BANN JEUN I POZ AZOT BANN KÉSTION
Koman aoir in bon lantant èk mon profésèr ?
Mon profésèr, in suplis pou moin
Pa jordi pa domin, in jour ou lot tout zélèv i tonb dési in profésèr ké zot i trouv ké lé pa jus, lé tro dur oubien sa ké lé sovaj.
Luis, 21 an, i rapèl ali : « Moin navé in profésèr souvan té di bann jurman é li navé poin rèspé pou bann zélèv. Kom té tard pa pou èl pran son rotrèt, somanké èl té di aèl, ké tout fason, té sar pa bat aèl déor. »
Melanie, 25 an, èl i an souvien aèl kèl té lo souf doulèr inn son bann profésèr. « Profésèr-la té fé pas amoin la mizèr parské mon rolijion lé diféran dé sak la plipar moun. Donk, pou mon profésèr té falé mi té pran labitud èt maltrèté. »
Si inn out bann profésèr lé dur, olèrk ou di aou ké out lané skolèr sra in suplis pou ou, ésèy suiv bann konsèy andsou-la :
Konsèy pou gingn ansort aou
Ésèy adapt aou. Pa tout bann profésèr i atand lo mèm zafèr pou bann zélèv. Ésèy konpran sak out profésèr i atand dé ou, é fé out méyèr posib pou kontant ali.
Sak la Bib i di : « Lo moun ké néna la sajès i ékout é li fé grandi son konèsans » (Provèrb 1:5).
« Moin la rand amoin kont ké té falé mi té travay kom mon profésèr té i vé. Sé pou sa mi té fé zéfor pou fé mon bann dovoir kom èl té i vé. Sa la fé ké moin navé in bon lantant èk èl » (Christopher).
Fé mont rèspé. Fé zéfor pou koz in fason plézab èk out bann profésèr. Mont pa ou insolan èk banna, mèm si ou pans banna la rodé. Rapèl aou ké ou lé in zélèv, pa zot kamarad.
Sak la Bib i di : « Ké zot ti parol lé toultan janti, asézoné èk dosèl, komsa zot va konèt koman zot i doi répond chak moun » (Kolosien 4:6).
« Bann profésèr i gingn pa toultan lo rèspé ké zot i mérit èk bann zélèv. Sé pou sa kan nou fé zéfor pou rèspèk bann profésèr, sa i pé joué dési lo fason banna i trèt anou » (Ciara).
Ésèy konpran out profésèr. Bann profésèr azot osi sé bann moun. Donk, banna osi néna problèm, traka kom nout tout. Alor di pa tro vit ké out profésèr lé sovaj oubien ké li èm pa ou.
Sak la Bib i di : « Tous, nous faisons des erreurs » (Jak 3:2, ti not an fransé).
« Èt profésèr lé pa in métié fasil sa. Mi oi pa moin fé la klas pou bann zélèv é an mèm tan mèt azot a lord. Sé pou sa moin la toujour di amoin ké pou pa rajout traka pou bann profésèr mi té doi rand zot travay pli fasil ! » (Alexis).
Koz èk out papa momon dé sak ou viv. Sé èk out paran ou va gingn lo méyèr lèd pou soutien aou. Banna i vé ké ou réusi out lékol, é zot konsèy i pé èd aou niabou out bann problèm ké ou pé aoir èk in profésèr.
Sak la Bib i di : « Bann projé i march pa kan nou domand pa konsèy » (Provèrb 15:22).
« Bann paran néna plis lèspèryans ké bann jèn pou trouv solusion pou bann problèm. Alor ékout zot konsèy. Sa i pé èd aou an sort aou » (Olivia).
Koman bien koz èk out profésèr
Nadfoi i fodra ou sava koz èk out profésèr dési lo problèm ké ou néna èk li. Si ou la pèr k’i èspas mal, trakas pa ou : lidé sé pa ral lo kont, mé aoir in ti konvèrsasion. Riskab lo ti konvèrsasion-la s’ra pli fasil ké ou kroi, é ou va oir ké té vo lo kou fé sa.
Sak la Bib i di : « É donk, alon kontinié rod bann zafèr k’i ankouraj la pé é bann zafèr k’i fé grandi anou inn é lot » (Romin 14:19).
« Si parèy pou ou lo profésèr lé sovaj rienk èk ou, alé oir ali, é domand ali si ou la fé in nafèr ké la kontray ali. Somanké son répons va èd aou konpran kosa i fo ou fé pou amélior aou » (Juliana).
« Lo méyèr zafèr ké ou pé fé : avan ou apré in kour vèy kan na poin pèrsone èk out profésèr, é la, alé oir ali é di ali sak ou rosan san nèrvé » (Benjamin).
TÉMOIGNAJ
« Moin lavé bann mové not lékol, é mon profésèr té fé pa ditou in kont èk moin. Moin lavé anvi arèt lékol parské èl té fé pas amoin tro la mizèr.
« Moin la parti domand konsèy èk in not profésèr, ké la di amoin : “Èl i koné pa ou bien, é aou osi ou koné pa èl bien non pli. I fo ou sava di aèl ké ou néna difikulté èk son bann kour. É si ou fé sa, sa i pé rand sèrvis dot zélèv ké la pèr koz èk èl.”
« Té bien lo dèrnié zafèr ké mi té vé fé ! Mé moin la réfléchi sak li la di amoin, é li navé rézon : Si mi té vé ké lé choz i chanj, té falé ké mi té fé lo promié pa.
« Alor, lo landmin, ma la parti oir mon profésèr, èk rèspé moin la di aèl ké mi té aprésié vréman son bann kour é ké mi té vé vréman aprann. Moin la di aèl osi ké moin navé bann difikulté sanm son kour é ké mi té koné pa kosa té fo fé. É bin la, èl la done amoin détroi konsèy, é èl la mèm propoz èd amoin apré bann kour oubien par mèl.
« Mi té an rovien pa ! Gras ti konvèrsasion-la, moin la gingn aoir in bon lantant èk mon profésèr, sa la rand lékol pli fasil pou moin » (Maria).
In konsèy : Si ou néna difikulté pou aoir in bon lantant èk out profésèr, oi sa kom in formasion k’i sra util pou ou inn foi ou sra adult. Katie, 22 an, i di : « Mèm kan out bann zétud sra fini, i pouré ké ou nora afèr domoun ké néna in lotorité é k’i sra pa toultan janti sanm ou. Donk si déja, jordi, ou ariv aoir in bon lantant èk in profésèr ké lé difisil, plitar, surman ou va ariv osi aoir in bon lantant èk domoun ké lé difisil. »
