré avèk bann gran mur, koman banna té sar rantré ? Kom la profési lavé anonsé, bann port la vil  lété rouvèr. Donk, larmé la gingn ranvèrs la vil san batay.

16. a) Kosa Izai la anonsé su Babilonn ? b) Èske la profési Izai la réalizé ?

16 Izai la osi anonsé ke in jour nora pu pèrsonn ke va abit Babilonn. Li la ékri : « Li sra jamé abité » (Izai 13:20). Èske sa la réalizé ? Oui. La vil Babilonn lé an ruinn. Bann ruinn la, lé an Irak, anviron 80 kilomèt o sud Bagdad. Juskalèr na poin pèrsonn i abit la ba. Jéova la fé disparèt Babilonn « avèk le balié la déstruksion » (Izai 14:22, 23) *.

Bann ruinn Babilonn.

17. Pou kosa nou pe kroir bann promès Bondieu ?

17 In ta profési la Bib la finn réalizé. Alor, nou pe kroir sak la Bib i anons pou lavnir. Nou pe èt sur ke Jéova va tenir son promès pou transform la tèr an  paradi (lir Nonm 23:19). Nou pe éspèr gingn « la vi pou toultan ke Bondieu ki pe pa ramas manteur, la promèt » (Tit 1:2) *.

LA BIB I PE CHANJ OUT VI

18. Kosa Pol la di su la « parol Bondieu » ?

18 Nou la aprann ke na poin okin liv kom la Bib. La poin kontradiksion dedan. Kan li parl su bann sujé la sians oubien su listoir, li lé toujour égzak. Li donn bann konsèy ke lé bien. É dedan néna bann profési ke la finn réalizé. Mé la Bib lé inkroiyab pou in not rézon ankor. Lapot Pol la ékri : « La parol Bondieu lé vivan é puisan. » Kosa i ve dir sa ? (Lir Ébreu 4:12).

19, 20. a) Koman la Bib i pe èd a ou konèt kisa ou lé vréman ? b) Koman ou pe montré ke ou ièm vréman la Bib ?

19 La Bib i pe chanj out vi. Li pe èd a ou konèt kisa ou lé vréman. Li pe èd a ou mieu konprann out bann pansé é sak ou resan o fon out keur. Par égzanp, nou pans petèt ke nou ièm Bondieu. Mé pou montré ke nou ièm a li, nou doi fé sak la Bib i di.

20 La Bib lé vréman in liv ke Bondieu la donn a nou. Bondieu i demann a nou lir liv la, étudié a li é ièm a li. Fé voir ke ou aprési kado la é kontinué étudié a li. Alor, ou va konprann kèl projé Bondieu néna pou bann zumin. Dan le chapit apré, nou va koz de sa an détay.

^ § 6 Désèrtin i di ke néna bann kontradiksion dan la Bib, mé sa lé pa vré (regard chapit 7 dan le liv La Bible : Parole de Dieu ou des hommes ?, publié par bann Témoin Jéova).

^ § 16 Si ou ve konèt plus su bann profési la Bib, lir bann paj 252 é 253 dan le liv Étude perspicace des Écritures, volume 1, publié par bann Témoin Jéova.

^ § 17 La profési su la déstruksion Babilonn i fé parti bann profési la Bib, parmi dot, ke la finn réalizé. La not n5, i parl bann profési su Jézu Kris.