Alé voir le kontenu

Alé voir le sou-menu

Alé voir le somèr

Bann Témoin Jéova

Kréol Rénioné

Kosa la Bib i ansègn a nou ?

 CHAPIT 4

Kisa i lé Jézu Kris ?

Kisa i lé Jézu Kris ?

1, 2. a) Èske i sufi konèt le non in moun sélèb pou dir ke nou koné a li bien ? Ésplik. b) Kosa bann domoun i di su Jézu ?

DAN le monn, néna in bonpe domoun ke lé konu. Petèt ou koné le non in moun ke lé sélèb. Mèm si ou koné son non, i ve pa dir ke ou koné a li bien. Ou koné pa tout sak la éspasé dan son vi é kisa li lé vréman.

2 Na 2 000 an de sa, Jézu Kris la viv su la tèr (regard la not n12). Ou la finn surman antann parlé de li. Mé la plupar bann domoun, i koné pa kisa li lété vréman. Désèrtin i di ke li lété in om bon. Dot i di ke li lété in profèt. Dot ankor i kroi ke li lé Bondieu. É ou mèm, kosa ou pans de li ?

3. Pou kosa lé inportan ke ou koné Jéova é Jézu.

3 Lé inportan konèt la vérité su Jézu. Pou kosa ? La Bib i di : « Ala kosa i ve dir la vi pou toultan : ke zot i aprann konèt a ou, le seul vré Bondieu, é sèk ou la anvoiyé, Jézu Kris» (Jan 17:3).Si ou koné la vérité su Jéova é Jézu, ou poura viv pou toultan dan in paradi su la tèr (Jan 14:6). An plus, konèt Jézu i sra vréman util pou ou ojourdui. Jézu la mont a nou koman viv é konport a nou avèk lé zot. Na poin méyeur légzanp ke li (Jan 13:34, 35).  Dan le chapit 1, nou la aprann la vérité su Bondieu. Dann chapit la, nou sar konèt sak la Bib i ansègn su Jézu.

« NOU LA TROUV LE MÉSI ! »

4. Kosa i ve dir bann tit « Mési » é « Kris » ?

4 Lontan avan la nésans Jézu, Jéova lavé promèt ke li va anvoiy le Mési ou le Kris, su la tèr. Le mo « Mési » i vien de lébreu é le mo « Kris » i vien du grèk. Bann tit la i ve dir « oin », sétadir choizi par Bondieu pou in rol éspésial. Tout bann promès ke Jéova la di, va réalizé gras le Mési.

5. Èske bann disip Jézu té sur ke Jézu lété le Mési ?

5 Bann disip Jézu lété sur ke li lété le Mési (Jan 1:41). Par égzanp, lapot Pièr la di avèk li : « Ou lé le Kris » (Matieu 16:16). É nou, koman nou pe èt sur ke Jézu lé bien le Mési ?

6. Koman Jéova la èd bann domoun sinsèr pou rekonèt le Mési ?

6 Lontan avan la nésans Jézu, bann profèt Bondieu la donn bonpe détay su le Mési pou ke bann domoun i ariv rekonèt a li. Alon prann in légzanp : I demann a ou alé chèrch in moun ke ou koné pa dan in laréopor ke lé plin. Si i ésplik a ou le moun koman i lé, ou pouré rekonèt a li. Lé parèy, Jéova la utiliz son bann profèt pou donn a nou bann détay su sak le Mési va fèr é sak va ariv a li. Kom tout bann profési la réalizé, sa i èd bann moun sinsèr pou konprann ke Jézu lé le Mési.

7. Ou pe donn deu profési ke i prouv ke Jézu lé bien le Mési.

 7 Ala deu profési su le Mési : 1) Le profèt Mika la anonsé 700 zan a lavans ke le Mési va nèt dan le ti vil Bètléèm (Mika 5:2). É sé la mèm ke Jézu lé né ! (Matieu 2:1, 3-9). 2) Le profèt Danièl la anonsé ke le Mési va arivé dan lané 29 (Danièl 9:25) (regard la not n13). Sé deu profési la, kom dot ankor, i prouv ke Jézu lé bien le Mési promi.

Kan li la fé batiz a li, Jézu lé devnu le Mési, oubien le Kris.

8, 9. Kosa la éspasé kan Jézu la pran son batèm ? É kosa i prouv sa ?

8 Jéova la fé savoir tré klèrman ke Jézu lété le Mési. Li lavé promèt Jan batis ke li té sar donn a li in sign pou rekonèt le Mési. Jan la vu se sign kan Jézu la pran son batèm. Dan lané 29, Jézu la demann Jan pou batiz a li dan in gran rivièr, le Jourdin. La Bib i rakont kosa la éspasé : « Apré ke la batiz a li, toutsuit Jézu la sort sou d’lo ; é, regard, le sièl la rouvèr, é li la vu désann kom in kolonb léspri Bondieu ke té i vien su li. Regard ! Lavé [...] in voi ke la sort dann sièl é la di : “Sa lé mon Garson, le bien émé, ke ma la aprouvé” » (Matieu 3:16, 17). Kan Jan la vu é antandu sign la, li la konpri ke Jézu lété le Mési (Jan 1:32-34). Le jour la, kan Jéova la anvoiy son léspri su Jézu, li lé devnu le Mési.  Jézu lété sak Jéova lavé choizi pou èt Gid é Roi (Izai 55:4).

9 Bann profési la Bib, sak Jéova la di é bann sign ke li la doné le jour le batèm Jézu, i prouv ke Jézu lé bien le Mési. Mé ousa Jézu i sort ? Koman li lété ? Alon voir kosa la Bib i di.

 KÈL KOTÉ JÉZU I SORT ?

10. Ousa Jézu la viv avan vnir su la tèr ?

10 La Bib i ansègn ke Jézu la viv pandan lontan dann sièl, avan ni su la tèr. Mika la di ke le Mési té i égzis « depui dann tan lontan » (Mika 5:2). É Jézu la di pluzieur foi ke li la viv dann sièl avan èt in umin (lir Jan 3:13, Jan 6:38, 62 é Jan 17:4, 5). Avan ke Jézu i vien su la tèr, le lien ke li lavé avèk Jéova lété unik é tré for.

11. Pou kosa Jéova i ièm bokou Jézu ?

11 Jéova i ièm bokou Jézu parske la kré a li an premié. Sé pousa ke i apèl Jézu « le premié né dan tout la kréasion » (Kolosien 1:15). An plus, Jéova i ièm bokou Jézu parske Jézu lé le seul ke Jéova la kréé dirèkteman. Sé pousa ke i apèl Jézu le « Fis unik anjandré » * (Jan 3:16). Jézu lé osi le seul ke Jéova la utilizé pou kréé tout lé zot choz (Kolosien 1:16). A li touseul lé aplé « la Parol ». I apèl a li komsa parske Jéova la utiliz a li pou donn bann mésaj é bann zinstruksion pou bann zanj é bann zumin (Jan 1:14).

12. Koman nou koné ke Jézu é Bondieu sé pa le mèm pèrsonn ?

12 Désèrtin, i kroi ke Jézu é Bondieu lé le mèm pèrsonn (regard la not n14). Mé lé pa sa ke la Bib i ansègn. Li di ke Jézu la été kréé. Li néna donk in komansman. Mé Bondieu ke la kréé tout zafèr, la poin in komansman (Psom 90:2). Jézu, le  Garson Bondieu, la jamé ésèy prann la plas son Papa. Dapré la Bib, le Pèr lé plu gran ke le Garson (lir Jan 14:28 ; 1 Korintien 11:3). Jéova lé le seul « Bondieu Toupuisan » (Jenèz 17:1). Li lé la pèrsonn le plu inportan et le plu puisan dan lunivèr.

13. Pou kosa la Bib i di ke Jézu lé « la resanblans le Bondieu invizib » ?

13 Avan la kréasion le sièl é la tèr, Jéova é Jézu la travay min dan la min pandan bann miliar d’zané. In amour tré for la grandi ant zot deu pandan pèryod la ! (Jan 3:35 ; 14:31). Jézu la imit bann kalité son Papa tèlman bien, ke la Bib i apèl a li « la resanblans le Bondieu invizib » (Kolosien 1:15).

14. Koman Jézu lé devnu in umin ?

14 Jézu lété pré pou kit le sièl é pou devnir in umin. Koman sa lété posib ? Jéova la fé in mirak : li la transfèr la vi son garson dan le vant in fiy vièrj ke té apèl Mari. Jézu lavé donk pa bezoin in papa umin. Mari la donn nésans in garson parfé. Èl la apèl a li Jézu (Luk 1:30-35).

KOMAN JÉZU LÉTÉ ?

15. Koman ou pe mieu konèt Jéova ?

15 Bann liv Matieu, Mark, Luk é Jan lé aplé bann Zévanjil. Kan ou va lir bann liv la, ou va aprann bokou de choz su Jézu, son vi é son bann kalité. Jézu la di : « Sak la vu a moin la vu le Pèr osi » (Jan 14:9). Jézu la di sa, parske li resanm in bonpe son Papa. Sak ou lir su Jézu va èd a ou mieu konèt Jéova.

16. a) Kosa Jézu la ansénié ? b) Ousa Jézu té i tir son bann zansègnman ?

 16 In bonpe domoun té apèl Jézu « Lansénian » (Jan 1:38 ; 13:13). Parmi bonpe zafèr inportan ke li la ansénié, néna « la bonn nouvèl le roiyom ». Kosa i lé se Roiyom la ? Sé in gouvèrnman ke lé dann sièl é ke Bondieu va utilizé pou dirij la tèr. Se gouvèrnman va aport bann bienfé pou bann zumin ki obéi Bondieu (Matieu 4:23). Tout sak Jézu té ansègn té i vien de Jéova. Jézu la di : « Sak mi ansègn i vien pa de moin, mé i sort avèk sak la anvoiy a moin » (Jan 7:16). Li té koné ke Jéova i voulé ke bann domoun i antan se bonn nouvèl : le Roiyom Bondieu va dirij la tèr.

17. a) Kèl landroi Jézu té ansègn ? b) Pou kosa Jézu la fé in bonpe zéfor pou ansègn bann domoun ?

17 Ousa Jézu té ansègn bann domoun ? Partou ousa li té trouv banna : zot kaz, dan la kanpagn, dan bann vil, dan bann vilaj, dan bann marché é landroi ousa té ador Bondieu. Li té atann pa ke bann domoun té i vien voir a li. Souvan, sé li ke té sar koz èk banna (Mark 6:56 ; Luk 19:5, 6). Jézu la fé in bonpe zéfor pou ansègn a zot. É li la pas bokou d’tan pou préché. Pou kosa ? Parske li té koné ke sé sa mèm ke Bondieu té i ve é parske li obéi toujour son Papa (Jan 8:28, 29). Jézu té i prèch osi parske li lavé pitié bann domoun (lir Matieu 9:35, 36). Li la bien vu ke bann chèf relijieu té ansègn pa la vérité su Bondieu é su son Roiyom. É li voulé ke in gran kantité domoun i antan la bonn nouvèl.

18. Kèl kalité ou ièm le plus ché Jézu ?

 18 Jézu té ièm bann domoun. Li té sousi a li pou lé zot. Li té janti é lété fasil koz ansanm li. Mèm bann marmay té ièm èt avèk li (Mark 10:13-16). Jézu lété toujour jus. Li té détès bann domoun malonèt é linjustis (Matieu 21:12, 13). Dan son tan, bann madam té pa trété avèk réspé é zot lavé poin le droi fé sèrtin d’choz. Mé Jézu la toujour réspèk a zot (Jan 4:9, 27). Jézu lavé osi in keur sinsèr é pa orgeyeu. Par égzanp, in soir li la lav le pié son bann zapot. Pourtan, dabitud, sé bann sèrviteur ke té doi fé travay la (Jan 13:2-5, 12-17).

Jézu té prèch partou ousa li té trouv bann domoun.

19. Kèl égzanp i mont ke Jézu té ve èd bann domoun ?

19 Jézu té koné kosa bann domoun lavé bezoin é li té ve èd a zot. Sé pousa li té utiliz la puisans Bondieu pou géri banna (Matieu 14:14). Par égzanp, in jour, in lépreu la di avèk Jézu : « Si ou ve, ou pe rann a moin pur. » Kan Jézu la vu son soufrans, li la pran pitié le lépreu é li té ve èd a li. Jézu la touch le moun é la di : « Mi ve. Devien pur. » É le lépreu lété géri ! (Mark 1:40-42). Èske ou pe imajiné kosa li la resanti ?

JÉZU LA TOUJOUR ÉTÉ FIDÈL SON PAPA

20, 21. Pou kosa nou pe dir ke Jézu lé le méyeur légzanp dan lobéisans pou Bondieu ?

20 Dan lobéisans pou Bondieu, Jézu la donn le méyeur légzanp. Mèm kan la situasion lété difisil oubien kan son bann zènmi té fé a li du mal, li la rès fidèl son Papa. Par égzanp, kan Satan la voulu fé  pèch a li, li la rézisté (Matieu 4:1-11). Désèrtin dan son fami té kroi pa ke li lété le Mési. Banna té i di ke li lété fou. Mé Jézu la kontinué fé sak son Papa té i ve (Mark 3:21). Kan son bann zènmi té fé souf a li, li té rès fidèl Bondieu é jamé li la ésèy fé a zot le mal (1 Pièr 2:21-23).

21 Jézu la bokou soufèr, avan son mor. Mé li la gard son fidélité pou Jéova (lir Filipien 2:8). Réfléchi tout sak li la suporté le jour son mor. Li la été arété. Domoun la akuz a li ke li té parl an mal su Bondieu. Bann juj malonèt la kondann a li. Domoun parmi la foul té ri a li. Bann solda la maltrèt  a li é la klout a li su in poto. Jus avan son mor, Jézu la krié : « Sa mèm la réalizé ! » (Jan 19:30). Mé troi jour apré, Jéova la résusit Jézu é la donn a li in kor spirituèl sétadir in kor parèy bann zanj (1 Pièr 3:18). Detroi semèn apré, Jézu la artourn dann sièl é li la « asiz a droit Bondieu ». Aprésa, li la atann ke Bondieu i fé a li Roi (Ébreu 10:12, 13).

22. Parske Jézu la rès fidèl son Papa, kosa nou pe avoir ojourdui ?

22 Parske Jézu lé résté fidèl son Papa, nou néna la posibilité viv pou toultan dann Paradi su la tèr. Sé sak Jéova i ve. Dan le chapit apré, nou va voir pou kosa la mor Jézu va pèrmèt a nou viv pou toultan.

^ § 11 La Bib i di ke Jéova lé in Papa parske li lé le Kréateur (Izai 64:8). I apèl Jézu Garson Bondieu parske Jéova la kré a li. Bann zanj é Adan lé aplé osi « Garson Bondieu » (Job 1:6 ; Luk 3:38).