E maata te kavamani i teianei ao tei akaue kia akamamao te tangata ia ratou uaorai mei tetai e tetai e kua akakore katoaia te putuputuanga ki te ngai okotai. Te akarongo nei te Au Kite o Iehova i teia au tuatua akakite, ia ratou e uipa kapiti ra ma te mako. Kua taangaanga ratou i te au vitio karangaranga, mei te Zoom no ta ratou uipaanga akamorianga.

 E rauka ai te akanoonooanga meitaki e te paruruia no ta tatou uipaanga, kua akatika mai te Pupu Akaaere kia taangaangaia te au moni tauturu ei oko i te au Zoom account na te au putuputuanga. Kua riro teia ei tauturu maata ki tetai au putuputuanga kare e peke ta ratou vitio karangaranga account e $15-$20 me kore e maata atu. Te maata anga o te taime e taangaanga ana teia au putuputuanga i te au app free tei kotingaia te numero o te aronga ka rauka i te connect atu e kare katoa te tuanga paruru e meitaki ana. Pouroa te au putuputuanga te taangaanga ra i teia au Zoom account na te akaaerenga, ka puapingaia ratou mei teia au akanoonoo anga māmā ua tei paruru meitakiia, e ka maata atu te aronga te ka connect mai ki te au uipaanga tataki tai. I teia rā, e tere atu i te 65,000 putuputuanga i te 170 tuma enua te taangaanga ra i teia au account.

 Te Putuputuanga Kairagi, i Manado, North Sulawesi, Indonesia, kua taui ratou mei te vitio karangaranga app free ki te Zoom account a te akaaerenga. Karanga te Taeake ko Hadi Santoso e: “Te au taeake e te au tuaine tei kore i kite i te taangaanga i teia au apinga uira i mua ana, kua reka ratou i te uipaanga i teianei, e kare ratou e anoanoia kia log in putuputu i te tuatau o te uipaanga.”

 Ko Lester Jijón, Jr., e tangata pakari no te Putuputuanga Guayacanes Oeste i Guayaquil, Ecuador, karanga aia: “No te rava kore o te moni a te au taeake e te au tuaine, kua ngata i tetai au putuputuanga i te tutaki i te raitini Zoom te ka rauka i te putuputuanga kia piri mai ki roto i te au uipaanga. I teianei, meitaki maata ki te akaaerenga e au Zoom account ta matou e e maata te aronga te ka connect mai ki te uipaanga, kare e emiemi e ka pou te connection limit.”

 Ko Johnson Mwanza, e tangata pakari no te Putuputuanga Ngwerere North i Lusaka, Zambia, tata aia: “E maata te au taeake e te au tuaine tei karanga putuputu, ‘te riro nei te akanooanga Zoom a te akaaerenga ei akapiri vaitata atu ia matou ki te au taeake e te au tuaine ma te akaperepereia e Iehova.’”

 Ei tutaki i teia au account na te akaaerenga, no roto mai te moni i te tauturu no te tumatetenga natura. Turuia teia e te au moni tauturu tei oronga uaia no te au angaanga i te ao katoa. E moni oronga uaia mai teia na roto i te donate.jw.org. Meitaki maata no ta kotou moni tauturu, tei riro ei tauturu katoa i te au tumatetenga ke takapini i teianei ao.—2 Korinetia 8:14.