Alé voir le kontenu

Alé voir le sou-menu

Alé voir le somèr

Bann Témoin Jéova

Kréol Rénioné

Bonn nouvèl Bondieu i donn !

 LESON 11

Kèl bienfé bann prinsip la Bib i pe aport a nou ?

Kèl bienfé bann prinsip la Bib i pe aport a nou ?

1. Pou kosa bann zumin la bezoin èt gidé ?

Koman bann prinsip biblik i pous a nou pou prann prékosion dan nout vi ? (PSOM 36:9).

Nout Kréateur nana plus la sajès ke nou. Sé in Papa ki èm a nou, é li fé in kont èk nou. An plus, li la pa kré a nou pou viv san son diréksion (Jérémi 10:23). Alor, nou la bezoin ke Bondieu i gid a nou, kom inn ti zanfan la bezoin son bann paran i gid a li (Izai 48:17, 18). Bann prinsip la Bib i gid a nou, é sa, sé in kado Bondieu. — Lir 2 Timoté 3:16.

Ojourdui, bann loi é bann prinsip ke Jéova i ansègn a nou, i aport a nou in bon fason d’viv. Si nou suiv bann diréksion la, nou va konèt kosa i fo fé pou gingn in kantité bienfé pou toultan dan lavnir. Kom Bondieu la kré a nou, lé normal ke nou doi suiv son diréksion avèk plézir. — Lir Psom 19:7, 11 ; Révélasion 4:11.

2. Kosa i lé in prinsip la Bib ?

In prinsip sé in vérité inportan ke i gingn apliké toultan. Par kont in loi lé aplikab dann in situasion éspésial (Detéronom 22:8). Pou konèt koman aplik in prinsip biblik dann in situasion, i fo nou pran le tan pou réfléchi (Provèrb 2:10-12). In légzanp, la Bib i ansègn ke la vi lé in kado Bondieu. Prinsip la, lé inportan é i pe gid a nou dan nout travay, kan nou lé nout kaz é kan nou déplas a nou. Li pous a nou pou prann prékosion pou protèj nout vi é sèk lé zot. — Lir Akt 17:28.

3. Nana deu prinsip vréman inportan : Kosa i lé ?

Jézu la donn deu prinsip tré zinportan. Le premié i mont kosa bann zumin i doi fé dan zot vi : konèt Bondieu, èm a li é sèrv a li avèk fidélité. Dan tout désizion ke nou pran, nou doi  suiv prinsip la (Provèrb 3:6). Bann domoun ke i viv vréman an akor avèk sa, i gingn lamitié Bondieu, le vré boneur, é la vi pou toultan. — Lir Matieu 22:36-38.

Le deuzièm prinsip i èd a nou pou viv an pé avèk nout lantouraj (1 Korintien 13:4-7). Pou bien aplik prinsip la, i fo ke nou imit le fason Bondieu i trèt bann zumin. — Lir Matieu 7:12 ; 22:39, 40.

4. Kèl bienfé bann prinsip la Bib i aport a nou ?

Gras bann prinsip ke nana dan la Bib, bann fami i aprann koman i fo viv ansanm é uni dan lamour (Kolosien 3:12-14). Bann fami lé protéjé kan zot i suiv osi in not prinsip inportan ke la Bib i ansègn : le maryaj i doi dur pou toultan. — Lir Jenèz 2:24.

Si nou aplik bann prinsip biblik, sa va protèj a nou dann domèn matèryèl, é nou va santi a nou bien dan nout vi. In légzanp, souvan in patron i préfèr bann travayeur ke lé onèt é sèryeu, é sa parske zot i obéi la Parol Bondieu (Provèrb 10:4, 26 ; Ébreu 13:18). La Bib i aprann a nou osi kontant a nou sak nou la bezoin pou viv, é i amont a nou ke lamitié avèk Bondieu na plus valeur ke bann zafèr matèryèl. — Lir Matieu 6:24, 25, 33 ; 1 Timoté 6:8-10.

Kan nou mèt an pratik bann prinsip biblik, nou protèj nout santé (Provèrb 14:30 ; 22:24, 25). La loi Bondieu su labu lalkol, i protèj a nou kont bann maladi mortèl é bann laksidan (Provèrb 23:20). Jéova i pèrmèt a nou boir lalkol, mé in fason rézonab (Psom 104:15 ; 1 Korintien 6:10). Bann prinsip Bondieu i aport a nou bonpe bienfé. Zot i èd a nou fé atansion non seulman sak nou fé, mé osi sad nou pans (Psom 119:97-100). Mé si bann vré krétien i réspèk bann prinsip Bondieu, sé pa seulman pou gingn bann bienfé. Sé avan tout pou onor Jéova. — Lir Matieu 5:14-16.