Numero 31:1-54
31 KUA tuatua mairā Iehova kia Mose, na ko maira,
2 E tutaki atu koe i te ngati Midiana i te tamariki a Iseraela nei: e muri akera ka kapiti katoaia atu koe ki toou ra iti-tangata.
3 Kua karanga aturā Mose ki te au tangata ra, na ko atura, Ka rakei ana tetai papaki o kotou na ki te rakei tamaki, e aere ka tamaki ei ki te ngati Midiana, ka tutaki atu ei i te ngati Midiana i te tutaki a Iehova ra.
4 Okotai kopu okotai tausani, ta kotou e tuku ki te tamaki, e pini ua ake te au kopu ravarai i Iseraela nei.
5 Ikiia iora taki tai tausani i te kopu okotai no roto i te au tausani o Iseraela, okotai ngauru e rua ara i te tausani, ma te rakei tamaki katoa.
6 Kua akaue aturā Mose ia ratou e aere ki te tamaki, taki tai tausani to te kopu okotai e pini ua ake, ko ratou, e ko Phinehaza te tamaiti a Eleazara taunga ra, ki te tamaki ra, e nga taoonga tapu ra, koia nga pu, i te rima ei akatangi anga.
7 Tamaki atura ratou ki te ngati Midiana, i ta Iehova i akaue mai ia Mose ra; e ope rava akera te au tane i te mate ia ratou.
8 E te au ariki o Midiana tei ta katoaia e ratou i runga i te aronga i taia ra, ko Evi, e ko Rekema, e ko Zuri, e ko Hura, e ko Reba; nga ariki toko rima o Midiana ra: e kua ta katoa oki ratou ia Balaama te tamaiti a Beora ki te koke.
9 Riro mai nei te au vaine, e te au tamariki mea riki katoa a Midiana ei tuikaa i te tamariki a Iseraela, ope rava maira oki ta ratou puaka, e ta ratou anana, e ta ratou apinga tini ravarai, i te noniia e ratou.
10 E tutungi atura oki ratou i to ratou au oire katoa, e te au punanga katoa, i nooia e ratou, ki te ai.
11 Kua noni iora ratou i te au mea katoa, e te au apinga ravarai, ma te tangata e te puaka katoa.
12 E kua apai maira ratou i te au tuikaa, e te au mea i āruia, e te apinga, kia Mose, e kia Eleazara taunga ra, e ki te uipaanga tamariki a Iseraela, ki te puakapa i taua ngai mataataa i Moabi ra, i tetai pae Ioridana i aite ki Ieriko ra.
13 Aere aturā Mose, e ko Eleazara taunga, e te aronga mamaata o te uipaanga katoa ra, e aravei atu ia ratou ki vao mai i te puakapa ra.
14 E riri aturā Mose ki te aronga rangatira i taua nuku ra, ki te au rangatira tausani, e te au rangatira anere, ko te aere mai mei te tamaki maira.
15 Kua karanga aturā Mose kia ratou, Kua akaora ravarai ainei kotou i te au vaine?
16 I na, na ratou i ara ai te tamariki a Iseraela ia Iehova i te tuatua a Balaama i Peora ra, rokoia iora te uipaanga o Iehova e te maki-mate
17 E tenana, e ta i te au tamariki tamaroa ravarai i roto i te au tamariki na, e ta katoa oki i te au vaine i kite i te tangata i te moe anga ki te tane ra.
18 Kareka i te tamariki tamaine, kare i kite i te tane i te moe angaia ra, e akaora ïa na kotou uaorai.
19 E noo oki kotou ki vao i te puakapa nei e kia po itu ake: e ko tei mate iaia te tangata ra, e ko tei arapaki oki i te tangata mate, e tamā aia iaia uaorai, kia tae ki te po toru, e te po itu rai.
20 Te au kakau katoa ra, e te au apinga kiri katoa ra, e te au mea katoa i angaia i te uru puakanio ra, e te au mea rakau katoa, e tamā katoa kotou i te reira.
21 Kua karanga aturā Eleazara taunga ki te au tangata tamaki mei te tamaki maira, Teia te akonoanga i te ture ta Iehova i akaue mai kia Mose:
22 Ko te auro, e te ario, te veo, te auri, te punu, e te tapou,
23 Ko te kore e pou i te ai ra, e tuku ïa kotou ia roto i te ai, ka mā ïa i reira; ka tamāia ra ki te vai tamā ra: e te kore e tika kia tuku i te ai ra, ka tuku kotou i te reira ki raro i te vai.
24 E orei oki kotou i o kotou kakau, kia tae ki te po itu ra, ka mā atu ei, e i muri ake e tae mai ïa kotou ki roto i te puakapa nei.
25 Kua tuatua mairā Iehova kia Mose, na ko maira,
26 Ka tatau ana koe i te au mea katoa no te āru ra, ko te tangata e te puaka: ko koe, e ko Eleazara taunga ra, e te aronga mataiapo tutara no te uipaanga nei:
27 Ka tuaʼi i te au mea ravarai no te āru ra; kia rua ake tuanga, ta te aronga i aere ki te tamaki, e kua tamaki ra, e ta te uipaanga katoa ra:
28 Ka rave ei koe i te mataiā na Iehova no roto i te tuanga a te au tangata tamaki i aere ki te tamaki, e rima anere ra, okotai aau e rave, i to te tangata, e to te puakatoro, e to te asini, e to te mamoe;
29 Ka rave i te reira no roto i ta ratou tuanga, ka apai atu ei kia Eleazara taunga ra, ei atinga apaiia ki runga na Iehova.
30 E ta te tamariki a Iseraela tuanga, tataki tai i te rima i te ngauru taau e rave mai, i to te tangata, to te puakatoro, to te asini, e to te mamoe, to te au puaka katoa ra, ka apai atu ei ki te ngati Levi, tei ia ratou te tiaki i te akaonoanga i te puakapa o Iehova ra.
31 Kua pera oki a Mose raua ko Eleazara taunga, i ta Iehova i akaue mai kia Mose ra.
32 E taua apinga i āru ra, i tei toe i ta te au tangata tamaki i rave maira, e ono ïa anere e itu ngauru e rima ara i te tausani o te mamoe,
33 E itu ngauru anga e rua ara i te tausani i te puakatoro,
34 E ono oki ngauru ma tai i te tausani i te asini,
35 E toru oki ngauru e rua ara i te tausani i te tangata, e vaine anake ïa kare rai i kite i te tane i te moe angaia ra.
36 E tetai afa, te tuanga a te aronga i aere ki te tamaki ra, e toru ïa anere e toru ngauru ma itu i te tausani, e rima anere, i te mamoe kia tatau ra:
37 E te mataiā a Iehova i taua au mamoe ra, e ono ïa anere, e itu ngauru, e rima ara ra.
38 E te au puakatoro ra, e toru ïa ngauru e ono ara i te tausani; e te mataiā a Iehova no roto i te reira ra, e itu ïa ngauru ma rua.
39 E te au asini ra, e toru ïa ngauru i te tausani, e rima anere; e te mataiā a Iehova no roto i te reira ra, e ono ïa ngauru e okotai ara.
40 E te au tangata ra, okotai ïa ngauru ma ono i te tausani; e te mataiā a Iehova no roto ia ratou ra, e toru ïa ngauru ma rua.
41 E kua apai aturā Mose i taua mataiā ra, i te atinga apaiia ki runga a Iehova ra, kia Eleazara taunga ra, ta Iehova i akaue mai kia Mose ra.
42 E to te tuanga a te tamariki a Iseraela, ta Mose i rave i te aronga i aere ki te tamaki ra,
43 I te tuanga a te uipaanga, e toru anere e toru ngauru ma itu i te tausani, e rima anere, i te mamoe,
44 E toru ngauru e ono ara i te tausani i te puakatoro,
45 E toru oki ngauru i te tausani, e rima anere, i te asini,
46 Okotai ngauru oki ma ono i te tausani i te tangata;
47 To taua tuanga a te tamariki a Iseraela ra, kua rave iorā Mose i to te reira katoa taki tai i te rima ngauru, i to te tangata, e to te puaka, e kua tuku atura ki te ngati Levi ra, tei ia ratou te tiaki i te akonoanga i te puakapa o Iehova: i ta Iehova i akaue mai kia Mose ra.
48 Kua aere maira te au rangatira no rungao i te au tausani i taua nuku ra, te au rangatira tausani, e te au rangatira anere, kia Mose ra:
49 Kua tuatua maira ratou kia Mose, I tatau ana toou au tavini i te au tangata tamaki i raro ake ia matou nei, e kare tetai o matou nei i riro.
50 E teianei i apai mai nei matou i tetai atinga na Iehova, i tei rauka ia matou ra, i te apinga auro ra, i te pirianga-naoa, e te tapeka, te momono-rima, te poe, e te tatua, ei tapokiangaara na matou ki mua i te aroaro o Iehova.
51 Kua rave aturā Mose raua ko Eleazara taunga i ta ratou katoa ra au apinga auro i angaia ra.
52 E te rai o taua auro katoa ra i te atinga apaiia ki runga ta te au rangatira tausani, e te au rangatira anere, i apai na Iehova ra, okotai ïa ngauru ma ono i te tausani, e itu anere, e rima ngauru i te sekela.
53 Ko ta te au tangata tamaki ïa i rauka, ko te tangata ko tana, ko te tangata ko tana.
54 Kua rave iorā Mose raua ko Eleazara taunga ra i taua auro a te au rangatira tausani, e te rangatira anere ra, e kua apai atura ki roto i te Are uipaanga, ei manakoanga i te tamariki a Iseraela ki mua i te aroaro o Iehova ra.