Roma 12:1-21
12 E TEIANEI, e aku au taeake, te ako atu nei au ia kotou o te aroa o te Atua, kia tuku atu kotou i to kotou au kopapa ei atinga ora, e te tapu, e tau oki i te Atua, ko te akamori e tau ïa ia kotou.
2 E eiaa e akatau atu i teianei ao: ei tu ke ra to kotou i te akaou anga o to kotou ngakau, kia taka tikai ia kotou i to te Atua ra anoano, tei meitaki, e te tau, e te apa kore oki.
3 Teia taku tuatua kia kotou katoatoa e ope rava ake, i te meitaki i orongaia mai kiaku nei, eiaa e maata te manako iaia uaorai, i tei tau iaia kia manako ra; ka akono tikai ra te manako kia arite i te tu o te akarongo i tuaia e te Atua i te tangata katoatoa.
4 Mei ia tatou oki e manganui te melo i te kopapa okotai nei, kare ra e okotai rai taoonga to taua au melo katoa nei:
5 Koia katoa oki tatou, i maata ua rai tatou, okotai ïa kopapa i te Mesia, e e melo oki tatou no tatou uaorai e ope rava ake.
6 E e taoonga ke ke anake to tatou, e tau i te meitaki i orongaia mai kia tatou nei, e totou ra, ka totou tatou i tei tau i te tu o te akarongo ra;
7 E taoonga diakono ra, ka rave i te taoonga diakono; e ko tei apii ra, ei te apii ïa;
8 E ko tei akamaroiroi ra, ei te akamaroiroi ïa; ko tei tua apinga ra, ka rave aia ma te meitaki; ko tei akakite ra, kia akakite ïa ma te akono meitaki; ko tei takinga-meitaki aere ra, kia pera ma te ngakau tae.
9 Ei aroa pikikaa kore rai. Kia rikarika i te kino; kia kapiti atu ki te meitaki.
10 Ei kapiti anga aroa mou to kotou ia kotou uaorai, i te aroa taeake ra; i te akangateitei anga tetai ki tetai.
11 Eiaa e akatau i te angaanga; kia maroiroi oki te ngakau, i te tavini anga i te Atu;
12 E rekareka i te inanakonako anga; e akakoromaki i te mate; tamou marie tikai i te pure.
13 Ka oronga atu i te apinga i te aronga tapu i to ratou ra ngere anga; ka akamātau rai i te takinga-meitaki i te tangata ke ra.
14 Ka akaora atu i te tangata e takinga-kino mai ia kotou; ka akaora atu, auraka e tao.
15 Kia rekareka kotou i te aronga e rekareka ra, ka aue katoa oki i te aronga e aue ra.
16 Kia okotai ngakau to tetai e tetai: auraka e umuumu atu i te mea teitei, e arite katoa atu oki i te aronga akaaka. Auraka oki e pakari i to kotou uaorai au manako.
17 Auraka te kino e tutakiia atu ki te kino i te tangata ravarai nei. Ka akonokono ana i te mea tika tikai ki mua i te aroaro o te tangata katoa nei.
18 Peneiake ko te tika, ko ta kotou ïa e aruaru e, kia noo au ua kotou i roto i te tangata katoa nei.
19 E taku au akaperepere e, auraka e akaoko, tuku ua atura i te riri; kua tataia oki e, “Te tuatua maira te Atu, ei iaku te akaoko, e naku e tutaki atu.”
20 E teianei, “te pongi ra to enemi, ka akaangai atu; e te kaki vai ra, ka akainu atu: te akaputu ra koe i te ai ngarau ki runga i tona upoko i reira.”
21 Auraka e mate i te kino, kia mate ra te kino ia koe i te meitaki.