Numero 14:1-45
14 KUA akateitei anake iora taua uipaanga katoa ra i to ratou reo, kakaoa atura; aue iora te tangata i te reira po.
2 Kua urutoe iora te tamariki ravarai a Iseraela ia Mose, e ia Aarona: e kua tuatua maira taua uipaanga katoa ra kia raua, Naringa matou i mate i te enua ra i Aiphiti e! e teianei oki medebara kia mate ua atu matou i ko nei rai!
3 Eaa oki tatou i aratakiia mai ei e Iehova ki teianei enua, kia mate i te koke, e kia riro ta matou au vaine e ta matou au tamariki? Kare aina i te mea meitaki kia oki tatou ki Aiphiti?
4 Kua tuatua iora ratou ratou uaorai, E akataka ana tatou i tetai arataki ia tatou, e oki tatou ki Aiphiti.
5 Kua tipapa iorā Mose raua ko Aarona i raro to raua mata, ki mua i te aroaro o te uipaanga tamariki a Iseraela katoa ra.
6 E ko Iosua te tamaiti a Nuna ra, e ko Kaleba te tamaiti a Iephune, no taua aronga i tutaka aere i taua enua ra, aeae iora raua i to raua kakau:
7 E kua karanga atura raua ki te uipaanga tamariki ravarai a Iseraela ra, na ko atura, Ko te enua ta matou i tutaka aere ra, e enua meitaki maata roa ïa.
8 Kia mareka mai a Iehova ia tatou nei, nana tatou e arataki ki taua enua ra, e nana e oronga mai no tatou; e enua taʼe a vai ua ïa te u e te meli.
9 Auraka ra kotou e kaitamaki atu kia Iehova, auraka oki e mataku i te tangata o taua enua ra, e manga ïa na tatou; kua aere ke to ratou maru, teiā Iehova tei ia tatou nei; auraka roa e mataku atu ia ratou.
10 Kua tuatua iora taua uipaanga katoatoa ra, e peî ia ratou ki te toka. Kua kitea maira te kakā o Iehova ra, i te Are uipaanga ra, ki mua i te au tamariki katoa a Iseraela ra.
11 Kua tuatua mairā Iehova kia Mose, Aea ra teianei aronga e akapaki ei i te akakōkō mai iaku? Aea oki ratou e akarongo mai ei iaku, i te au akairo katoa taku i rave i roto ia ratou ra?
12 Ka ta au ia ratou ki te maki-mate, e akangere au ia ratou, e ka akariro au ia koe ei iti-tangata maata roa atu, e te ririnui roa, ia ratou nei.
13 Kua karanga aturā Mose kia Iehova, Ka kitea te reira e to Aiphiti, no roto ia ratou teianei aronga i te arataki angaia e koe i toou na ririnui:
14 Ka riro oki ratou i te akakite ki te au tangata o taua enua nei; kua akarongo oki ratou e, tei rotopu koe, e Iehova, i teianei iti-tangata, e te kitea nei toou mata, e Iehova, ki mua tikai i to ratou mata, e te vai ra te tumurangi naau ki rungao ia ratou, e te na mua nei koe ia ratou i te aere, i roto i te pou tumurangi i te ao, ei roto i te pou ai i te po.
15 Kia ta oki koe i teia katoa nei aronga mei te tainga tangata okotai ra, ka riro te pa enua i kite i to rongo ra i te tuatua, e te na ko anga e,
16 No te mea kare i tika ia Iehova kia apai i teianei aronga ki te enua tana i taputou e, e oronga no ratou, i ta ai aia ia ratou i te medebara ra.
17 E teianei, teia taku tuatua kia koe, kia maata te mana o taku Atu, mei taau oki i tuatua, ka na ko mai ei ra e,
18 E akakoromaki roa to Iehova, e te aroa maata, e te akakore i te tuatua-tika kore, e te ara, e kare e tuatua ki te tangata kino e, e tangata kino kore; e te tutaki anga i te ara a te aronga metua ki runga i te tamariki, e kia tae ki te toru e te a o te uki ra.
19 Ko toku teia anoano, e akakore koe i te ara a teianei iti-tangata, i te aroa maata noou ra, mei taau oki i akakore i te ara a teianei aronga, mei Aiphiti maira e teia noaʼi.
20 Kua tuatua mairā Iehova, Kua akakore oki au, i taau i tuatua maira:
21 Te ora nei ra au, e ka akakiia te ao katoa nei ki te kakā o Iehova,
22 Kare takiri te au tangata ravarai nei, ko tei kite i toku ra kakā, e taku ra au akairo, i taku i rave i Aiphiti, e i te medebara ra, e ko te ngauru teia o ta ratou akakōkō anga mai iaku, e kare akenei i akarongo mai i toku reo;
23 Kare takiri ratou e kite i te enua taku i taputou atu ki to ratou ai metua ra; kare rava tetai o taua aronga i akakōkō mai iaku ra e kite i taua enua ra:
24 Kareka toku tavini ra ko Kaleba, no te mea e ngakau ke tona, e kua aru totomapu mai aia iaku, e arataki au iaia ki te enua tana i aere ra; e na tona uanga e noo i reira.
25 E tenana, te noo ra te ngati Amaleka, e te ngati Kanaana i te o ra: apopo e ariu e aere ki to medebara, e tae tika atu ei ki taatai ki te Tai Muramura ra.
26 Kua tuatua mairā Iehova kia Mose raua ko Aarona, na ko maira,
27 Mei te aa ra te roa o toku akakoromaki anga i teianei uipaanga tangata kikino, e urutoe ua iaku nei? Kua kite au i te urutoe a te tamariki a Iseraela, ta ratou e urutoe ua nei iaku.
28 E karanga atu koe kia ratou, Te tuatua mairā Iehova, Te ora nei au ra, ko ta kotou i tuatua io nei ki roto i toku nei taringa, ka pera rai au ia kotou:
29 Ei teianei medebara to kotou au kopapa vai ei: ko to kotou katoa i tatauia ra, ko kotou ravarai e pini ua ake, i tei tae ki te rua ngauru o te mataiti e tei ara atu, tei urutoe iaku nei,
30 Ko te ka kore roa e tae ki te enua, taku i taputou ra e, e noo kotou i reira, mari ra ko Kaleba te tamaiti a Iephune, e ko Iosua te tamaiti a Nuna ra.
31 Ko ta kotou ra au tamariki, ta kotou i tuatua ra e, ka riro, ko taku ïa e arataki ki runga, e ko ratou te ka kite i te enua ta kotou i akavaavaa ra.
32 Kareka kotou na, ei teianei medebara to kotou kopapa vai ei.
33 Ei roto i te medebara ta kotou au tamariki e aere uaʼi, e e a ngauru anga o te mataiti; e mate katoa ratou i ta kotou akaturi, e kia ope to kotou au kopapa i te mate i te medebara nei.
34 Mei te au rā katoa ta kotou i tutaka aere i taua enua ra, te au rā e a ngauru ra, okotai rā okotai ïa mataiti, ko te vairanga ïa o te utunga i ta kotou ara ki runga ia kotou, e a katoa ngauru anga o te mataiti, e ka kite kotou i toku akaruke anga ia kotou.
35 Ko au teia ko Iehova e tuatua nei, e naku tikai e rave i taua mea nei i teia katoa nei uipaanga tangata kikino, ko tei uipao e māro mai iaku nei: e ei teianei medebara ratou ka pou ei, e ei reira ratou ka mate ei.
36 Ko taua aronga tangata i tonokia e Mose e tutaka aere i taua enua ra, ko tei oki mai ma te tuatua kino i taua enua ra i te apai anga mai, i urutoe ei taua uipaanga katoa ra iaia,
37 Ko taua aronga tangata i apai mai i te tuatua kino i taua enua ra, mate takiri iora ïa i te maki-mate ki mua i te aroaro o Iehova.
38 Karekā Iosua te tamaiti a Nuna, e ko Kaleba te tamaiti a Iephune ra, no taua aronga katoa i tutaka aere i taua enua ra, kua ora ïa.
39 Kua akakite aturā Mose ki te au tamariki katoa a Iseraela i teianei au tuatua: aue roa atura taua aronga ra.
40 Kua tu akera ratou ki runga i te popongi roa, aere atura ki runga i te tuaivi, kua tuatua akera, Teia oki matou, i na, e aere matou ki te ngai ta Iehova i tuatua maira: kua ara oki matou nei.
41 Kua karanga aturā Mose, Eaa kotou i akatokāʼi i te tuatua a Iehova i tenana? kare tena e tupu.
42 Auraka e tae ki runga, kare oki a Iehova ki ko na i rotopu ia kotou na; ka mate aea kotou ki mua i te aroaro o to kotou au enemi.
43 Tei reira oki te ngati Amaleka, e te ngati Kanaana, kua riro ana, ka mate kotou i te koke: no te mea kua akatitima kotou ia Iehova, e kore ei a Iehova e piri atu kia kotou na.
44 Māro atura ra ratou, aere atura ki runga roa i te maunga ra: kareka te aruna koreromotu a Iehova, e ko Mose ra, kare ïa i akaruke i te puakapa.
45 Kua eke maira te ngati Amaleka, e te ngati Kanaana, i noo i taua maunga ra, pou maira ratou, ta aere maira ia ratou, e tae rava maira ki Horama.