Alé voir le kontenu

Alé voir le somèr

 CHAPIT 3

Kèl projé Bondieu néna pou bann zumin ?

Kèl projé Bondieu néna pou bann zumin ?

1. Kèl projé Bondieu néna pou bann zumin ?

BONDIEU néna in gayar projé pou bann zumin (regard la not n6). Li la kréé le premié om é le premié fam, Adan é Èv, pou ke zot i viv dan in joli jardin. Son projé lété ke banna i fé bann zanfan, ke zot i transform tout la tèr an paradi é i okup a zot bann zanimo (Jenèz 1:28 ; 2:8, 9, 15).

2. a) Koman nou koné ke Jéova va fé sak li la prévu ? b) Dapré la Bib, kisa va viv pou toultan su la tèr ?

2 Èske ou pans ke in jour nou va viv dan in paradi ? Jéova la di : « Moin la di [...], sé sak mi sar fé osi » (Izai 46:9-11 ; 55:11). Donk, li va fé sak li la prévu, é na poin rien i pe arèt a li. Li ésplik a nou ke li la pa kréé la tèr « pou rien » (Izai 45:18). Li ve ke la tèr lé abité. Par kisa ? É pou konbien d’tan ? La Bib i réponn : « Sak i obéi Bondieu va posèd la tèr, é su li zot va viv pou toultan » (Psom 37:29 ; Révélasion 21:3, 4).

3. Kan nou voi ke bann zumin i tonm malad é i mor, kèl késtion nou pe poz a nou ?

3 Ojourdui bann zumin i tonm malad é i mor. Dan in bonpe péi, zot i fé la gèr ant zot é zot i tué inn é lot. Mé lé pa sak Bondieu té i ve. Alor kosa la arivé ? Néna rienk la Bib ki ésplik sa.

 BONDIEU NÉNA IN LÈNMI

4, 5. a) Kisa la utiliz in sèrpan pou koz avèk Èv ? b) Koman kèlkin ke lé onèt i pe devnir in voleur ?

4 La Bib i di ke Bondieu néna in lènmi. Sé in lanj ke lé aplé « Diab » é « Satan » (regard la not n7). Satan la utiliz in sèrpan pou koz avèk Èv dann jardin Lédèn (Révélasion 12:9 ; Jenèz 3:1). Li la fé kroir a èl ke lété le sèrpan ke té i koz.

5 Kisa la kréé Satan le Diab ? Èske sé Bondieu ? Non ! Kan Bondieu la prépar la tèr pou Adan é Èv, lavé in bonpe zanj dann sièl (regard la not n8). Parmi bann zanj la, lavé inn ke la chanjé é li lé devnu le Diab (Job 38:4, 7). Koman sa lé posib ? Alon pran in légzanp : Koman kèlkin ke lé onèt i devien in voleur ? Kan li lé né, sé pa in voleur. Mé in jour, li ve gingn in nafèr ki apartien pa li. Kom li tir pa sa dan son tèt, son mové dézir i devien ankor plu for. Aprésa, kan li néna lokazion, li vol sak li té ve avoir. Li la chanjé : li lé devnu in voleur (lir Jak 1:13-15).

6. Koman in lanj lé devnu in lènmi Bondieu ?

6 Sé sa mèm ke la ariv lanj la. Kan Jéova la kréé Adan é Èv, li la di a zot fé bann zanfan é « ranpli la tèr » (Jenèz 1:27, 28). Petèt ke lanj la té i pans : « Olèrk ador Jéova, tout bann zumin la i pouré ador a moin ! » Plus li té i pans sa, plus li té ve sak i apartien Jéova. Li té ve ke bann zumin i ador a li. Alor li la ramas manteur avèk Èv é li la tronp a èl (lir Jenèz 3:1-5). Sé komsa ke li lé devnu Satan le Diab, in lènmi Bondieu.

7. a) Pou kosa Adan é Èv lé mor ? b) Pou kosa nou viéi é nou mor ?

 7 Adan é Èv la dézobéi Jéova é zot la manj le frui (Jenèz 2:17 ; 3:6). Zot la péché kont Jéova (regard la not n9). É zot lé mor, kom Jéova lavé di (Jenèz 3:17-19). Kom bann zanfan Adan é Èv lété pécheur, zot lé mor osi (lir Romin 5:12). Pou konprann pou kosa bann zanfan Adan é Èv lété pécheur, alon pran in légzanp : Si ou fé bann gato dan in moul ke lé kabosé, bann gato nora le mèm bos ke le moul. Kan Adan la dézobéi Jéova, li lé devnu pécheur. Kom Adan lé nout zansèt, nou tout nou lé pécheur. Nou nana le mèm « bos » ke li. É kom nout tout nou lé pécheur, nou viéi é nou mor (Romin 3:23).

8, 9. a) Kosa Satan té i ve fé kroir Adan é Èv ? b) Pou kosa Jéova la pa tué bann rebèl toutsuit ?

8 Satan la komans rebèl a li kont Jéova, kan li la pous Adan é Èv dézobéi Bondieu. Li té ve fé kroir a zot ke Jéova té in manteur, ke li lété in mové chèf é ke li té ve pa zot boneur. Satan la di ke bann zumin la pa bezoin ke Bondieu i di a zot sak zot i doi fèr. Li la di osi ke Adan é Èv té i doi désid par zot mèm sak lé bien é sak lé mové. Kosa Jéova té sar fé ? Li noré pu tué a zot pou mèt fin lopozision bann rebèl la. Mé èske sa noré prouvé ke Satan lé in manteur ? Non !

9 Sé pousa ke Jéova la pa tué bann rebèl toutsuit. Li la lès bann zumin le tan pou ke zot i dirij a zot touseul. Sa noré prouvé ke Jéova i koné sak lé mieu pou bann zumin é ke Satan lé in manteur. Le  chapit 11 i mont tousa an détay. Mé kosa ou pans sak Adan é Èv la désid fèr ? Èske zot lavé rézon kroir Satan é dézobéi Jéova ? Jéova la donn a zot tout zafèr : in vi parfé, in joli landroi pou viv é in gayar travay. Parkont, Satan lavé rien fé pou zot. Kosa ou noré fé si ou lété zot plas ?

10. Kèl choi inportan nout tout nou doi fé ?

 10 Ojourdui, kom Adan é Èv, nout tout nou doi prann in désizion. Le choi ke nou va fé va donn a nou la vi oubien la mor. Nou pe choizi Jéova kom Chèf é prouvé ke Satan lé in manteur. Oubien nou pe choizi Satan kom chèf (Psom 73:28 ; lir Provèrb 27:11). Na poin in bonpe domoun i obéi Bondieu. An réalité, Bondieu lé pa le chèf le monn. Mé si sé pa Bondieu, kisa i lé ?

KISA I LÉ LE CHÈF LE MONN ?

Si tout bann roiyom le monn té apartien pa Satan, èske li noré pu propoz sa Jézu ?

11, 12. a) Kosa Satan la propoz Jézu ? É kosa sa i aprann a nou ? b) Kèl vèrsé i mont ke Satan sé le chèf le monn ?

11 Jézu té koné kisa i lé le chèf le monn. In jour, Satan la « mont a li tout bann roiyom le monn é zot gloir ». Aprésa, li la promèt Jézu : « Tout bann zafèr la, mi va donn a ou si ou mèt a ou a jenou devan moin é si ou ador a moin » (Matieu 4:8, 9 ; Luk 4:5, 6). Si tout bann roiyom la té apartien pa li, èske li noré pu donn sa Jézu ? Non. Donk, tout bann gouvèrnman i apartien Satan.

12 Petèt ou di a ou : « Satan i pe pa èt le chèf le monn ! Sé kan mèm Jéova, le Bondieu Toupuisan, ke la kréé lunivèr ! » (Révélasion 4:11). Lé vré, Jéova sé le Kréateur. Mé Jézu lété fran : li la apèl Satan « le chèf le monn » (Jan 12:31 ; 14:30 ; 16:11). Lapot Pol la apèl Satan « le dieu de se monn » (2 Korintien 4:3, 4). É lapot Jan la ékri ke « le monn antié lé dirijé par le méchan » (1 Jan 5:19).

 KOMAN LE MONN DE SATAN I SRA DÉTRUI ?

13. Pou kosa nou la bezoin in monn nouvo ?

13 Le monn i devien ankor plus danjereu. Partou, na bann gèr, la violans, domoun malonèt é ipokrit. Bann zumin i fé in bonpe zéfor pou règ bann problèm la, mé zot i ariv pa. I tard pa, Bondieu va détrui se monn mové, kan nora la gèr Armagédonn. Li va ranplas se monn la par in monn nouvo é jus (Révélasion 16:14, 16) (regard la not n10).

14. a) Kisa Jéova la choizi pou èt le Roi son Roiyom ? b) Kosa la Bib la anonsé su Jézu ?

14 Jéova la choizi Jézu pou èt le Roi son Roiyom, sétadir son gouvèrnman dann sièl (regard la not n11). Néna bann milié dané, la Bib la anonsé ke Jézu i sré le « Prins ki donn la pé » é ke se gouvèrnman va duré pou toultan (Izai 9:6, 7). Jézu la mont son bann disip in fason priyé pou se gouvèrnman la, li la di : « Ke out roiyom i vien. Ke out volonté i réaliz, kom dann sièl, osi su la tèr » (Matieu 6:10). Kom nou va voir dan le chapit 8, le Roiyom Bondieu va ranplas tout bann gouvèrnman umin (lir Danièl 2:44). Aprésa, li va transform la tèr an paradi.

IN MONN NOUVO I TARD PA !

15. Kosa i lé la « nouvèl tèr » ?

15 La Bib i promèt : « Nou atann [...] bann nouvo sièl é in nouvèl tèr é ladan nora la justis » (2 Pièr 3:13 ; Izai 65:17). Défoi, dan la Bib le mo « tèr » i ve dir bann domoun ki viv su la tèr (Jenèz 11:1). La « nouvèl tèr » ke lé jus, sé donk tout bann zumin ki obéi Bondieu é ki resoi son bénédiksion.

16. a) Kèl gayar kado Bondieu va doné pou sak i sar viv dan le monn nouvo ? b) Kosa nou doi fèr pou gingn se kado la ?

 16 Jézu la promèt ke bann zumin ki sar viv dan le monn nouvo va gingn la « vi pou toultan » (Mark 10:30). Kosa nou doi fé pou gingn se kado la ? Pou konèt sa, lir Jan 3:16 é Jan 17:3. Alon regard sak la Bib i di su la vi dan le Paradi su la tèr.

17, 18. Partou su la tèr, nora la pé é bann zumin i sra an sékurité. Koman nou koné sa ?

17 Nora pu la méchansté, ni bann gèr, ni bann krim, ni la violans. Nora pu dutou domoun mové su la tèr (Psom 37:10, 11). Bondieu « va fé arèt bann gèr » (Psom 46:9 ; Izai 2:4). Su la tèr nora rienk domoun ki èm Bondieu é ki obéi a li. Nora la pé pou toultan (Psom 72:7).

18 Bann zumin va viv an sékurité. Kan bann Zisraélit té obéi Bondieu, Bondieu té protèj a zot é zot té i viv an sékurité (Lévitik 25:18, 19). Dan le Paradi, nora poin rien, ni pèrsonn pou fé peur a nou. Nou sra toultan an sékurité (lir Izai 32:18 é Mika 4:4).

19. Pou kosa nou pe èt sur ke nora manjé an grann kantité ?

19 Nora manjé an grann kantité. « Nora le grin an kantité su la tèr » é « juskan o bann montagn » (Psom 72:16). Jéova, « nout Bondieu, va bénir a nou » é la tèr va donn la nouritur (Psom 67:6).

20. Koman nou koné ke la tèr va devnir in paradi ?

20 Tout la tèr va devnir in paradi. Bann zumin nora bann joli kaz é bann gayar jardin (lir Izai 65:21-24 é Révélasion 11:18). Tout la tèr i sra osi joli ke le jardin Lédèn. Jéova va donn a nou toujour  tout sak nou la bezoin. Ala sak la Bib i di su Jéova : « Ou rouv out min é ou kontant vréman le dézir tout sak lé vivan » (Psom 145:16).

21. Koman nou koné ke nora la pé ant bann zumin é bann zanimo ?

21 Nora la pé ant bann zumin é bann zanimo. Bann zanimo va pu atak bann zumin. Bann ti marmay nora pu peur aproch koté bann zanimo ke lé danjereu ojourdui (lir Izai 11:6-9 é Izai 65:25).

22. Kosa Jézu va fé pou sak lé malad ?

22 Pèrsonn i sra pu malad. Kan Jézu lété su la tèr, li la géri in bonpe domoun (Matieu 9:35 ; Mark 1:40-42 ; Jan 5:5-9). Mé an tan ke Roi le Roiyom Bondieu, li va géri tout bann zumin. Jamé plu pèrsonn va dir : « Moin lé malad » (Izai 33:24 ; 35:5, 6).

23. Kosa Bondieu i sar fé pou bann mor ?

23 Bann mor va reviv. Bondieu i promèt ke li va résusit domoun par milion. « Nora in rézuréksion otan pou bann jus ke pou bann zinjus » (lir Jan 5:28, 29 ; Akt 24:15).

24. Èske ou èmré viv dann Paradi ? Pou kosa ?

24 Nout tout, nou doi fé in choi. Nou pe aprann konèt Jéova é fé sak li ve. Oubien nou pe fé sak nou ve. Si nou choizi fé sak Jéova i ve, nou nora in gayar lavnir. In jour, in mesieu la di avèk Jézu, oubli pa li, apré son mor. Jézu la promèt a li : « Ou sra avèk moin dann Paradi » (Luk 23:43). Dan bann chapit i vien apré, nou va aprann ankor plus su Jézu. Nou va dékouv koman li va réaliz bann gayar promès Bondieu.