TAANGAANGAIA TAAU MONI TAUTURU
Tiunu Anga Kia Akarongo ki te Uruoaanga
AUKUTE 1, 2021
Mataora tikai te uruoaanga tapere 2020—ta tatou uruoaanga mua ki te ao katoa tei rekotiia e kua aere na runga i te Initaneti! Inara, i Malawi e Mozambique, kare i rauka ana i te au taeake e te au tuaine te uruoaanga na runga i te Initaneti. Akapeea i tae ei kia ratou?
Kua akatika te nga kumiti Akaaere e te Apiianga o te Pupu Akaaere kia broadcast i te uruoaanga na runga i te tivi e te ratio i Malawi e Mozambique. Eaa i anoanoia ai te reira? No te mea ko Malawi tetai enua i teianei ao e ākā moni te tutaki i te data Initaneti, e meangiti ua te Au Kite e Initaneti ta ratou. Mei tei akatakaia e William Chumbi, e mata no te Kumiti Betela o Malawi: “Ko te ratio e te tivi te ravenga anake kia tae te kai pae vaerua ki te au taeake e te au tuaine.” Karanga a Luka Sibeko, e mata katoa no te Kumiti Betela o Malawi: “Naringa kare te uruoaanga i tae na runga i te tivi e te ratio, e meangiti ua te au taeake i to matou ngai ka puapingaia mei te reira.” Pera i Mozambique, e meangiti ua te au taeake ka peke te apinga uira, e te Initaneti.
Te au Akanoonoo Anga
No te maki kino COVID-19, kua broadcast tetai tivi e te au ratio i te au uipaanga putuputuanga. a Kua aravei atu te au taeake i teia au station no te pati kia rauka tetai tuatau no te broadcast i te uruoaanga.
I Malawi, kua taʼii te au taeake. Tei matauia, e tai ora e orongaia ana ki te tangata kia akaari i ta ratou porokaramu na runga i te mareva. Kua manata te au station penei kare te tangata e inangaro i te akara i tetai porokaramu roa. Inara kua akamārama te au taeake e ka riro teia ei akamaroiroi i te iti tangata. Noatu te tuatau lockdown, te oronga nei tatou i te nuti meitaki o te Pipiria ei akapumaana i te tangata, kia riro ratou ei iti tangata meitaki ma te oraanga ngutuare mataora. Te rongo anga ratou i teia, kua āriki te au station i te patianga a te au taeake no tetai tuatau roa.
I Malawi, e tai tivi e tai ratio tei broadcast i te uruoaanga, e ka tae te reira ki te katoa anga o te enua ma te mirioni ua atu tangata. I Mozambique, e tai tivi e 85 ratio tei broadcast i te uruoaanga.
I teia nga enua, e $28,227 b tei pou no te broadcast i te uruoaanga na runga i te tivi, e vaitata i te $20,000 na runga i te ratio. E tukeke te pira, mei te $15 no te ratio meangiti e tae ua atu ki te $2,777 no te ratio mamaata.
Kua angaanga pakari te au taeake no te taangaanga meitaki i te au moni tauturu. I Malawi, ei akaraanga, kua pati ratou kia iti mai te tutaki e kua rauka e 30 patene māmā mai. E $1,711 moni tei toe mai. I Mozambique, kua inangaro tetai au station i te akamāmā mai i ta ratou tiati no te tu meitaki e te tu tika o te au taeake e te tutaki vave i ta ratou pira.
Akameitakianga Maata
Reka tikai te au taeake te akara e te akarongo i te uruoaanga i runga i teia au station. Karanga a Patrick, e tangata pakari i Malawi e: “Akameitaki matou i te au taeake o te Pupu Akaaere no ta ratou i rave i teia tuatau o te maki kino.” Karanga a Isaac, no Malawi e: “Kare a matou apinga apaipai no reira kua rekareka tikai matou no teia akanoonoo anga manea no ko mai i te akaaerenga a Iehova kia akarongo ki te uruoaanga na runga i te ratio. Tei tupu mai, kua puapingaia toku ngutuare tangata mei teia uruoaanga. Kua kite matou i teia ei akapapu anga i to Iehova aroa no tona iti tangata.”
Ko te uruoaanga 2020 te uruoaanga mua na tetai papuritia i Mozambique. Karanga aia: “Kua akamaara mai te reira akanoonoo anga kia kite au i te uruoaanga i runga i te tivi, e ko Iehova te Atua mana katoatoa. Kare te maki kino i arai ana iaia kia oronga mai i te au kai pae vaerua e kua tae mai ki roto tikai i toku ngutuare. Kua kite au i to Iehova aroa i rotopu i tona iti tangata. Papu iaku ko teia te akonoanga tika.”
Karanga te tangata pakari ko Wyson e: “Ka inangaro au i te akameitaki i te tavini akono meitaki no tei akono mai ia matou i teia tuatau o te maki kino. Kua riro teia broadcast uruoaanga na runga i te ratio e te tivi ei tauturu ia matou aronga putaua i teianei ao kia rauka teia porokaramu e kia puapingaia mei te reira.”
No teia uruoaanga tapere 2021, kua akatika katoa te nga kumiti Akaaere e te Apiianga kia broadcast i te uruoaanga na runga i te tivi e te ratio ki tetai au ngai te noo ra te tangata. Akapeea tatou te tutaki anga kia broadcast i teia uruoaanga? Na roto i te au moni tauturu o te angaanga i te ao katoa tei oronga aroaia mai na roto i te donate.jw.org. Meitaki maata no to kotou ngakau aroa.
a I te akamata anga o te 2020 i te tuatau o te maki kino COVID-19, kua akatika te Kumiti Akaaere kia broadcast i te au uipaanga putuputuanga i tetai au enua na runga i te tivi e te ratio. Kua tauturu teia i te aronga kare e rauka te uipaanga putuputuanga me kore te JW Stream no te mea e ngata kia rauka te Initaneti e kare te tereponi apaipai e angaanga e e ākā moni te reira. Inara, kare teia akanoonoo anga no te aronga ka rauka ta ratou au uipaanga na roto i te putuputuanga o te ngai e noo ra ratou.
b E moni Marike pouroa teia.