Alé voir le kontenu

Alé voir le sou-menu

Alé voir le somèr

Bann Témoin Jéova

Kréol Rénioné

In vi d’fami ereu lé posib

 LESON 9

Ador Jéova avèk out fami

Ador Jéova avèk out fami

« Ador sak la fé le sièl, é la tèr » (Révélasion 14:7).

Kom ou la aprann dann ti liv la, dan la Bib néna in bonpe prinsip ke va èd a ou, é out fami. Jéova i ve ke ou lé ereu. Li promèt ke si ou plas son ladorasion an premié, « ou va gingn osi tout lé zot choz » (Matieu 6:33). Li ve de tout son keur ke ou lé ami avèk li. Alor profit tout bann zokazion ke ou néna pou fé grandi out lamitié avèk li. Sé le plu gran privilèj ke nou pe avoir (Matieu 22:37, 38).

 1 RANFORS OUT LIEN AVÈK JÉOVA

SÈK LA BIB I ANSÈGN : « “Mi sra pou zot in papa, é zot i sra pou moin bann garson é bann fiy”, di Jéova » (2 Korintien 6:18). Bondieu i ve ke ou devien tré proch de li. La priyèr lé in moiyen pou arivé. Li invit a ou pou « priyé toultan » (1 Tésalonisien 5:17). Li demann seulman pou ékout out pansé le plu profon é sèk i tourmant a ou (Filipien 4:6). Si ou pri avèk out fami, banna va voir ke Bondieu lé bien réèl pou ou.

Lé bien de koz ansanm Bondieu, mé il fo osi ékout a li. Mé koman ? Sé kan nou étudi son Parol é bann publikasion bazé su la Bib (Psom 1:1, 2). Réfléchi in bonpe su sak ou aprann (Psom 77:11, 12). In not manièr pou ékout Bondieu, sé osi asis toultan bann rénion krétien (Psom 122:1-4).

In fason inportan pou ranfors out lien avèk Jéova sé koz de li avèk lé zot. An vré, plus ou va parl de li, plus ou va santir a ou proch de li (Matieu 28:19, 20).

KOSA OU PE FÈR :

  • Rézèrv a ou in moman tou lé jour pou lir la Bib é priyé.

  • Dann out fami, mèt bann zaktivité an lien avèk la Bib avan bann distraksion é la détant.

2 APRÉSI OUT LÉTUD AN FAMI

SÈK LA BIB I ANSÈGN : « Aproch a zot koté Bondieu, é li va aproch koté zot » (Jak 4:8). Ou doi mèt an plas in program pou étudié la Bib an fami é gard a li (Jenèz 18:19). Mé i fo pa fé rienk sa mèm. Dieu i doi avoir in plas dann out vi chak jour. Koz su Bondieu avèk out fami pou ranfors zot relasion avèk li, kom la Bib i di, « kan ou sra asiz dann out kaz é kan ou va march dann chemin é kan ou va alé dormi é kan ou va levé » (Detéronom 6:6, 7). Fiks a ou le mèm bu ke Jozué lavé, kan li la di : « Moin é mon fami, nou va sèrv Jéova » (Jozué 24:15).

KOSA OU PE FÈR :

  • Mèt an plas in program détud ki konsèrn bann bezoin prési pou chak pèrsonn dan la fami.