Alé voir le kontenu

Alé voir le somèr

 CHAPIT 1

Kisa i lé le vré Bondieu ?

Kisa i lé le vré Bondieu ?

1, 2. Kèl késtion nou poz a nou souvan ?

BANN zanfan i poz in bonpe késtion. Kan i ésplik a zot in nafèr, zot i demann souvan : « Pou kosa ? » É kan i ésèy réponn a zot, banna i demann ankor : « Mé pou kosa ? »

2 Nout tout, nou poz a nou bann késtion. Par égzanp : « Kosa mi sar manjé ? Kèl linj mi sar mèt ? Kosa mi sar achté ? » Nou poz a nou osi bann késtion su la vi é su lavnir. Mé kan nou trouv pa bann répons, souvan nou arèt chèrché.

3. In paké d’moun i pans ke zot i pe pa trouv bann répons pou bann késtion ke zot i poz a zot. Akoz ?

3 Èske la Bib i réponn bann késtion inportan ke nou poz a nou ? Bann domoun i pans ke oui, mé ke li lé tro difisil pou konprann. Banna i pans ke sé seulman bann zansénian ou bann chèf relijieu i koné bann répons. Dot la ont parske zot i koné pa bann répons su detroi késtion. É ou, kosa ou pans ?

4, 5. a) Kèl késtion ou poz a ou ? b) Pou kosa ou doi kontinué chèrch bann répons ?

4 Lé sur ke ou ve konèt la répons su bann késtion la : « Èske la vi na in sans ? Kosa i éspas apré la mor ? Koman Bondieu i lé ? » Jézu, Lansénian le plu konu la di : « Kontinué demandé, é va donn a zot ; kontinué chèrché, é zot va trouvé » (Matieu 7:7).  Donk, kontinu chèrché juska se ke ou trouv bann vré répons.

5 Vréman, si ou « kontinué chèrché », ou va trouv bann répons dan la Bib (Provèrb 2:1-5). Ou va voir ke sa lé pa difisil pou konprann. Sak ou va aprann va rann a ou plu ereu, é va donn a ou in gayar léspoir pou lavnir. Asteur, alon koz su in késtion ke in bonpe domoun i poz a zot.

ÈSKE BONDIEU I FÉ IN KONT AVÈK NOU ?

6. In bonpe d’moun i pans ke Bondieu i sousi pa li de zot. Akoz ?

6 In bonpe d’moun i pans ke Bondieu i fé pa in kont avèk zot. Banna i di ke, si Bondieu té sousi a li pou bann zumin, le monn i sré vréman diféran. Partou, néna la gèr, désèrtin i détès a zot é néna bann maleur. Bann zumin i tonm malad, zot i souf é zot i mor. Néna d’moun i demann a zot : « Si Bondieu i sousi a li de nou, akoz li arèt pa bann soufrans la ? »

7. a) Désèrtin i kroi ke Bondieu lé san keur. Akoz ? b) Kan in maleur i ariv, i fo pa akuz Bondieu. Pou kosa ?

7 Parfoi, bann chèf relijieu i fé kroir bann domoun ke Bondieu lé san keur. Kan in maleur i ariv, zot i di ke sé Bondieu ke la voulu sa. An vré, kan zot i di sa, zot i akuz Bondieu. Mé la Bib i ansègn ke Bondieu lé jamé résponsab bann maleur. Jak 1:13 i ésplik ke li mèt pa a lépreuv ou ke li tèst pa pèrsonn par bann mové zafèr. Vèrsé la i di : « Ke pèrsonn kan li lé dan lépreuv, i di : “Mi lé antrèn èt tésté par Bondieu.” Parske Bondieu i pe pa èt tésté par bann mové zafèr é li mèm li tést pa pèrsonn komsa. » Sa i  ve dir ke, mèm si Bondieu i anpèch pa bann maleur, sé jamé li ke i provok tousa (lir Job 34:10, 12).

8, 9. Kan nou néna bann problèm, pou kosa i sré pa jus ke i akuz Bondieu ? Donn in légzanp.

8 Alon pran in légzanp : In jeun ke lé majeur i viv ché son bann paran. Son papa i ièm a li bokou é la mont a li koman pran bann bon désizion. In jour, le jeun om i désid pu ékout son papa é li kit la kaz. Li va fèr in ta mové zafèr é li va konèt bann gro sousi. Selon ou, èske sé la fot le papa ? Si le garson néna bann problèm, èske ou diré sé parske le papa la lès a li alé ? Non ! (Luk 15:11-13). Désèrtin zumin la désid dézobéi Bondieu é fé bann zafèr ke lé mové. É kom le papa dan légzanp, Bondieu la lès a zot fèr. Donk, kan in maleur i ariv, i fo rapèl a nou ke Bondieu lé pa loteur. I sré pa jus rejèt la fot su li.

9 Pou kosa Bondieu la pa ankor mèt fin bann soufrans ? Li néna in bon rézon. Dan le chapit 11, ou va aprann kosa la Bib i di la d’su. Mé ou pe èt sur ke Bondieu i ièm a nou, é ke, kan nou rankont bann problèm, lé pa son fot. Dan le fon, rienk li touseul néna le pouvoir règ tousa (Izai 33:2).

10. Pou kosa nou pe èt sur ke Bondieu va mèt fin la méchansté ?

10 Bondieu lé sin (Izai 6:3). Tout sak li fé lé pur é lé bon. Donk, nou pe fèr a li konfians. Parkont, bann zumin lé pa kom Bondieu. Parfoi, banna i fé bann mové zafèr. É mèm le plu bon dirijan la poin le pouvoir pou fé disparèt tout bann problèm kozé par bann mové moun. La poin pèrsonn lé plu puisan ke Bondieu. Néna rienk Bondieu i pe arèt la  méchansté pou toultan é sé sa mèm ke li va fèr. Lé sur, li va fèr disparèt tout bann soufrans ke lé provoké par la méchansté (lir Psom 37:9-11).

KOSA BONDIEU I RESAN KAN BANN ZUMIN I SOUF ?

11. Kan Bondieu i voi a ou soufèr, kosa li resan ?

11 Kosa Bondieu i resan kan li voi sak i éspas dan le monn? Oubien kosa li resan kan li voi a ou soufèr ? La Bib i ansègn ke li « ièm la justis » (Psom 37:28). Li sousi a li in bonpe pou sak lé bon é sak lé mové. Li détès voir bann zumin soufèr. Dan le pasé, kan li té voi la méchansté partou su la tèr, té fé souf a li (Jenèz 6:5, 6). É li la pa chanjé (Malaki 3:6). La Bib i ansègn ke Bondieu i fé vréman in kont avèk ou (lir 1 Pièr 5:7).

La Bib i ansègn ke Jéova i ièm a nou in bonpe é ke li lé le Kréateur de lunivèr.

12, 13. a) Pou kosa nou ièm bann domoun ? É kosa nou resan kan nou voi bann soufrans ke néna dan le monn ? b) Pou kosa nou pe èt sur ke Bondieu va mèt fin tout bann soufrans é linjustis ?

12 La Bib i di osi ke Bondieu la kré a nou parèy ke li (Jenèz 1:26). Sa i ve dir ke li la fé a nou avèk lé mèm kalité ke li. Donk, si out keur i fé mal kan ou voi bann zinosan soufèr, lé sur ke Bondieu i doi èt ankor plu tris ke ou ! Koman nou pe èt sur de sa ?

13 La Bib i ansègn ke « Bondieu lé amour » (1 Jan 4:8). Tout sak li fé, li fé sa par amour. É si nou ièm, sé parske Bondieu i ièm. Si ou lavé le pouvoir pou mèt fin bann soufrans é bann linjustis, èske ou noré fé ? Oui, parske ou ièm bann domoun. Sé Bondieu ke néna le pouvoir pou mèt fin bann soufrans é linjustis. Li va fèr sa, parske li ièm a nou ! Ou pe èt sur  ke tout bann promès Bondieu ke lé éspliké o débu liv la, i sar réalizé ! Mé pou kroir bann promès la, ou la bezoin mieu konèt Bondieu.

BONDIEU I VE KE OU KONÉ A LI

Si ou ve devnir kamarad avèk in moun, ou di a li koman ou apèl. Dan la Bib, Bondieu i di a nou kosa i lé son non.

14. a) Kosa i lé le non Bondieu ? b) Koman nou koné ke nou doi utiliz le non Bondieu ?

14 Kan ou ve devnir kamarad avèk in moun, kosa ou va dir a li an premié ? Out non. É Bondieu, èske li néna in non ? In bonpe relijion i di ke son non sé Bondieu ou Sénieur. Mé sa, lé pa bann non. Tousa, lé bann tit, kom « roi » oubien « prézidan ». Bondieu i di ke son non sé Jéova. Nou lir an Psom 83:18 : « Ou, ke i apèl Jéova, ou lé, a ou touseul le Tré O su tout la tèr ! » Bann zom ke la ékri la Bib, la utiliz le non Bondieu plus 7 000 foi. Jéova i ve ke ou koné son non é ke ou utiliz a li. Li di a ou son non, pou ke ou devien son kamarad.

15. Kosa i ve dir le non « Jéova » ?

15 Le non Bondieu néna in sinifikasion ke lé vréman inportan. Son non i ve dir ke li lé kapab réaliz son projé é tout son bann  promès. La poin rien i pe arèt a li. Rienk Jéova touseul i pe port le non la *.

16, 17. Kosa i ve dir le tit a) « Toupuisan » ? b) « Roi étèrnèl » ? c) « Kréateur » ?

16 Révélasion 15:3 i di : « Tout sak ou la fé lé gran é inkroiyab, Jéova Dieu, le Toupuisan. Out bann  zaksion lé droit é vré, Roi étèrnèl. » Kosa i ve dir le tit « Toupuisan » ? Sa i ve dir ke dan lunivèr, Jéova lé le plu puisan. É kosa i ve dir le tit « Roi étèrnèl » ? Sa i ve dir ke li la toujour égzisté. Le Psom 90:2 i ésplik ke li égzis depui toultan é ke li va égzisté pou toujour. Èske sa lé pa inkroiyab ?

17 Néna rienk in seul kréateur : Jéova. Révélasion 4:11 i di : « Ou mérit Jéova, oui nout Bondieu, de gingn la gloir, é loneur, é la puisans, parske ou la kréé tout zafèr, é akoz out volonté, zot la égzisté é la été kréé. » Kosa i ve dir le tit « Kréateur » ? I ve dir ke sé Jéova ke la kréé tout zafèr : Bann zanj, bann zétoil, bann frui, bann zanimo é tout lé zot choz !

 ÈSKE OU PE ÈT KAMARAD AVÈK JÉOVA ?

18. Désèrtin i pans ke zot i poura jamé èt bann kamarad Bondieu. Akoz sa ? É kosa la Bib i di la d’su ?

18 Kan désèrtin i dékouv bann kalité ke Jéova néna, zot i di : « Bondieu lé tèlman puisan, tèlman gran é tèlman loin. Pou kosa li va fé in kont avèk moin ? » Mé èske Jéova i ve ke ou pans komsa ? Non ! Li ve èt out Kamarad. Li ve èt proch de ou. La Bib i di ke li lé « pa loin de chakèn d’nou » (Akt 17:27). É li ve ke ou raproch a ou koté li. Li promèt ke si ou fé sa, « li va aproch koté zot » (Jak 4:8).

19. a) Koman ou pe devnir kamarad Bondieu ? b) Kèl kalité Jéova ou ièm le plus ?

19 Koman ou pe devnir kamarad Bondieu ? Jézu la di : « Ala kosa i ve dir la vi pou toultan : ke zot i aprann konèt a ou, le seul vré Bondieu, é sèk ou la anvoiyé, Jézu Kris » (Jan 17:3). Kontinué aprann konèt Jéova é Jézu. Alor, ou poura avoir la vi étèrnèl, sétadir viv pou toultan. Par égzanp, ou la finn déja aprann ke « Bondieu lé amour » (1 Jan 4:16). Mé li néna dot kalité. La Bib i di ke li lé« plin de pitié é de tandrès, li pran pa la kolèr vitman é li lé gran an amour fidèl é an vérité » (Égzod 34:6). Li lé « bon é pré pou pardoné » (Psom 86:5). Li lé pasian é fidèl osi (2 Pièr 3:9 ; Révélasion 15:4). Kan ou lir la Bib, ou va aprann ankor plus de choz su Bondieu é su son bann kalité.

20, 21. Koman ou pe èt kamarad Bondieu alor ke ou voi pa li ?

20 Koman ou pe èt kamarad Bondieu alor ke ou voi pa li ? (Jan 1:18 ; 4:24 ; 1 Timoté 1:17). Kan ou  lir la Bib, ou va aprann mieu konèt a li (Psom 27:4 ; Romin 1:20). É plus ou va konèt bann zafèr su li, plus ou va èm a li é plus out lamitié avèk li i sra plu for.

In papa i ièm son bann zanfan. Nout Papa dann sièl i ièm a nou ankor plus.

21 Ou va konprann ke Jéova lé nout Papa : li la donn a nou la vi, é li ve le méyeur vi posib pou nou (Matieu 6:9). Sé sa ke tout bann papa i souèt pou zot zanfan, parske banna i ièm a zot (Psom 36:9). La Bib i ansègn ke ou pe devnir kamarad Bondieu (Jak 2:23). Jéova, le Kréateur de lunivèr, i ve ke ou devien son kamarad !

22. Si désèrtin i ve ke ou arèt étudié la Bib, kosa ou doi fèr ?

22 Petèt, désèrtin i voudré ke ou arèt étudié la Bib. Petèt ke zot la peur ke ou chanj relijion. Mé lès pa pèrsonn anpèch a ou devnir kamarad avèk Bondieu. Jéova lé le méyeur Ami ke ou pe avoir.

23, 24. a) Pou kosa ou doi kontinué poz bann késtion ? b) Kosa i parl dann chapit 2 ?

23 Nora detroi zafèr dan la Bib ke ou va pa konprann. Pa bezoin ou la ont poz bann késtion oubien demann de lèd. Jézu la di ke nou doi èt kom bann ti marmay (Matieu 18:2-4). Bann marmay lé pa orgeyeu é zot i poz in bonpe késtion. Bondieu i ve ke ou trouv bann répons. Pou voir si sak ou aprann sé bien la vérité, i fo ke ou étudi la Bib avèk sèryeu.(lir Akt 17:11).

24 Le méyeur moiyin pou aprann konèt Jéova sé étudié la Bib. Dann chapit 2, ou va aprann pou kosa la Bib lé pa parèy dot liv.

^ § 15 Si la poin le non « Jéova » dan out bib oubien si ou ve konèt plus kosa le non Bondieu i ve dir é su la fason ke i pronons a li, alor lir la not n1.