Roma 14:1-23
14 TE tangata oki kare i maroiroi i te akarongo nei, ka āriki atu kotou, auraka ra e māro i te tuatua kare i kitea tikaia ra.
2 Te manako ra oki tetai e, ka tika iaia kia kai i te manga tini katoatoa nei: e ko tetai oki ko tei kore i maroiroi ra, ko te kai tanu anake ua tana e ka kai.
3 Auraka tei kai ra, e akavaavaa atu i tei kore i kai ra; e auraka katoa oki tei kore e kai ra e akaapa atu i tei kai ra: kua ārikiia mai oki aia e te Atua.
4 Koai oki koe na, ka akaapa atu ei i to tetai ke ra tavini? tei tona uaorai pu tona mou e tona inga: ka akamouia ra aia, e tika oki i te Atua i te akamou iaia.
5 Te manako nei tetai e, e tu ke to tetai rā i tetai rā; te manako nei oki tetai okotai rai tu to nga rā katoatoa: kia papu ra te tangata ravarai i tona uaorai ngakau.
6 Ko tei akono i tetai rā ra, no te Atu ïa i akono ei; e ko tei kore i akono i te rā ra, no te Atu ïa i kore ei i akono. Ko tei kai ra, no te Atu ïa i kai ei, e kua akameitaki oki aia i te Atua; e ko tei kore i kai ra, no te Atu ïa i kore ei i kai, e kua akameitaki oki i te Atua.
7 Kare rava oki tetai o tatou e ora nei ei akatupu i tana uaorai, e kare oki tetai e mate nei ei akatupu i tana uaorai.
8 Te ora nei tatou, i ora ïa tatou ei akatupu i ta te Atu; e te mate nei tatou, i mate ïa tatou ei akatupu i ta te Atu: e teianei, te ora nei tatou, e te mate nei oki, no te Atu rai tatou.
9 No reira oki te Mesia i mate ei, e i tu akaou ei, e i oraʼi, kia riro aia ei Atu no tei mate, e no tei ora oki.
10 Eaa ra oki koe i akaapaʼi i to taeake? e eaa oki koe i akavaavaa atu ei i to taeake? ka tu katoatoa tatou ki mua i te akavaanga a te Mesia ra.
11 Kua tataia oki e, Te na ko maira te Atu, “Te ora nei au, e tuturi te au turi katoa ki raro ki mua iaku, e ka ope te au vaa ravarai i te aaki i te Atua ra.”
12 E teianei, ka ope takiri rava tatou i te aaki i te tuatua iaia uaorai i te Atua ra.
13 E teianei, oti ra ua tatou i te akaapa tetai ki tetai: teia ra ta tatou e akono e, auraka ei turorianga e tukuia mai ki mua i tetai taeake, e te mea e maitu ei ra.
14 Kua kite au, e kua akakiteia mai au e te Atu ra e Iesu, e kare rava e mea viivii tikai, ko te tangata ra e manako e, e mea viivii taua mea ra, e mea viivii ra ïa iaia.
15 Kia kinokino ra to taeake i taau na kai, kare atura toou aerenga i tau i te aroa. Eiaa e mate te tangata i mate ei te Mesia ra, i taau na kai.
16 Auraka oki to kotou meitaki e akakinoia:
17 Kare oki te basileia o te Atua ra te kai, e te mea e inu, ko te tuatua-tika ra, e te au, e te reka i te Vaerua Tapu ra.
18 Ko tei akono oki i teianei au tuatua i tona tavini anga i te Mesia ra, te tau ra aia i te Atua, e ka akatikaia e te tangata katoa nei.
19 E teianei, ka umuumu tatou i te tuatua i akatupu i te au, e te tuatua e meitaki kapipiti ei ra.
20 Eiaa e akakoreia te angaanga a te Atua nei i te kai. E mea viivii kore oki te au mea katoa nei, e mea kino ra i te tangata i kai ma te turori.
21 E mea meitaki oki kia kore e kai i te puaka, e kia kore e inu i te wina, e kia kore e rave i te au mea ravarai e turori ei to taeake ra, e e maitu ei, a e apikepike ei ra oki.
22 E akarongo toou ra? Ka tāpu tikai noou uaorai i mua i te aroaro o te Atua. E ao to te tangata kare i akaapa iaia uaorai i tana ra mea tika.
23 Ko tei ekoko ra i te kai nei, kua akaapaia aia kia kai ra, no te mea kare tana i te kai akarongo: ko te au mea katoatoa oki kare i to te akarongo ra, e ara ïa.