Alé voir le kontenu

Alé voir le somèr

 CHAPIT 5

La ranson : le plu gran kado ke Bondieu la fé

La ranson : le plu gran kado ke Bondieu la fé

1, 2. a) Kèl kado na la valeur pou ou ? b) Pou kosa la ranson lé le plu gran kado ke Bondieu la donn a nou ?

KOSA i lé le plu gran kado ke ou la ganié dan out vi ? In kado la pa bezoin kout chèr pou avoir la valeur. Kan in kado i fé a ou tré plézir ou ke lé vréman util pou ou, lé sur ke ou aprési a li in bonpe.

2 Bondieu la donn a nou in bonpe kado. Mé néna in kado ke nou la vréman bezoin. Sé le plu gran kado ke Bondieu la donn bann zumin. Dann chapit la, nou va aprann ke Jéova la anvoiy Jézu sur la tèr, pou ke nou gingn viv pou toultan (lir Matieu 20:28). Kan li la donn Jézu an ranson, li la montré ke li ièm a nou vréman.

KOSA I LÉ LA RANSON ?

3. Akoz nou mor ?

3 La ranson lé le moiyin ke Jéova la prévu pou libèr bann zumin du péché é la mor (Éfézien 1:7). Pou konprann pou kosa lavé bezoin la ranson, nou doi konèt kosa la éspasé néna dé milié d’zané dan le jardin Lédèn. Nout premié paran, Adan é Èv la péché. É kom zot la péché, zot lé mor. É nou mor parske banna la transmèt a nou le péché (regard la not n9).

4. Kisa lété Adan ? É kosa Jéova lavé donn a li ?

 4 Jéova la kréé le premié om, Adan, é la donn a li in nafèr ke na in bonpe la valeur : in vi parfé. Adan lavé in lintélijans parfé é in kor parfé. Li té tonm jamé malad, li té viéi pa é li té doi pa konèt la mor. Kom Jéova lavé kréé Adan, li lété kom in papa pou li (Luk 3:38). Jéova té i koz ansanm li souvan. La ésplik a li klèrman sak li té doi fèr. É la donn a li in gayar travay (Jenèz 1:28-30 ; 2:16, 17).

5. La Bib i di ke Adan la été kréé « a la resanblans Bondieu ». Kosa sa i ve dir ?

5 Adan la été kréé « a la resanblans Bondieu » (Jenèz 1:27). Li la été kréé avèk bann kalité kom sak Bondieu : par égzanp lamour, la sajès, la justis é la puisans. Bondieu la donn a li osi la libèrté pou pran bann désizion. Adan lété pa in robo. Li té i pe choizi fé le bien ou le mal. Si li lavé choizi obéi Bondieu, li noré viv pou toultan dann Paradi.

6. a) Kan Adan la dézobéi Bondieu, kosa li la pèrd ? b) Kosa la dézobéisans Adan i amèn pou nou ?

6 Kan Adan la dézobéi Bondieu, li la été kondané a mor. Li la pèrd bokou d’choz : son gran lamitié avèk Bondieu, son vi parfé é le paradi ousa li té viv (Jenèz 3:17-19). Kom Adan é Èv la choizi dézobéi Bondieu, lavé pu léspoir pou zot. Akoz sak Adan la fé, « le péché lé rantré dan le monn é le péché la amèn la mor, é [...] sé komsa ke tout domoun i pas par la mor parske tout lavé péché » (Romin 5:12). Kan Adan la péché, li la « vann » a li kom lésklav pou le péché é la mor. É li la « vann » a nou kom lésklav  an mèm tan ke li (Romin 7:14). Èske néna in léspoir pou nou ? Oui. Jéova la donn in ranson !

7, 8. Kosa i lé in ranson ?

7 Kosa i lé in ranson ? In ranson lé le pri ki fo péyé pou libèr in moun ou pou rachèt in nafèr. Dan la Bib, in ranson lé osi le pri ki fo péyé pou répar bann déga.

8 Kan li la péché, Adan la provok bann gro déga é li la transmèt a nou la mor. Tout bann zumin lé inparfé. Donk, pèrsonn noré pu fourni le pri ki fo péyé pou répar bann déga la. Mé Jéova la fourni le moiyin pou libèr a nou du péché é la mor. Alon voir koman li la fourni la ranson é kèl bienfé sa i aport a nou.

KOMAN JÉOVA LA FOURNI LA RANSON ?

9. Kosa i falé doné an ranson ?

9 Pèrsonn parmi nou noré pu péyé la ranson. Akoz ? Parske nout tout lé inparfé (Psom 49:7, 8). É Adan lavé pèrd in vi parfé. Donk, la ranson té doi èt la vi in not moun parfé. Sé pousa ke i apèl sa la « ranson ki koréspon » (1 Timoté 2:6). La ranson té doi avoir le mèm valeur ke la vi Adan lavé pèrd.

10. Koman Jéova la fourni la ranson ?

10 Koman Jéova la fourni la ranson ? Li la anvoiy su la tèr son Garson, ke li té ièm bokou é ke li lavé kréé an premié (1 Jan 4:9, 10). Jézu la bien voulu kit son Papa é le sièl, ousa li té viv (Filipien 2:7). Depui le sièl, Jéova la transfèr la vi Jézu su la tèr. Kan Jézu lé né, li lété in moun parfé, san péché (Luk 1:35).

Jéova la donn son Garson an ranson pou nou.

11. Koman in seul om lé devnu in ranson pou tout bann zumin ?

 11 Kom le premié om, Adan, la dézobéi Jéova, alor tout bann zumin na pu okin moiyin pou avoir in vi parfé. Mé èske in seul om té i gingn sov tout bann désandan Adan de la mor ? Oui (lir Romin 5:19). Jézu la jamé péché é li la donn son vi parfé an ranson (1 Korintien 15:45). Son vi parfé té i pe sov tout bann désandan Adan de la mor (1 Korintien 15:21, 22).

12. Pou kosa i falé ke Jézu i souf komsa ?

12 La Bib i ésplik ke Jézu la bokou soufèr avan son mor. La fouèt a li avèk méchansté, la klout a li su in poto é li lé mor lantman é dan la douleur (Jan 19:1, 16-18, 30) (regard la not n15). Pou kosa i falé ke Jézu té i souf komsa ? Parske Satan lavé di ke, si in moun i travèrs bann zépreuv difisil, li va pa rès fidèl Bondieu. Jézu la prouvé ke in moun parfé i pe rès fidèl Bondieu, mèm kan li souf bokou. Lé sur, Jéova lété tré kontan d’Jézu ! (Provèrb 27:11).

13. Koman la ranson la été péyé ?

13 Koman la ranson la été péyé ? Dan lané 33, le 14 Nizan (in moi dan le kalandrié juif), Jéova la pèrmèt ke bann zènmi Jézu i mèt a li a mor (Ébreu 10:10). Troi jour apré, Jéova la résusit Jézu, mé pa kom in umin mé kom in léspri. Aprésa, Jézu lé retourné dann sièl é li la prézant Jéova la ranson : la valeur son vi parfé. Sétadir, li la donn Bondieu son droi pou viv kom in umin parfé su la tèr. É Bondieu la redonn sa bann désandan Adan (Ébreu 9:24).  Asteur ke la ranson lé péyé, nou pe èt libéré du péché é la mor (lir Romin 3:23, 24).

BANN BIENFÉ KE LA RANSON I PE APORT A NOU

14, 15. Kosa nou doi fèr pou ke nout péché lé pardoné ?

14 Nou pe profit le plu gran kado Bondieu depui koméla mèm, é nou poura osi an profité dan lavnir. Alon voir koman.

15 Nout bann péché lé pardoné. Lé pa fasil fé le bien toultan. Nou komèt bann zéreur, é défoi nou di oubien nou fé in nafèr ke lé mal. Kosa nou doi fèr pou èt pardoné ? Nou doi vréman regrété sak nou la fé. An plus, nou doi avoir in keur sinsèr é pa orgeyeu é demann Jéova pardonn a nou. Alor nou pe èt sur ke nout bann péché i sra pardoné (Kolosien 1:13, 14 ; 1 Jan 1:8, 9).

16. Kosa nou doi fèr pou avoir in konsians klèr ?

16 Nou néna in konsians klèr. Kan nout konsians i di a nou ke nou la fé in mové zafèr, nou san a nou koupab. Défoi, nou pans mèm ke nou vo pa rien. Mé nou doi pa dékouraj a nou. Jéova i ve ke nou parl avèk li de nout bann poin fèb é nout bann problèm (Ébreu 4:14-16). Nou pe èt sur ke, si nou supli a li pou pardonn a nou, li va ékout a nou é li va pardonn a nou (Ébreu 9:13, 14). Nou pe alor èt an pé avèk Bondieu.

17. Gras la ranson, kèl bienfé nou pe avoir ?

17 Nou na léspoir viv pou toultan. « Le konsékans pou le péché, sé la mor, mé le kado ke Bondieu i donn, sé la vi pou toultan par Kris Jézu » (Romin 6:23). Kom Jézu lé mor pou nou, nou  na léspoir viv pou toultan é avoir in santé parfé (Révélasion 21:3, 4). Mé kosa nou doi fèr pou gingn bann bienfé la ?

KOMAN OU MONT KE LA RANSON NA LA VALEUR POU OU

18. Koman nou koné ke Jéova i ièm a nou ?

18 Kan i fé a nou in joli kado, sa i fé a nou vréman plézir. La ranson na plus la valeur ke ninport kèl kado ke nou pe ganié. Nou devré donk mont Jéova ke nou ièm bokou son kado. Jan 3:16 i di ke « Bondieu la tèlman émé le monn ke li la donn son seul Garson ke li la kréé dirèkteman ». Jéova i ièm a nou tèlman ke li la donn a nou sak lavé plus la valeur pou li : son Garson. É kom Jézu lété pré pou mor pou nou, sa i mont ke li ièm a nou osi (Jan 15:13). La ranson i devré prouv a ou ke Jéova é Jézu i ièm a ou (Galat 2:20).

Si nou aprann konèt Jéova, nou va èm a li ankor plus é nou va devnir son kamarad.

19, 20. a) Koman ou pe devnir kamarad Jéova ? b) Koman montré ke ou na la foi dan la ranson ?

19 Nou la aprann ke Jéova i ièm a nou in bonpe. Mé koman devnir son kamarad ? Lé pa fasil èm in moun ke nou koné pa. Jan 17:3 i di ke nou pe aprann konèt Jéova. Si ou aprann konèt a li, ou va èm a li ankor plus, ou voudra fé plézir a li é ou va devnir son kamarad. Donk, kontinu étudié la Bib (1 Jan 5:3).

20 Mèt out foi dan la ranson. La Bib i di ke « sak i mèt la foi dan le Garson na la vi pou toultan » (Jan 3:36). Kosa i ve dir « mèt la foi » dan la ranson ? Sa i ve dir fé sak Jézu i demann a nou (Jan 13:15). I sufi  pa dir ke nou kroi an Jézu. Nou doi montré par nout bann zaksion ke nou na foi an li. Dann Jak 2:26, nou lir : « La foi san bann zaksion lé mor. »

21, 22. a) Pou kosa nou doi asis chak ané o Mémoryal la mor Jézu ? b) Kosa nou va voir dann chapit 6 é 7 ?

21 Asis o Mémoryal la mor Jézu. Jézu i ve ke nou rapèl a nou ke li la donn son vi parfé an ranson pou nou. Le soir avan son mor, li la di avèk son bann disip : « Kontinué fé sa an souvnir d’moin » (lir Luk 22:19). Sé sa mèm ke bann Témoin Jéova i fé tou lé zan. Zot i sélèb in lévènman ke i apèl « Mémoryal » ou « Repa le Sénieur » (1 Korintien 11:20 ; Matieu 26:26-28). Kan ou asis o Mémoryal, ou mont ke ou aprési la ranson é le gran lamour ke Jéova é Jézu néna pou ou (regard la not n16).

22 La poin in kado na plus la valeur ke la ranson (2 Korintien 9:14, 15). Se kado inportan va mèm aport bann bienfé pou domoun par milion ke lé mor. Bann chapit 6 é 7 va éspliké koman sa lé posib.