Alé voir le kontenu

Alé voir le sou-menu

Alé voir le somèr

Bann Témoin Jéova

Kréol Rénioné

Bonn nouvèl Bondieu i donn !

 LESON 5

Kèl projé Bondieu néna pou la tèr ?

Kèl projé Bondieu néna pou la tèr ?

1. Pou kosa Bondieu la kré la tèr ?

Jéova la donn la tèr bann zumin : sé la ke nou abit. Si li la kré Adan é Èv, sé pa pou zot ranpli le sièl ; li lavé déja kré bann zanj pou sa (Job 38:4, 7). Li la mèt le premié om dann in joli paradi, té apèl jardin Lédèn (Jenèz 2:15-17). Li la donn Adan èk son bann désandan apré li, léspoir pou viv toultan su la tèr. — Lir Psom 37:29 ; 115:16.

O komansman, navé seulman jardin Lédèn ke lété in paradi. Adan é Èv i devé ranpli tout la tèr avèk zot bann désandan. Avèk le tan, zot té doi kultiv é pran soin la tèr an antié pou fé in paradi (Jenèz 1:28). La tèr i sra jamé détrui. Li va rès pou toultan, landroi ousa bann zumin va viv. — Lir Psom 104:5.

2. Akoz la tèr lé pa in paradi koméla ?

Adan é Èv la pa ékout Jéova. Alor, li la poursuiv a zot an deor le jardin. Le Paradi lété pèrdu, é lavé pèrsonn ke lété kapab remèt a li an plas. Kom la Bib i di, « la tèr la été livré dann la min le méchan » (Job 9:24). — Lir Jenèz 3:23, 24.

Èske sa i ve dir ke Jéova lété pa kapab réaliz le projé ke li lavé o dépar pou bann zumin ? Non ! Li lé tou puisan. Lé pa posib ke li rat son projé (Izai 45:18). Li va fé an sort ke bann zumin i retrouv la vi ke li voulé pou zot o premié débu. — Lir Psom 37:11, 34.

3. Koman le Paradi i sra rétabli ?

Le Paradi i sra rétabli su la tèr kan Jézu, le Roi choizi par Bondieu va gouvèrné. Dann in gèr ki apèl Armagédonn, Jézu le chèf bann zanj, va détrui tout bann zènmi Bondieu. Aprésa, li va anpèch Satan ajir pandan 1000 an. Kan Bondieu va détrui bann méchan, son bann  zadorateur va rès vivan, parske Jézu va gid a zot é va protèj a zot. Zot va viv pou toultan dann in Paradi su la tèr. — Lir Révélasion 20:1-3 ; 21:3, 4.

4. Kansa bann soufrans va disparèt ?

Kan Bondieu va fé disparèt le mal su la tèr ? Jézu la donn in « sign » pou montré ke la fin lé proch. Tout bann problèm ke nana su la tèr koméla, i mèt an danjé la vi bann zumin : sa i mont ke nou viv « lachèvman le sistèm de choz ». — Lir Matieu 24:3, 7-14, 21, 22.

Kan li va gouvèrn la tèr, pandan 1000 an, Jézu depui le sièl va fé disparèt tout bann soufrans (Izai 9:6, 7 ; 11:9). Jézu i sra pa seulman in Roi. Li sra osi Gran Prèt, é la, li va anlèv bann péché bann zumin ki ièm Bondieu. Aprésa, gras a li, Bondieu va fé disparèt la maladi, la viéyès é la mor. — Lir Izai 25:8 ; 33:24.

5. Kisa va viv plu tar dann Paradi su la tèr ?

Dan la Sal du Roiyom, ou va trouv domoun ki ièm Bondieu é ki ve aprann koman fé plézir a li.

Sé bann domoun ki obéi Bondieu ke va viv dann Paradi (1 Jan 2:17). Jézu la anvoiy son bann disip, rod bann domoun ke nana in keur sinsèr é pa orgeyeu. Bann disip la ésplik a zot, kosa i fo fé pou gingn lamitié Bondieu. Ojourdui, Jéova i ansègn domoun par milion, pou prépar a zot pou viv plu tar dann in Paradi su la tèr (Sefania 2:3). Kan bann Témoin Jéova i fé zot rénion dan la Sal du Roiyom, domoun i aprann koman èt in méyeur mari é in bon papa, in méyeur madam é in bon momon. Bann paran èk zot zanfan, i ador Bondieu ansanm. Gras bann zansègnman la Bib, zot i aprann kosa i fo fé pou gingn in vi méyeur. — Lir Mika 4:1-4.