Alé voir le kontenu

Alé voir le somèr

 LESON 10

Koman rekonèt le vré relijion ?

Koman rekonèt le vré relijion ?

1. Èske néna in seul vré relijion ?

« Méfié a zot bann fo profèt » (MATIEU 7:15).

Jézu la ansègn son bann disip in seul é vré relijion. Li la konpar le vré relijion kom in rout ki amèn juska la vi étèrnèl. Li la di ke « Lé pa nonbreu sèk i [...] trouv » la rout la (Matieu 7:14). Bondieu lé dakor avèk in ladorasion ke lé bazé seulman su son Parol la vérité. Tout bann vré zadorateur Bondieu lé uni dann in seul é mèm kroiyans. — Lir Jan 4:23, 24 ; 14:6 ; Éfézien 4:4, 5.

2. Kosa Jézu la di su bann fo krétien ?

« Zot i déklar publikman ke zot i koné Bondieu, mé zot i reni a li par zot zeuv » (TIT 1:16).

Jézu la di ke bann fo profèt té sar kontaminn la relijion bann vré krétien. Bann fo profèt la, i fé pas a zot kom bann vré zadorateur Bondieu ; zot Légliz i prétan èt krétien. Mé lé posib rekonèt kèl kalité domoun zot i lé. Rienk dann le seul vré relijion néna bann vré krétien èk bann kalité é bann konportman fasil pou rekonèt. — Lir Matieu 7:13-23.

3. Koman rekonèt bann vré zadorateur Bondieu ?

Ala sink poin pou rekonèt bann vré krétien :

  • Bann vré zadorateur Bondieu i réspèk la Bib, pou zot sé la Parol Bondieu. Zot i fé zéfor pou pratik bann prinsip ke néna dan la Bib. Le vré relijion lé pa parèy lé zot relijion ki baz a zot su la pansé bann zumin (Matieu 15:7-9). Bann vré zadorateur Bondieu i mèt an pratik sèk zot i ansègn. — Lir Jan 17:17 ; 2 Timoté 3:16, 17.

  •   Bann vré disip Jézu i onor le non Bondieu, Jéova. Jézu té fé konèt le non Bondieu. Sé kom sa ke li la onor le non son Papa. Li la fé konèt kisa i lé le vré Bondieu otour d’li, é li la aprann bann domoun koman priyé pou rann sin le non Bondieu (Matieu 6:9). Dann landroi ousa ou viv, kèl relijion i fé konèt le non Bondieu ? — Lir Jan 17:26 ; Romin 10:13, 14.

  • Bann vré krétien i prèch le Roiyom Bondieu. Bondieu la anvoiy Jézu su la tèr pou prèch la bonn nouvèl su le Roiyom. Le Roiyom la, lé le seul léspoir pou tout domoun su la tèr. Juska la fin son vi, Jézu la pas tout son tan pou parl su se Roiyom la (Luk 4:43 ; 8:1 ; 23:42, 43). Li la di ke son bann disip té sar anons se Roiyom la osi. Si in moun i vien koz le Roiyom Bondieu ansanm ou, dann kèl relijion ou pe èt sur ke li lé ? — Lir Matieu 24:14.

  • Bann disip Jézu i rejèt sèk néna dan le monn mové. Ou pe rekonèt banna, parske zot i mèl pa zot dann la politik, é zot i rant pa non plu dann ralé pousé la sosiété (Jan 17:16 ; 18:36). An plus ke sa, zot i imit pa bann mantalité é bann konportman malsin le monn. — Lir Jak 4:4.

  • Bann vré krétien i èm vréman tout domoun. La Parol Bondieu i aprann a zot réspèk tout kalité ras domoun. Bann fo relijion i ankouraj bann gèr ant péi, alor ke bann vré krétien i fé pa la gèr dutou (Mika 4:1-3). An plus, zot i utiliz bokou zot tan é tout sad zot nana, pou èd é ankouraj bann domoun. — Lir Jan 13:34, 35 ; 1 Jan 4:20.

4. Èske ou pouré rekonèt le vré relijion ?

Kèl relijion i baz son lansègnman su la Parol Bondieu, i réspèk le non Bondieu, é i anons ke rienk le Roiyom Bondieu lé le seul léspoir pou tout domoun su la tèr ? Kèl group relijieu i ièm zot prochin é i fé pa la gèr ? Kosa ou an pans ? — Lir 1 Jan 3:10-12.