Alé voir le kontenu

Alé voir le sou-menu

Alé voir le somèr

Bann Témoin Jéova

Kréol Rénioné

Bonn nouvèl Bondieu i donn !

 LESON 2

Kisa i lé le vré Bondieu ?

Kisa i lé le vré Bondieu ?

1. Pou kosa nou devré ador Bondieu ?

Le vré Bondieu sé le Kréateur tout zafèr. Li la toujour été la, é li sra toujour la (Psom 90:2). Sé li ki donn bann bonn nouvèl ke nou trouv dan la Bib (1 Timoté 1:11). Kom li la donn a nou la vi, nou devré ador rienk li touseul. — Lir Révélasion 4:11.

2. Koman nou pe konèt Bondieu ?

Okin zumin la vu Bondieu, parske li lé in Léspri. Sa i ve dir ke li la poin in kor kom nou, é ke li lé plu gran ninport kèl kréatur ki viv su la tèr (Jan 1:18 ; 4:24). Malgrésa, nou pe voir kisa li lé vréman, kan nou regard bann zafèr ke li la kré. In légzanp, nou voi lamour èk tout la sajès Bondieu, kan nou regard tout bann kalité frui èk fleur ke nana su la tèr. Lunivèr tèlman lé gran, i prouv a nou a kèl poin li lé puisan. — Lir Romin 1:20.

Nou pe aprann ankor plus kisa i lé Bondieu, kan nou lir la Bib. An plus, li ésplik a nou kosa li èm, é kosa li èm pa, koman li aji avèk bann zumin é koman li réaji dann diféran situasion. — Lir Psom 103:7-10.

3. Èske Bondieu néna in non ?

Jézu la di : « Not Pèr dann sièl ke out non lé sanktifié » (Matieu 6:9). Bondieu néna in bonpe tit, mé li néna rienk in seul non. Chak lang nana son manièr pou pronons le non Bondieu. An kréol nou na labitud di « Jéova ». Mé désèrtin i di « Yavé ». — Lir Psom 83:18.

Dann in bonpe Bib, domoun la tir le non Bondieu é la ranplas a li par bann tit kom Sénieur oubien Létèrnèl. Pourtan, depui le komansman, le non Bondieu té ékri apepré 7000 foi dan la Bib. Kan Jézu la ansègn  bann domoun, li la fé konèt a zot le non Bondieu. — Lir Jan 17:26.

4. Èske Jéova i fé in kont èk nou ?

Kom se papa ki èm son zanfan, Bondieu i aji pou nout bien pou la vi.

Si nana tousa soufrans la, èske sa i ve dir ke Jéova i fé pa in kont èk nou ? Désèrtin i di mèm, ke Bondieu i anvoiy bann zépreuv pou fé souf a nou. Mé sa lé pa vré. — Lir Jak 1:13.

Bondieu la donn a nou in privilèj : sé le kapasité désid fé le bien ou le mal. Èske lé pa gayar kan nou pran désizion par nou mèm pou sèrv Bondieu (Jozué 24:15) ? Pourtan, bokou i choizi fé le mal zot prochin, sé pousa ke in bonpe domoun i souf. Jéova lé tris, kan li voi tout linjustis ke nana su la tèr. — Lir Jenèz 6:5, 6.

Jéova i fé in kont èk nou. Li ve ke nou viv ereu. I tard pa, li va fé disparèt bann soufrans é tout sèk lé loteur bann soufrans la. Pou linstan, li na in bon rézon pèrmèt sa, pou in sèrtin tan. Nou va voir pou kosa dann leson 8. — Lir 2 Pièr 2:9 ; 3:7, 13.

5. Kosa nou doi fé pou aproch koté Bondieu ?

Jéova i invit a nou aproch koté li, kan nou koz avèk li dan la priyèr. Li fé in kont èk chakèn d’nou (Psom 65:2 ; 145:18). Li ve pardonn a nou. Li voi bann zéfor ke nou fé pou fé plézir a li, mèm si parfoi nou ariv pa. Alor, mèm si nou lé inparfé, nou pe rès vréman proch koté Bondieu. — Lir Psom 103:12-14 ; Jak 4:8.

Kom Jéova la donn a nou la vi, nou devré èm a li plus ke ninport kisa (Mark 12:30). Plus ou mont ke ou ièm Bondieu, kan ou aprann konèt a li é kan ou fé son volonté, plus ou va raproch koté li. — Lir 1 Timoté 2:4 ; 1 Jan 5:3.