Alé voir le kontenu

Alé voir le sou-menu

Alé voir le somèr

Bann Témoin Jéova

Kréol Rénioné

In vi d’fami ereu lé posib

 LESON 6

La nésans in zanfan dan la fami

La nésans in zanfan dan la fami

« Bann zanfan lé in don ke i vien de Jéova » (Psom 127:3).

Kan in marmay i né, i aport la joi pou bann paran é i pèrturb a zot an mèm tan. A zot jeun paran, va étonn a zot petèt de voir ke okup le bébé va prann a zot bokou d’tan é bokou d’fors. Zot vi d’fami i sra petèt boulvèrsé akoz in mank somèy é par bann chanjman ke zot i viv o nivo aféktif. Zot deu ansanm, i fodra ke zot i fé sak i fo pou prann soin zot zanfan é protèj zot maryaj. Koman bann prinsip la Bib va èd a zot surmont bann chanjman la ?

 1 KONPRANN A KÈL POIN IN ZANFAN I CHANJ OUT VI

SÈK LA BIB I ANSÈGN : « Lamour lé pasian é bon », « i rod pa son prop lintéré, i pran pa la kolèr » (1 Korintien 13:4, 5). A ou jeun momon, lé normal ke out latansion lé pou out bébé. Mé rapèl a ou, ke out mari la bezoin osi out latansion sinon li nora linprésion ke ou mèt a li de koté. Fé santir a li avèk bonté é pasians ke li lé util é ke la bezoin de li osi pou okup zot ti zanfan.

La Bib i di : « A zot [...], bann mari, kontinué rès avèk èl dapré la konésans », (1 Pièr 3:7). I fo ke ou aksèp ke out madam va utiliz in gran parti son lénèrji pou zot zanfan. Kom sé bann résponsabilité ke lé nouvo, èl i pe san a èl angoisé, fatigé é petèt mèm déprimé. Petèt i pe arivé, ke parfoi, èl i sra an kolèr kont ou, mé kontrol a ou, parske « Sak lé lan pou pran la kolèr i vo mieu ke in bonom ke lé for » (Provèrb 16:32). Ésèy konprann kosa i éspas é aport a èl le soutien ke èl la bezoin (Provèrb 14:29).

KOSA OU PE FÈR :

  • Papa : Mèm la nuit, donn in kou d’min out madam pou okup zot ti bébé. Diminu le tan ke ou pas pou fé dot choz komsa ou va gingn akord plus le tan out madam é out zanfan.

  • Momon : Kan out mari i propoz pou èd a ou okup le bébé, i fo ke ou aksèp. Si li fé pa lé choz kom i fo, pa bezoin fé a li bann reproch mé mont a li pluto avèk jantiyès koman i fo fé.

 2 RANFORS ZOT RELASION

SÈK LA BIB I ANSÈGN : « zot va devnir in seul chèr » (Jenèz 2:24). Mèm si la fami la agrandi, oubli pa ke out konjoin é ou i form toujour « in seul chèr ». Fé tout out posib pou ke zot relasion i rès solid.

A ou fam, mont out rekonésans pou lèd é le soutien ke out mari i aport a ou. Pou li i sra in « gérizon » (Provèrb 12:18). A ou mari, di avèk out madam a kèl poin ou ièm é ou aprési a èl. Félisit a èl pou la fason ke èl i okup la fami (Provèrb 31:10, 28).

« I fo ke chakèn i kontinu chèrch, non pa son prop lavantaj, mé sad lot » (1 Korintien 10:24). Fé toujour sak lé mieu pou out konjoin. I fo ke zot deu i pran le tan pou koz ansanm, félisit a zot é ékout inn é lot. Konsèrnan bann relasion sèksuèl, pans pa ou touseul. Pran an kont bann bezoin out konjoin. La Bib i di : « Priv pa zot inn é lot de se du, amoin ke zot la tonm dakor » (1 Korintien 7:3-5). Sé pousa, diskut franchman avèk out konjoin su sujé la. I fo ke ou lé pasian é ke ou ésèy konprann lé choz pou rann zot relasion plu solid.

KOSA OU PE FÈR :

  • Oubli pa rézèrv inn ti moman rienk pou zot deu.

  • Mont out konjoin ke ou ièm a li par bann ti zaksion ke lé janti, kom ékri a li inn ti mo oubien fé a li inn ti kado.

 3 ANSÈGN OUT ZANFAN

SÈK LA BIB I ANSÈGN : « Depui ke ou lé inn ti marmay ou koné bann zékri sakré, ke i pe rann a ou saj pou le salu » (2 Timoté 3:15). Réfléchi sak ou sar fé pou ansègn out bébé. Avan mèm son nésans, li néna in kapasité inkroiyab pou aprann. Kan li lé ankor dan le vant, li rekoné le son out voi é li réaji kan ou resan in nafèr. Kan li lé ankor p’ti, lir pou li. Mèm si li konpran pa sad ou lé antrèn lir, petèt ke li pouré èm la léktur kan li va grandi.

Out zanfan lé jamé tro p’ti pou antann a ou parl su Bondieu. I fo ke li antan kosa ou di kan ou pri Jéova avèk li (Detéronom 11:19). Mèm kan ou joué avèk li, koz avèk li su bann zafèr ke Bondieu la fé (Psom 78:3, 4). Kan li va grandi, li va voir a kèl poin ou ièm Jéova é li va aprann èm Bondieu osi.

KOSA OU PE FÈR :

  • Demann Bondieu la sajès ke ou la bezoin pou ansègn out bébé.

  • Répèt bann mo é bann zidé ke lé inportan avèk out zanfan pou ke li apran tousa le pluto posib.