Alé voir le kontenu

Alé voir le sou-menu

Alé voir le somèr

Bann Témoin Jéova

Kréol Rénioné

Bonn nouvèl Bondieu i donn !

 LESON 4

Kisa i lé Jézu Kris ?

Kisa i lé Jézu Kris ?

1. Ousa la vi Jézu la komansé ?

Kèl karaktèr Jézu lavé ke té atir tout domoun ? (MATIEU 11:29 ; MARK 10:13-16).

Jézu lé pa kom bann zumin, parske avan son nésans su la tèr, li té viv dann sièl kom in léspri (Jan 8:23). Sé li ke Bondieu la kré an premié, aprésa li la èd son papa kré tout lé zot zafèr. Rienk a li touseul la été kré dirèkteman par Jéova ; sé pousa i apèl a li son « Fis unik anjandré » (Jan 1:14). I apèl a li osi « la Parol », parske li la été le Port parol Bondieu. — Lir Provèrb 8:22, 23, 30 ; Kolosien 1:15, 16.

2. Pou kosa Jézu lé vnu su la tèr ?

Bondieu la anvoiy son garson su la tèr. Depui dann sièl, li la transfèr la vi Jézu dan le vant in fiy juiv, ke lété vièrj. Èl té apèl Mari. Sa i ve dir ke Jézu navé poin in papa umin (Luk 1:30-35). Jézu lé vnu su la tèr 1) pou ansègn la vérité su le vré Bondieu, 2) pou mont a nou par son légzanp koman fèr la volonté Bondieu mèm dann malizé é 3) pou donn son vi parfé « kom ranson ». — Lir Matieu 20:28.

3. Pou kosa bann zumin la bezoin in ranson ?

Souvandéfoi, i pèy in ranson pou libèr in moun ke lé an danjé d’mor (Égzod 21:29, 30). Kan Bondieu la kré la vi o dépar, la mor é la viéyès té pa prévu dan son projé pou bann zumin. Koman nou pe konèt sa ? Bondieu la bien di èk Adan, le premié om, ke si li té dézobéi (oubien, si li té pèch), li noré mor. Alor, si Adan lavé pa péché, jamé li noré konèt la mor (Jenèz 2:16, 17 ; 5:5). Dapré la Bib, si la mor « lé rantré » dann le monn bann zumin, sé akoz Adan. Li la transmèt tout son bann désandan le péché èk la mor, le punision ke li la ganié.  Nou la bezoin in ranson pou libèr a nou d’la mor ke Adan la lès a nou. — Lir Romin 5:12 ; 6:23.

Kisa lété le mieu plasé pou pèy le ranson pou sov a nou d’la mor ? Okin umin inparfé té gingn donn son vi pou pèy bann péché lé zot, parske kan nou mor nou pèy pou nout péché seulman. — Lir Psom 49:7-9.

4. Pou kosa Jézu lé mor ?

Jézu lé pa kom nou, parske li lé parfé. Li lavé pa bezoin donn son vi pou son bann péché — parske li la jamé péché. Li lé mor pou rachèt bann péché tout bann domoun. Kan li la anvoiy son garson donn son vi pou nou, Bondieu la montré ke li ièm bann zumin tré for. Jézu la mont ke li ièm a nou osi, kan li la obéi son Papa, é ke li lé mor pou nout péché. — Lir Jan 3:16 ; Romin 5:18, 19.

5. Kosa Jézu i fé ojourdui ?

Kan Jézu lété su la tèr, li la géri bann malad, li la résusit bann mor é li la èd bann domoun ke té souf. Li la fé tousa, pou montré kosa li sra kapab fé plu tar pou bann zumin obéisan (Matieu 15:30, 31 ; Jan 5:28). Apré son mor, Bondieu la redonn a li la vi, li la artourn in léspri (1 Pièr 3:18). Aprésa, dann sièl, li la atann a droit Jéova, juska se ke Jéova i donn a li lotorité pou gouvèrné an tan ke Roi su tout la tèr (Ébreu 10:12, 13). Ojourdui, Jézu lé in Roi puisan dann sièl. Son bann disip i anons bonn nouvèl la, su tout la tèr. — Lir Danièl 7:13, 14 ; Matieu 24:14.

I tard pa, Jézu va utiliz tout son pouvoir kom Roi pour anlèv su la tèr tout bann soufrans é sèk i provok la soufrans. Tout sak i mont zot foi an li é ki obéi, i sar viv dann in paradi su la tèr. — Lir Psom 37:9-11.