Alé voir le kontenu

Alé voir le sou-menu

Alé voir le somèr

Bann Témoin Jéova

Kréol Rénioné

Bonn nouvèl Bondieu i donn !

 LESON 12

Kosa ou doi fé pou aproch koté Bondieu ?

Kosa ou doi fé pou aproch koté Bondieu ?

1. Èske Bondieu i ékout tout bann priyèr ?

Bondieu i invit tout bann zumin aproch koté li par la priyèr (Psom 65:2). Mé, li aksèp pa, sétadir li ékout pa tout bann priyèr. In légzanp, kan in mesieu i maltrèt son madam, Bondieu i ékout pa son bann priyèr (1 Pièr 3:7). Lé parèy pou bann zisraélit, kom zot té arèt pa fé le mal, Bondieu té ékout pu zot priyèr. Par kont, kan bann pécheur i regrèt zot fot é i fé pu le mal, Bondieu i ékout zot priyèr, é sa, mèm si lété bann péché grav. Nou pe dir vréman ke la priyèr lé in vré privilèj ke Bondieu la donn a nou. — Lir Izai 1:15 ; 55:7.

2. Koman i fo priyé ?

Kom la priyèr i fé parti ladorasion Bondieu, nou doi pri seulman nout Kréateur, Jéova (Matieu 4:10 ; 6:9). É kom nou lé pa parfé, kan nou pri Bondieu, nou doi pri o non d’Jézu parske li lé mor pou nout péché (Jan 14:6). Jéova i ve pa ke nou résit bann priyèr ke nou aprann par keur, oubien ke lé ékri dann liv. Li ve ke nout priyèr i sort dan nout keur. — Lir Matieu 6:7 ; Filipien 4:6, 7.

Nout Kréateur Jéova i antan osi bann priyèr ke nou di dan nout keur (1 Samuèl 1:12, 13). Li invit a nou pri a li ninport kan : kan le jour i komans é kan i fini, kan nou manj, kan nou néna traka, oubien dot choz ankor. — Lir Psom 55:22 ; Matieu 15:36.

3. Pou kosa bann krétien i rasanm a zot ?

Lé pa fasil aproch koté Bondieu, parske nou viv parmi bann domoun ke i kroi pa an li, é ki narg son bann promès su la pé pou la tèr (2 Timoté 3:1, 4 ; 2 Pièr 3:3, 13). Nou la bezoin retrouv a nou avèk bann zadorateur Jéova kom nou,  parske zot lé ankourajan é ke zot la bezoin a nou osi. — Lir Ébreu 10:24, 25.

Si nou néna labitud frékant bann domoun ke i èm Bondieu, sa va èd a nou aproch koté li. Bann rénion Témoin Jéova, lé bann gayar lokazion pou ranfors la foi inn é lot. — Lir Romin 1:11, 12.

4. Koman ou pe aproch koté Bondieu ?

Ou pe aproch koté Bondieu, kan ou réfléchi avèk sèryeu su sak ou aprann dann son Parol. Réfléchi su tout sak Bondieu la fé, son bann konsèy é son bann promès. Si ou pri é ou réfléchi avèk sèryeu desu son Parol, ou nora in plu gran rekonésans pou lamour èk la sajès Bondieu. — Lir Jozué 1:8 ; Psom 1:1-3.

Ou pe èt proch koté Bondieu seulman si ou néna konfians an li, é ke ou mèt out foi an li. Kom ou aroz in plant pou fé pous a li, i fo nouri out foi pou fé grandi a li osi. Pou nouri toultan out foi, ou doi réfléchi su tout bann kroiyans biblik ke ou la aprann. — Lir Matieu 4:4 ; Ébreu 11:1, 6.

5. Kosa ou néna pou ganié kan ou aproch koté Bondieu ?

Jéova i fé in kont avèk tout sak i èm a li. Li lé kapab protèj a ou kont tout sak i menas out foi é out léspérans pou viv pou toultan (Psom 91:1, 2, 7-10). Li mèt a ou an gard kont bann fason d’viv ke lé danjereu pou out santé é out boneur. Li ansègn a ou le méyeur fason d’viv. — Lir Psom 73:27, 28 ; Jak 4:4, 8.