Alé voir le kontenu

Alé voir le sou-menu

Alé voir le somèr

Bann Témoin Jéova

Kréol Rénioné

Kosa la Bib i ansègn a nou ?

 CHAPIT 6

Kosa nou devien kan nou mor ?

Kosa nou devien kan nou mor ?

1-3. a) Kèl késtion bann domoun i poz a zot su la mor ? b) Kosa désèrtin relijion i di su la mor ?

LA BIB i promèt ke in jour « nora pu la mor » (Révélasion 21:4). Dann chapit 5, nou la aprann ke la ranson i donn a nou la posibilité viv pou toultan. Mé ojourdui, bann zumin i mor ankor (Éklézias 9:5). Alor, in bonpe domoun i demann a zot : « Kosa nou devien kan nou mor ? »

2 Kan kèlkin ke nou ièm i mor, nou ve konèt ankor plus la répons su se késtion la. Nou demann a nou : « Ousa li lé ? Èske li voi a moin ? Èske li pe èd a moin ? Èske ma revoir a li in jour ? »

3 Pou bann késtion la, bann relijion i donn diféran répons. Désèrtin relijion i di ke bann domoun ke lé bon i sa va dann sièl, é sak lé mové i sa va dan lanfèr. Dot relijion i di ke, kan kèlkin i mor, li devien in léspri é li sar viv avèk son bann fami ke la finn mor. É dot relijion i di ke apré la mor, nou lé jujé é nou reviv avèk in kor umin diféran ou avèk le kor ninport kèl zanimo.

4. Kosa la plupar bann relijion i di su la mor ?

4 Bann relijion i ansègn bann zafèr ke lé vréman diféran su la mor. Mé la plupar i di ke, kan in moun i mor, son léspri i sort dan son kor pou kontinué viv. Mé èske sa lé vré ?

 KOSA I ÉSPAS APRÉ LA MOR ?

5, 6. Kosa i éspas apré nout mor ?

5 Jéova i koné kosa i ariv apré nout mor. Li di a nou ke, kan kèlkin i mor, li arèt viv. La mor lé le kontrèr la vi. Donk, kan kèlkin i mor, tout sak li resan é son bann souvnir i kontinu pa viv dan in not landroi *. Kan nou mor, nou voi pu, nou antan pu é nou pans pu.

6 Le roi Salomon la ékri ke bann mor « i koné pu rien ». Bann mor i pe pa émé ni avoir la rankeur. « Néna ni travay, ni plan, ni konésans, ni sajès dan la tonm » (lir Éklézias 9:5, 6, 10). Dann Psom 146:4, la Bib i di ke, kan kèlkin i mor, « son bann pansé » i mor avèk li.

SAK JÉZU LA DI SU LA MOR

Jéova la kréé bann zumin pou ke zot i viv su la tèr pou toultan.

7. Kosa Jézu la di su la mor ?

7 Lazar lété in kamarad Jézu. Kan li lé mor, Jézu la di avèk son bann disip : « Lazar nout kamarad lé andormi. » Mé li voulé pa dir ke Lazar té i dor. Jus apré, li la di : « Lazar lé mor » (Jan 11:11-14). Donk, Jézu la konpar la mor avèk le somèy. Li la pa di ke Lazar lété dann sièl oubien avèk son bann fami ke lété déja mor. Li la pa di ke Lazar lété dan in lanfèr d’fe. É li la pa di non plu ke Lazar la reviv dan in not kor. An vré, lété komsi Lazar té i dor. Dot vèrsé la Bib i konpar la mor avèk in somèy profon. La Bib i di ke, kan Étièn la été tué, li la « andor a li dan la mor »  (Akt 7:60). Lapot Pol la osi ékri ke sèrtin krétien « la andor a zot dan la mor » (1 Korintien 15:6).

8. Koman nou koné ke Jéova la pa kréé bann zumin pou ke zot i mor ?

8 Kan Jéova la kréé Adan é Èv, èske li voulé ke zot deu té i mor in jour ? Non ! Li lavé kréé banna pou ke zot i viv pou toultan é avèk in santé parfé. Li la mèm donn a zot lanvi viv pou toultan (Éklézias 3:11). Bann paran i ve pa voir zot zanfan konèt la viéyès é la mor. Lé parèy pou Jéova. Mé alor, si Jéova la kréé a nou pou viv pou toultan, akoz nou mor ?

 AKOZ NOU MOR ?

9. Pou kosa le komannman ke Jéova lavé donn Adan é Èv lété pa difisil pou suiv ?

9 Dann jardin Lédèn, Jéova lavé di avèk Adan : « Tout bann piédboi dan le jardin ou pe manj le frui [...]. Mé le piédboi la konésans le bon é le mové, ou doi pa manj sa, parske le jour ou va manj a li, ou va mor » (Jenèz 2:9, 16, 17). Se komannman lété klèr, é lété pa difisil pou obéi. An plus, Jéova lavé le droi désidé sak lété bien é sak lété mal pou Adan é Èv. Si banna lavé obéi Jéova, zot noré montré ke zot lavé réspé pou son lotorité é ke zot té aprési tout sak li lavé donn a zot.

10, 11. a) Koman Satan la tronp Èv ? b) Sak Adan é Èv la fé lété grav. Akoz ?

10 Malereuzman, Adan é Èv la désid dézobéi Jéova. Satan la demann avèk Èv : « Èske lé vré ke Bondieu la di ke zot i doi pa manj le frui bann piédboi dan le jardin ? » Èv la réponn a li : « nou pe manj bann frui su bann piédboi dan le jardin. Mé pou manj le frui le piédboi ke lé dann milieu le jardin, Bondieu la di : “Zot i doi pa manj a li, [...] pou ke zot i mor pa” » (Jenèz 3:1-3).

11 Alor Satan la di : « Zot i sar pa mor dutou. Parske Bondieu i koné ke, le jour mèm ousa zot va manjé, [...] zot i sra kom Bondieu, pou konèt le bon é le mové » (Jenèz 3:4-6). Satan té ve fé kroir Èv ke èl té i pe désid touseul sak lété bien é sak lété mal. É li la pa di la vérité su sak té sar arivé si èl té dézobéi : li la di a èl ke èl té sar pa mor. Alor Èv la manjé le  frui é èl la donn Adan. Adan é Èv té koné ke Jéova lavé di a zot de pa manjé le frui. Mé zot la désid dézobéi se komannman sinp é fasil pou suiv. Lété klèr : zot lavé poin réspé pou zot Papa ke i ièm a zot. É zot lavé okin rézon pou fé sa !

12. Kosa Jéova la resanti kan li la vu ke Adan é Èv lavé okin réspé pou li ?

12 Jéova lété vréman tris ke Adan é Èv lavé okin réspé pou li ! Alon pran in légzanp : Ou la fé tout out posib pou bien élèv out garson é out fiy. Mé out bann zanfan i rebèl a zot é i fé le kontrèr sak ou la demann a zot. Kosa ou resan ? Lé sur ke sa va fé mal out keur.

Adan lété fé avèk la pousièr é li la artourn an pousièr.

13. Jéova la di avèk Adan : « Ou va artourn an pousièr. » Kosa li té ve dir par la ?

13 Kan zot la dézobéi Bondieu, Adan é Èv la pèrd la posibilité viv pou toultan. Jéova la di avèk Adan : « Ou lé fé èk la pousièr é ou va artourn an pousièr » (lir Jenèz 3:19). Nou konpran par la ke Adan té sar retourn an pousièr. I sré komsi li lavé jamé été kréé (Jenèz 2:7). Apré ke li la péché, li lé mor : li la pèrd la vi.

14. Pou kosa nou mor ?

14 Si Adan é Èv lavé obéi Bondieu, zot i sré ankor vivan ojourdui.  Mé kan zot la dézobéi, zot la péché, é zot la fini par konèt la mor. Le péché lé kom in maladi tré grav ke Adan é Èv, nout premié paran, la transmèt a nou. Nout tout lé né pécheur é sé pousa ke nou mor (Romin 5:12). Mé lé pa se ke Bondieu té i ve pou bann zumin. Jamé li té i ve ke bann zumin i mor. Dayeur, la Bib i di ke la mor lé in « lènmi » (1 Korintien 15:26).

KONÈT LA VÉRITÉ I LIBÈR A NOU

15. Pou kosa nou pe dir ke konèt la vérité su la mor i libèr a nou ?

15 Konèt sak i éspas apré la mor i libèr a nou in tralé zafèr manteur. La Bib i di ke bann mor i resan ni douleur ni soufrans. Nou pe pa koz avèk zot é zot i pe pa koz avèk nou. Nou pe pa èd a zot é zot i pe pa èd a nou. Zot i pe pa fé a nou le mal é nou doi pa avoir peur de zot. Pourtan, in bonpe relijion i di ke bann mor i viv dan in landroi é ke nou pe èd a zot kan nou donn larjan bann chèf la relijion (par égzanp pou ke banna i fé la mès pou bann mor). Mé kan nou koné la vérité su la mor, nou lès pu a nou tronpé par bann zafèr manteur la.

16. Kèl zafèr manteur in bonpe relijion i ansègn su bann mor ?

16 Satan i utiliz bann fo relijion pou tronp a nou é fé kroir a nou ke bann mor i kontinué viv. Sèrtin relijion i di ke, kan in moun i mor, in léspri i sort dan son kor pou kontinué viv. Èske out relijion i aprann a ou sa ? Oubien li ansègn sak la Bib i di su bann mor ? Satan i fé kroir bann domoun bann zafèr manteur, pou ke zot i détourn a zot de Jéova.

17. Akoz lansègnman su lanfèr i sali Jéova ?

 17 Sak in bonpe relijion i ansègn, lé vréman grav. Par égzanp, sèrtin relijion i di ke bann méchan va brulé an anfèr pou toultan. Se mansonj la i sali Bondieu. Jéova va jamé pèrmèt ke bann zumin i souf komsa ! (Lir 1 Jan 4:8). Alon pran in légzanp : In moun i puni son zanfan é i mèt son min dann fe. Kosa ou va pansé de li ? Ou va trouv ke li lé san keur. É ou nora pa anvi aprann konèt a li. Sé komsa ke Satan i ve ke nou voi Jéova !

18. Akoz i fo pa avoir peur bann mor ?

18 Sèrtin relijion i di ke bann zumin i devien bann zéspri apré zot mor. Zot i di ke nou doi réspèk bann zéspri é avoir peur d’zot, parske zot i pe èt bann zami puisan ou bann zènmi danjereu. In bonpe domoun i kroi se zafèr manteur la. Zot la peur bann mor. Olèrk ador Jéova, zot i ador banna. Mé oubli pa : bann mor i resan pu rien. I fo pa avoir peur d’zot. Jéova lé nout Kréateur é li lé le vré Bondieu. Nou doi ador pèrsonn dot ke li (Révélasion 4:11).

19. Konèt la vérité su la mor i aport a nou bann bienfé. Kosa i lé ?

19 Konèt la vérité su la mor i libèr a nou bann mansonj ke bann relijion i ansègn. É sa i èd a nou konprann bann gayar promès ke Jéova i fé pou nout lavnir.

20. Le chapit i vien apré i parl de koi ?

20 Na lontan d’sa, Job, in sèrviteur Bondieu, la demandé : « Si in om [...] i mor, èske li pe reviv ? » (Job 14:14). Dan la Bib, Jéova i donn a nou in répons vréman intérésan. Nou va dékouv sa dan le chapit i vien apré.

^ § 5 Désèrtin i kroi ke apré la mor, lam, ou léspri, i kontinué viv. Pou konèt plus, regard bann not n17 é 18.