Mataio 8:1-34
8 E IAIA i eke mai mei te maunga maira, ma te urupu maata katoa i te aru anga mai iaia ra;
2 I na, kua aere maira tetai lepera, akateni maira iaia na ko maira. E te Atu, kia tika ia koe, e mā au ia koe.
3 Kua akatika mairā Iesu i tona rima, akatukia atura iaia, na ko atura; Kua tika ïa iaku, kia mā koe. Mā atura te lepera nona i reira ra.
4 Kua karanga aturā Iesu kiaia, Auraka takiri koe e aaki ki te tangata; ka aere ra, e akakite ia koe uaorai ki te taunga, e apai atu i te taoonga-rima i akaueia mai e Mose ra, ei akakite anga atu kia ratou.
5 E tae aturā Iesu i roto i Kaperenauma, kua aere maira tetai rangatira anere, tuatua meitaki maira kiaia,
6 Na ko maira, E te Atu, kua maki taku tavini, e te vai ua ra i te ngutuare, kua maata rava tona maki, e akangoru.
7 Kua karanga aturā Iesu, E aere atu au e akaora iaia.
8 Kua tuatua maira te rangatira anere, na ko maira, E te Atu, kare au e tau kia tomo mai koe ki roto i taku are: ko te tuatua, anake taau e tuatua, ka ora ïa taku tavini i reira.
9 Ko au katoa nei oki, ko raro ake au ia etai ke, e vaeau ra to raro ake iaku, e kia tuatua au ki tetai, Ka aere, kua aere ïa; e ki tetai, Ka aere mai, kua aere mai ïa; e ki taku tavini, E na ko, kua na reira ïa aia.
10 E kite akerā Iesu i te reira, va ua iora aia, e kua karanga atura ki te aronga i aru mai iaia ra, Koia tikai taku e karanga atu kia kotou nei, Kare rai au i kite i teia akarongo i te maata i Iseraela nei.
11 E akakite atura au kia kotou, Manganui te ka aere mai, mei te itinga o te rā, e te opunga o te rā, e ka noo katoa ratou, ko Aberahama, e ko Isaaka, e ko Iakoba, i te kaingakai i te basileia ra i te ao.
12 Kareka te tamariki basileia ra, e uriia ïa i te poiri ki vao ra: tei reira te aue e te pakati anga nio ra.
13 Kua karanga aturā Iesu ki taua rangatira anere ra, Ka aere; e mei taau i akarongo ra, kia peraia koe. Ora rava atura ïa taua tavini nona i reira ra.
14 E tae aturā Iesu ki roto i te are o Petero, akara atura aia i tona metua ongoai vaine, te akāvai ua ra, kua mate i te vera.
15 Kua akatukia atura aia i tona rima, peke atura te vera iaia; tu akera aia ki runga, matuapuru maira ia ratou.
16 E aiai iora, kua apai maira ratou i te aronga i uruia e te demoni e manganui iaia ra; peke ke atura iaia taua au vaerua ra i te reo ua; e akaora atura i te aronga katoa i mate i te maki:
17 I te akatika anga i te tuatua a Isaia peroveta ra, ka na ko mai ei ra, “Nana uaorai i rave i to tatou apikepike, e kua apai ke i to tatou au mate.”
18 E kia akara akerā Iesu e, kua kako aia i te tangata e manganui, kua akaue atura e oe ki tetai pae roto.
19 Kua aere maira tetai tata tuatua, na ko maira kiaia, E te Orometua, e aru atu au ia koe i toou au aerenga katoa.
20 Kua karanga aturā Iesu kiaia, E ana to te suoli, e toanga to te manu o te reva, kareka te Tamaiti a te tangata, kare ona urunga upoko.
21 Kua tuatua maira tetai o te au pipi ana ra, E te Atu, e tuku ua ake koe iaku kia aere ana au e tanu i taku metua tane.
22 Kua karanga aturā Iesu kiaia, Ka aru mai iaku; e vaio atu, na tei mate e tanu i to ratou i mate ra.
23 Aere atura aia ki runga i te pai, kua aru atura tana au pipi iaia.
24 E i na, kua tupu maira tetai uriia maata i taua roto ra, ngaromia iora te pai i te kare: kua moe ra aia.
25 Aere atura tana au pipi e akaara iaia, na ko atura, E te Atu, e akaora ia matou; kua mate matou.
26 Kua tuatua maira aia kia ratou, Eaa kotou i mataku ei, e kotou, te aronga akarongo mea ngiti nei? Tu akera aia ki runga, kauvae atura i te matangi e te kare, marino rava atura.
27 Va ua iora te au tangata ra, na ko akera, Eaa ua te tu o teianei tangata, i akarongo ei te matangi e te kare iaia!
28 E tae atura aia ki tetai pae i te enua i to Geregese, kua aravei maira iaia e toko rua puke tangata demoni, mei roto mai i te au menema ra, e toa maata, kare ua akerai e tangata e tae na reira.
29 E i na, kua kapiki ua maira raua ra, na ko maira, Eaa taau ia maua nei, e Iesu, e te Tamaiti a te Atua ra? I aere mai koe e akamamae ia maua, auraka kia tae ki te tuatau tikai?
30 E tei tetai ngai mamao akera ia ratou tetai anana puaka maata, te kai ra i te kai.
31 Kua kaku maira te au demoni kiaia, na ko maira, Kia tuaru koe ia matou ki vao, e tuku ake koe ia matou ki roto i tera ra anana puaka.
32 Kua karanga atura aia, Ka aere; e tae atura ratou ki vao, tomo atura ratou ki roto i taua anana puaka ra: e i na, oro viviki ua atura taua anana katoa ra, na te mato e raro rava i taua roto ra, mate atura i roto i te vai.
33 Ati iora te aronga tiaki, e aere atura ki roto i te oire, akakite aere i te au mea katoa, e te ravenga i nga tangata demoni ra.
34 E i na, kua aere maira taua oire katoa ra kia aravei ia Iesu: e kite maira ratou iaia, kua akateni maira, kia aere ke atu aia i to ratou enua.