Alé voir le kontenu

Alé voir le sou-menu

Alé voir le somèr

Bann Témoin Jéova

Kréol Rénioné

Bonn nouvèl Bondieu i donn !

 LESON 13

Kèl bonn nouvèl Bondieu i donn su bann relijion ?

Kèl bonn nouvèl Bondieu i donn su bann relijion ?

1. Èske tout bann relijion lé vré ?

Dan tout bann relijion, néna domoun ke lé sinsèr. In bonn nouvèl, sé ke Bondieu i voi bann domoun sinsèr la, é li sousi a li de zot. Sèk lé regrétab, sé ke depui lontan bann zumin la utiliz la relijion pou fé bann mové zafèr (2 Korintien 4:3, 4 ; 11:13-15). Bann reportaj i mont ke désértin relijion i mèl a zot dann bann zafèr téroris, i ésèy asasinn in peup an antié. Zot i ankouraj la gèr é i fé bann zagrésion séksuèl su bann marmay. Sa lé in soufrans pou bann kroiyan ke néna le keur sinsèr ! — Lir Matieu 24:3-5, 11, 12.

Alor ke le vré relijion i onor Bondieu, bann fo relijion i ofans a li. Bann fo relijion i ansègn bann zidé ke lé pa dan la Bib. In légzanp, zot i ansègn bann zafèr manteur su Bondieu é su bann mor. Mé Jéova i ve ke bann zumin i aprann la vérité su li. — Lir Ézékièl 18:4 ; 1 Timoté 2:3-5.

2. Kèl bonn nouvèl Bondieu i donn su bann relijion ?

Ankor ereu ke Bondieu i lès pa li tronpé par bann fo relijion. Zot i fé kroir ke zot i èm a li, mé an vré, zot i èm le monn ke lé dirijé par Satan (Jak 4:4). Dan la Bib, tout bann fo relijion lé apelé « Babilonn la Grann ». Babilonn sé in vil ke la égzisté dann tan lontan. Sé in landroi ousa bann fo relijion la komansé, jus apré le Déluj Noé. I tard pa, in kou mèm Bondieu va détrui bann fo relijion la. Li va fé sa, parske banna i tronp é i fé mizèr bann zumin. — Lir Révélasion 17:1, 2, 5, 16, 17 ; 18:8.

Mé néna ankor in bonn nouvèl : Jéova i oubli pa bann domoun sinsèr ke lé dispèrsé dann bann fo relijion su tout la tèr. Li lé antrèn rasanm a zot par la vérité ke li ansègn a zot. — Lir Mika 4:2, 5.

 3. Kosa bann domoun sinsèr i doi fé ?

Le vré relijion i uni bann zumin ojourdui.

Jéova i fé in kont èk bann domoun ki èm sèk lé vré é sèk lé bien. Li ankouraj a zot kit bann fo relijion. In moun ki èm Bondieu i doi èt pré pou aport bann chanjman dan son vi, pou fé plézir Bondieu. — Lir Révélasion 18:4.

Bann domoun sinsèr ke té viv dann tan premié sièk, té kontan antann bann bonn nouvèl ke bann zapot té anons. Avèk Jéova, zot la aprann in nouvo fason d’viv, plu gayar, ke lavé in sans é in vré léspérans. Bann krétien premié sièk la, i rès in bon modèl pou nou. Zot la mèt an pratik bann bonn nouvèl la, é zot la mèt Jéova an premié dan zot vi. — Lir 1 Tésalonisien 1:8, 9 ; 2:13.

Sèk i ador Jéova i form in fami. Jéova i fé rant sèk i rejèt bann fo relijion dann se fami la. Si ou aksèp linvitasion Bondieu, ke lé fé avèk bon keur, ou va devnir son kamarad. Parmi bann zadorateur Bondieu, ou nora osi in fami ki èm a ou, é ou nora la vi pou toultan. — Lir Mark 10:29, 30 ; 2 Korintien 6:17, 18.

4. Koman Bondieu i sar kontant bann domoun su tout la tèr ?

Néna in bonn nouvèl : sé le jujman bann fo relijion ke i sar arivé, é ke va soulaj la soufrans tout domoun su la tèr. Jamé plu, bann fo relijion va tronp bann zumin é sépar a zot. Sèk va rès vivan, i sra uni ansanm dan ladorasion le seul vré Bondieu. — Lir Révélasion 18:20, 21 ; 21:3, 4.