Numero 9:1-23
9 KUA tuatua mairā Iehova kia Mose i te medebara ra i Sinai, i te marama mua, i te rua o to ratou mataiti i te aere anga mai mei te enua maira mei Aiphiti, na ko maira,
2 E akono katoa te tamariki a Iseraela i te pasa i tona tuatau i akonoia ra.
3 Ei ta rā okotai ngauru ma a i teianei marama, ei tona tuatau tikai ra, ei te aiai kotou e akono ei: i tona katoa ra au akonoanga, e tona katoa ra au peu, kia akono kotou ra.
4 Kua karanga aturā Mose ki te tamariki a Iseraela e, e akono i te pasa ra.
5 E kua akono iora ratou i te pasa i te rā okotai ngauru ma a i te marama mua ra, i te aiai, i te medebara ra i Sinai: ko ta Iehova i akaue mai kia Mose ra, ko ta te tamariki a Iseraela i rave.
6 Kua viivii e tokotai puke tangata i tetai tangata mate, kare akera i tika ia ratou kia akono i te pasa i taua rā ra: kua aere maira ratou kia mua i te aroaro o Mose raua ko Aarona i taua rā ra;
7 E kua tuatua maira taua au tangata ra kiaia, Kua viivii matou i tetai tangata mate; eaa ra matou i tāpuiaʼi, e auraka e apai i tetai atinga na Iehova, ko matou e te tamariki a Iseraela katoa, i tona tuatau tikai ra?
8 Kua karanga aturā Mose kia ratou, E tapapa ua mai ana kotou, kia kite ra au i ta Iehova tuatua ia kotou na.
9 Kua tuatua mairā Iehova kia Mose, na ko maira,
10 E karanga atu koe ki te tamariki a Iseraela, e na ko atu, I viivii ua atu tetai tangata o kotou, e to kotou uki a muri atu, i te tangata mate, e kia taa i te ara tiroa i te ngai mamao ra, e akono rai ïa i te pasa a Iehova ra.
11 Ei te rā okotai ngauru ma a i te rua o te marama i te aiai, e akono ei ratou, ei areto akaopue kore e te rakau maamaa ka kai ei ratou i te reira.
12 Auraka roa ratou e vaoo i tetai manga no te popongi, auraka ua oki tetai ivi o te reira ra kia aatiia e ratou: kia tika katoa te au akonoanga o te pasa ra kia rave ratou.
13 Ko te tangata i mā, kare i taa i te ara tiroa, kia kore e akono i te pasa ra, ka tipu keia ïa tangata i tona iti-tangata; no te mea kare aia i apai mai i te atinga a Iehova i tona tuatau tikai ra, ei taua tangata ra te utunga o tana ara.
14 E kia uarere ua te tangata ke i roto ia kotou na, e kua inangaro aia i te akono i te pasa a Iehova ra; ko te akonoanga o te pasa ra, e te peu tana e rave kia tau tikai: kia okotai rai a kotou akonoanga no te tangata ke, e no te tangata uenua.
15 I te rā i akatuiaʼi te puakapa ra, tapokiia iora te puakapa e te tumurangi, i te Are kite ra: e po iora mei te ai te tu i te vai ua anga ki runga i te puakapa, e ao ua ake.
16 Ko te tu uaorai ïa; ko te tumurangi tei tapoki mai i te ao, e kia po, riro atura mei te ai ra te tu.
17 E kia apaiia taua tumurangi i rungao i te Are ra ki runga, kua aere te tamariki a Iseraela i reira ra; e te ngai i noo ei taua tumurangi ra, kua patia te tamariki a Iseraela i to ratou puakapa i reira.
18 Tei te akaue a Iehova i aere ei te tamariki a Iseraela, e tei te akaue a Iehova i patiaʼi ratou i te puakapa: te vai ra taua tumurangi ra ki runga i te puakapa ra, e noo ua ratou i roto i te puakapa.
19 E kia noo roa taua tumurangi ra ki rungao i te puakapa e manganui te rā ra, kua tapapa te tamariki a Iseraela i te iku a Iehova, e kare ïa i aere:
20 E etai puke rā ua to taua tumurangi ra i te noo ua anga ki runga i te puakapa ra, okotai rai peu; e noo ua ratou i roto i te puakapa i reira, i ta Iehova oki i akaue maira, e tei te akaue oki a Iehova i aere ei ratou.
21 E koia katoa kia po tai ua taua tumurangi ra i te noo anga, e ao ake kua apaiia taua tumurangi ra ki runga, kua aere ïa ratou i reira; i te ao ra e te po katoa kua apai anakeia taua tumurangi ra ki runga, kua aere ïa ratou i reira.
22 Kia noo ua rai taua tumurangi ra ki rungao i te puakapa e po rua atura, e mate atura te marama, e ope atura oki te mataiti, kua noo rai te tamariki a Iseraela i roto i te puakapa, kare ïa i aere: kia apaiia ra ki runga ra, kua aere ia ratou i reira.
23 Tei te akaue a Iehova to ratou noo i te puakapa, e tei te akaue a Iehova to ratou aere: kua tapapa ratou i tei iku naia mai e Iehova, i te akaue a Iehova ia Mose ra.